ముంబై:ఓజోన్ పొరను పరిరక్షించడంతో పాటు వాతావరణ మార్పులపై పోరాటాన్ని మరింత ఉధృతం చేయడానికి భారత్ తన నిబద్ధతను పునరుద్ఘాటించింది. పర్యావరణ, అటవీ, వాతావరణ మార్పుల మంత్రిత్వ శాఖ ఆధ్వర్యంలో ముంబైలో నిర్వహించిన 32వ ప్రపంచ ఓజోన్ దినోత్సవ వేడుకల్లో ప్రభుత్వ అధికారులు, పర్యావరణ నిపుణులు పాల్గొని ఈ దిశగా చేపడుతున్న చర్యలను వివరించారు.
మాంట్రియల్ ప్రోటోకాల్ నిబంధనలకు అనుగుణంగా ఓజోన్ పొరను క్షీణింపజేసే రసాయనాలు, పదార్థాల వాడకాన్ని దశలవారీగా తగ్గిస్తున్నట్లు మంత్రిత్వ శాఖ పేర్కొంది. పర్యావరణహిత ప్రత్యామ్నాయాలను ప్రోత్సహించడం ద్వారా ఓజోన్ పొర పునరుద్ధరణకే కాకుండా, విస్తృత వాతావరణ ప్రయోజనాలు సాధించడమే లక్ష్యంగా పనిచేస్తున్నట్లు తెలిపింది. అంతర్జాతీయ ఒప్పందాలకు కట్టుబడి ఉంటూ, దీర్ఘకాలిక సుస్థిర అభివృద్ధి లక్ష్యాల సాధనకు భారత్ తన వాతావరణ విధాన చట్రాన్ని మరింత బలోపేతం చేస్తోందని వెల్లడించింది.
