వారణాసి: ప్రధాని నరేంద్ర మోదీ పుట్టినరోజును పురస్కరించుకుని గురువారం వారణాసిలో ఆధ్యాత్మిక కార్యక్రమాలు వైభవంగా నిర్వహించారు. ఉత్తరప్రదేశ్ మాజీ మంత్రి, బీజేపీ ఎమ్మెల్యే నీలకంఠ తివారీ నేతృత్వంలో 76 మంది 'బటుకులు' (యువ పూజారులు) వేద మంత్రోచ్ఛారణల నడుమ గంగా నదికి పాలతో అభిషేకం, ప్రత్యేక పూజలు చేసి ప్రధాని ఆరోగ్యం, దీర్ఘాయువు కోసం ప్రార్థించారు. కాశీ సంప్రదాయాల ప్రకారం గంగా నదికి పూజలు చేయడం, మోదీ చిత్రపటాలను చేతబూని శుభాకాంక్షలు తెలపడం ఇక్కడి విశేషం.
ఈ వేడుకల్లో భాగంగా వారణాసి నుంచి ప్రధాని జన్మస్థలమైన గుజరాత్లోని వద్నగర్ వరకు 'సేవా సంకల్ప' మోటార్సైకిల్ యాత్ర సాగనుంది. ప్రధాని 25 ఏళ్ల ప్రజాసేవను పురస్కరించుకుని చేపట్టిన ఈ అభియాన్లో 250 మోటార్సైకిళ్లపై 500 మంది స్వచ్ఛంద కార్యకర్తలు పాల్గొంటున్నారు. రుద్రాక్ష అంతర్జాతీయ సహకార, సమావేశ కేంద్రం నుంచి ప్రారంభమయ్యే ఈ యాత్రను రక్షణ మంత్రి రాజ్నాథ్ సింగ్, యూపీ సీఎం యోగి ఆదిత్యనాథ్ జెండా ఊపి ప్రారంభించనున్నారు.
ఈ కార్యక్రమంలో ఏపీ సీఎం ఎన్. చంద్రబాబు నాయుడు, కేంద్ర మంత్రులు చిరాగ్ పాశ్వాన్, పంకజ్ చౌదరి, యూపీ డిప్యూటీ సీఎంలు కేశవ్ ప్రసాద్ మౌర్య, బ్రజేష్ పాఠక్ తదితరులు పాల్గొననున్నారు. యాత్రకు ముందు లలితా ఘాట్ నుంచి గంగాజలాన్ని సేకరించి కాశీ విశ్వనాథునికి జలాభిషేకం, హవనం, డమరు ప్రదర్శనలతో సాధువుల ఆశీర్వచనాలు తీసుకోనున్నారు.
