బెంగళూరు:భారత రక్షణ, ఏరోస్పేస్ రంగాలలో స్వదేశీ పరిజ్ఞానాన్ని మరింత బలోపేతం చేస్తూ హిందుస్థాన్ ఏరోనాటిక్స్ లిమిటెడ్ (HAL) శుక్రవారం కీలక ముందడుగు వేసింది. కర్ణాటకలోని బెంగళూరులో జరిగిన కార్యక్రమంలో ఎల్సిఏ తేజస్ శిక్షణా విమానాలు, హెచ్టిటి-40 ట్రైనర్ విమానాలను భారత వైమానిక దళానికి (IAF), అలాగే ధ్రువ్ నెక్స్ట్ జనరేషన్ (NG) హెలికాప్టర్లను పవన్ హన్స్ లిమిటెడ్కు హెచ్ఏఎల్ అధికారికంగా అప్పగించింది. రక్షణ మంత్రి రాజ్నాథ్ సింగ్, పౌర విమానయాన శాఖ మంత్రి కె. రామ్మోహన్ నాయుడు సమక్షంలో ఈ కార్యక్రమం జరిగింది.
ఈ అప్పగింత దేశీయ ఏరోస్పేస్ పర్యావరణ వ్యవస్థ అభివృద్ధిలోనూ, స్వావలంబన ప్రయాణంలోనూ ఒక మైలురాయిగా నిలుస్తుందని రక్షణ మంత్రిత్వ శాఖ తెలిపింది. సైనిక, పౌర అవసరాలకు అనుగుణంగా అధునాతన విమానాలు, హెలికాప్టర్లను తయారు చేయడంలో భారత్ స్వయంసమృద్ధి సాధిస్తోందనడానికి ఇది ప్రత్యక్ష నిదర్శనమని పేర్కొంది. ఈ కార్యక్రమంలో వైమానిక దళాధిపతి ఎయిర్ చీఫ్ మార్షల్ ఏపీ సింగ్, హెచ్ఏఎల్ సీఎండీ రవి కె మరియు పలువురు ఉన్నతాధికారులు పాల్గొన్నారు.
