సూర్య జాతీయ డెస్క్: పంజాబ్ రాష్ట్రంలో ఓటర్ల జాబితా ప్రత్యేక సమగ్ర సవరణ ప్రక్రియ పురోగతిపై భారత ఎన్నికల కమిషనర్ డాక్టర్ ఎస్ఎస్ సంధు ఉన్నత స్థాయి సమీక్షా సమావేశం నిర్వహించారు. రాష్ట్రవ్యాప్తంగా పారదర్శకమైన, దోషరహిత ఓటర్ల జాబితాను రూపొందించే లక్ష్యంతో చేపట్టిన ప్రీ-స్పెషల్ ఇంటెన్సివ్ రివిజన్ మ్యాపింగ్ ప్రక్రియను ఆయన క్షేత్రస్థాయి అధికారులతో కలిసి నిశితంగా పరిశీలించారు. జలంధర్ పర్యటన సందర్భంగా జిల్లా ఎన్నికల అధికారులు, డిప్యూటీ కమిషనర్లు, సంబంధిత నియోజకవర్గ రిటర్నింగ్ అధికారులతో సమావేశమై మ్యాపింగ్ ప్రక్రియలో ఎదురవుతున్న సవాళ్లు, పరిష్కారాలపై దిశానిర్దేశం చేశారు.
ఈ సందర్భంగా పంజాబ్ రాష్ట్ర ప్రధాన ఎన్నికల అధికారి (సీఈవో) అనిందితా మిత్రా మాట్లాడుతూ, రాష్ట్రంలో ఇప్పటివరకు 72.26 శాతానికి పైగా ఓటర్ల వివరాల మ్యాపింగ్ విజయవంతంగా పూర్తయిందని కమిషనర్కు వివరించారు. పట్టణ, గ్రామీణ ప్రాంతాల్లో పోలింగ్ బూత్ల వారీగా పర్యవేక్షణను ముమ్మరం చేశామని, మిగిలిన ఓటర్ల మ్యాపింగ్ను వేగవంతం చేసేందుకు క్షేత్రస్థాయి యంత్రాంగాన్ని అప్రమత్తం చేసినట్లు తెలిపారు. ఓటరు జాబితా సమగ్రతకు భంగం కలగకుండా అర్హులైన ప్రతి ఒక్కరినీ జాబితాలో చేర్చడం, అనర్హులు లేదా నకిలీ ఓట్లను తొలగించడమే ఈ భారీ కసరత్తు ముఖ్య ఉద్దేశమని వెల్లడించారు.
ఎన్నికల కమిషనర్ డాక్టర్ సంధు అధికారులను ఉద్దేశించి మాట్లాడుతూ, నిర్దేశిత గడువులోగా వంద శాతం మ్యాపింగ్ లక్ష్యాన్ని చేరుకోవాలని ఆదేశించారు. క్షేత్రస్థాయిలో పనితీరు సరిగా లేని బూత్ స్థాయి అధికారులను (బీఎల్వోలను) గుర్తించి వారికి అవసరమైన శిక్షణ, ప్రోత్సాహం అందించి పనులను వేగవంతం చేయాలని స్పష్టం చేశారు. వచ్చే అసెంబ్లీ ఎన్నికల నాటికి ఓటర్ల జాబితా ఎటువంటి తప్పిదాలు లేకుండా పక్కాగా సిద్ధం కావాలని, ఈ ప్రక్రియలో రాజకీయ పక్షాలు, ప్రజల భాగస్వామ్యాన్ని నిర్ధారిస్తూ పూర్తి పారదర్శకతను పాటించాలని ఆయన ఉద్ఘాటించారు.
