భారీగా పెరిగిన పసిడి, వెండి ధరలు : ఒక్కరోజే రూ.4,300 పైగా జంప్

దేశీయ మార్కెట్లో బంగారం, వెండి ధరలు ఒక్కసారిగా రికార్డు స్థాయిలో పెరిగాయి. కేవలం ఒక్క రోజు వ్యవధిలోనే పసిడి ధరలు సుమారు రూ. 4,300 నుంచి రూ. 4,600 వరకు ఎగబాకి, గత మూడు నెలల గరిష్ఠ స్థాయికి చేరాయి. ఈ పెరుగుదలతో దేశ రాజధాని ఢిల్లీలో 10 గ్రాముల బంగారం ధర గతంలో ఉన్న రూ. 1,58,000 నుంచి ఏకంగా రూ. 1,62,000 మార్కును తాకింది.

బంగారం వెంటే వెండి కూడా భారీ ఎత్తున ప్రియమైంది. కిలో వెండిపై రూ. 10,000 వరకు పెరగడంతో మార్కెట్లో దాని ధర రూ. 2,45,000కు చేరుకుంది. గత ఏడు వారాల్లో వెండి ఈ స్థాయి ధరను నమోదు చేయడం ఇదే తొలిసారి. ప్రపంచవ్యాప్తంగా నెలకొన్న ఉద్రిక్త పరిస్థితుల వల్ల మార్కెట్లలో అనిశ్చితి పెరిగింది.  అమెరికన్ డాలర్ విలువ తగ్గడం, యూఎస్ బాండ్ ఈల్డ్స్ క్షీణించడం లోహాల ధరలపై ప్రభావం చూపింది.

సురక్షిత పెట్టుబడులకు డిమాండ్: మార్కెట్ అనిశ్చితి సమయంలో పెట్టుబడిదారులు బంగారాన్ని సురక్షితమైన మార్గంగా భావించి భారీగా కొనుగోళ్లు జరపడమే ఈ పెంపునకు ముఖ్య కారణం.