వైసీపీ హయాంలో ప్రాజెక్టులకు బ్రేకులు..కూటమి పాలనలో పరుగులు

చేయని పనులకు క్రెడిట్ కొట్టేయాలని చూస్తున్నారు..

విద్యుత్ శాఖ మంత్రి గొట్టిపాటి రవికుమార్

 ఏపీ స్టేట్ బ్యూరో, అమరావతి :

వైసీపీ ఐదేళ్ల పాలనలో రాష్ట్రంలోని సాగునీటి ప్రాజెక్టులు తీవ్ర నిర్లక్ష్యానికి గురయ్యాయని విద్యుత్ శాఖ మంత్రి గొట్టిపాటి రవికుమార్ విమర్శించారు. కూటమి ప్రభుత్వం అధికారంలోకి వచ్చిన తర్వాత నిలిచిపోయిన ప్రాజెక్టులకు వేగం పెంచి ఒక్కొక్కటిగా పనులు పూర్తి చేస్తోందని తెలిపారు. వైసీపీ హయాంలో గుండ్లకమ్మ గేటు విరిగినా పట్టించుకోలేదని, వెలుగొండ టన్నల్‌లో యంత్రం ఇరుక్కున్నా బయటకు తీసేందుకు చర్యలు తీసుకోలేదని, పోలవరం పనులు నిలిచిపోయినా చలనం లేకపోయిందని ఆరోపించారు.

గుండ్లకమ్మ గేటు అమర్చకుండా ఇసుక దోపిడీకి ప్రాధాన్యమిచ్చారని మంత్రి విమర్శించారు. ప్రజల నీటి అవసరాల కంటే ధనదాహమే వైసీపీ ప్రభుత్వానికి ముఖ్యమైందని అన్నారు. 70 శాతం పూర్తయిన పోలవరం పనులను ఐదేళ్లలో ఒక్క శాతం కూడా ముందుకు తీసుకెళ్లలేదని ఆరోపించారు. వెలుగొండ ప్రాజెక్టుకు కూటమి ప్రభుత్వం వెయ్యి కోట్ల రూపాయలు కేటాయించి నిర్వాసితులకు పరిహారం అందించిందని, ఫీడర్‌ కెనాల్ పూర్తి చేయడంతో పాటు టన్నల్‌లో ఇరుక్కున్న యంత్రాన్ని బయటకు తీసి పనులకు వేగం పెంచామని చెప్పారు.

చంద్రబాబు ఆదేశాలతో ప్రకాశం జిల్లా టీడీపీ నేతలు ఢిల్లీ వెళ్లి వెలుగొండ ప్రాజెక్టుకు గెజిట్ నోటిఫికేషన్ సాధించారని గొట్టిపాటి తెలిపారు. కలగా మిగిలిపోతుందనుకున్న వెలుగొండకు 10 టీఎంసీల నీటిని తీసుకొచ్చిన ఘనత కూటమి ప్రభుత్వానిదేనన్నారు. తాము పూర్తి చేసి నీళ్లు పారిస్తున్న ప్రాజెక్టులపై వైసీపీ నేతలు గొప్పలు చెప్పుకోవడం విడ్డూరంగా ఉందని, చేయని పనులకు క్రెడిట్ అడగడం వైసీపీకి అలవాటైపోయిందని మంత్రి మండిపడ్డారు. ప్రజలు మాత్రం గతంలో ఎవరు ఏం చేశారో మరిచిపోలేదని అన్నారు.