చైనా vs జపాన్: నౌకాదళం, వైమానిక దళం – ఎవరు ముందంజలో?

చైనా–జపాన్ మధ్య ఉద్రిక్తతలు ఇటీవల మరింత వేడెక్కుతున్నాయి. ప్రపంచంలోని ప్రధాన శక్తులైన ఈ రెండు దేశాల మధ్య మాటల యుద్ధం తీవ్రంగా మారింది. జపాన్ కొత్త ప్రధాన మంత్రి సానే తకైచి చేసిన వ్యాఖ్యలు ఈ ఉద్రిక్తతలను మరింత పెంచాయి. చైనా తైవాన్‌పై దాడి చేస్తే, జపాన్ అక్కడ రక్షణ దళాలను పంపే అవకాశం ఉందని ఆమె ప్రకటించారు. ఈ వ్యాఖ్యలు చైనాను ఆగ్రహానికి గురిచేసి, తైవాన్ విషయంలో జపాన్ జోక్యం చేసుకుంటే తీవ్రమైన పరిణామాలు తప్పవని చైనా హెచ్చరించింది.ఇలాంటి పరిస్థితుల్లో ముఖ్యంగా ఎదురు ప్రశ్న ఇదే—ఈ రెండు దేశాలు నిజంగా యుద్ధంలోకి దిగితే ఎవరికి పైచేయి ఉంటుంది? వారి సైనికశక్తి ఎంత? అలాంటి యుద్ధం జరిగే అవకాశం ఎంత? ప్రపంచానికి దాని ప్రభావం ఏమిటి?2025 గణాంకాల ప్రకారం ప్రపంచ సైనిక శక్తుల ర్యాంకింగ్‌ను విడుదల చేసే గ్లోబల్ ఫైర్‌పవర్ సంస్థ, చైనాను ప్రపంచంలో మూడో అతిపెద్ద సైనిక శక్తిగా పేర్కొంది. చైనా దాదాపు 2 మిలియన్ల క్రియాశీల దళాలను కలిగి ఉంది, ఇది ప్రపంచంలోనే అత్యధికం. 700కిపైగా నౌకలు, మూడు ఎయిర్‌క్రాఫ్ట్ క్యారియర్లు, 3000కు పైగా యుద్ధ విమానాలు, దీర్ఘదూర బాలిస్టిక్ క్షిపణుల విపులమైన నిల్వ, పెరుగుతున్న రక్షణ బడ్జెట్—ఈ అన్ని అంశాలు చైనా సైన్యాన్ని మరింత శక్తివంతంగా నిలబెడుతున్నాయి. భారీ సంఖ్యలు మరియు వేగంగా అభివృద్ధి అవుతున్న సాంకేతికత చైనాకు పెద్ద బలం.ఇక జపాన్ విషయానికి వస్తే, దాని వద్ద సుమారు 2.5 లక్షల క్రియాశీల సైనికులు ఉన్నారు. నౌకాదళం చాలా ఆధునికమైనది, 150కిపైగా యుద్ధ ఓడలు, హెలికాప్టర్ క్యారియర్లు ఉన్నాయి. వైమానిక దళంలో 1500 విమానాలు, ముఖ్యంగా అధునాతన F-35 యుద్ధ విమానాలు ఉన్నాయి. అత్యున్నత రక్షణ సాంకేతికత, బాగా శిక్షణ పొందిన దళాలు జపాన్ సైన్యానికి ప్రధాన బలం. రక్షణకే పరిమితమయ్యే రాజ్యాంగం ఉన్నప్పటికీ, ఇటీవల జపాన్ తన సైనిక సామర్థ్యాలను బలోపేతం చేస్తోంది.ఒకవేళ చైనా–జపాన్ ఒంటరిగా యుద్ధంలోకి దిగితే, సంఖ్యలో, నౌకాదళంలో, క్షిపణుల్లో చైనా స్పష్టమైన ఆధిక్యం కలిగి ఉంటుంది. జపాన్ సాంకేతికంగా బలమైనా, భౌగోళిక పరిమితులు మరియు తక్కువ మనుష్యబలం కారణంగా చైనా పైచేయి సాధించే అవకాశం ఎక్కువగా నిపుణులు భావిస్తున్నారు. చైనా అణ్వాయుధాలు కలిగి ఉండగా, జపాన్ వద్ద అవి లేనందువల్ల పరిస్థితులు మరింత క్లిష్టం అవుతాయి. అయితే జపాన్‌కు అమెరికా మద్దతు లభించే అవకాశం ఉండటంతో, అణు యుద్ధం జరిగితే ప్రపంచవ్యాప్తంగా దారుణ ప్రభావాలు తప్పవు—కాబట్టి అలాంటి పరిస్థితి ఏర్పడే అవకాశం చాలా తక్కువ.అమెరికా యుద్ధంలో చేరితే—చైనాకు విజయం సాధించడం చాలా కష్టమనే అభిప్రాయంతో అనేక విశ్లేషకులు ఉన్నారు.అయితే వాస్తవంగా యుద్ధం జరిగే అవకాశం ప్రస్తుతం చాలా తక్కువ. రెండు దేశాలు ఆర్థికంగా ఒకదానిపై ఒకటి ఆధారపడి ఉన్నాయి. జపాన్ చైనా దిగుమతులపై ఆధారపడుతుంది; చైనా జపాన్‌లో భారీ పెట్టుబడులు పెట్టింది; ప్రతి సంవత్సరం లక్షలాది చైనా పర్యాటకులు జపాన్‌ను సందర్శిస్తారు. మాటల యుద్ధం, చిన్నపాటి హెచ్చరికలు ఉన్నప్పటికీ, పూర్తి స్థాయి యుద్ధానికి ఇరు దేశాలు కూడా ఆసక్తి చూపే అవకాశం చాలా తక్కువ. సెంకాకు దీవులు లేదా తైవాన్ వంటి ప్రాంతాల్లో చిన్న ఘర్షణలు తలెత్తినా, పెద్ద యుద్ధం ఇరు దేశాలకు కూడా తీవ్రమైన నష్టం కలిగిస్తుందని అవి బాగా గ్రహించాయి.