గుడిలోకి చొరబడి విగ్రహం ధ్వంసం చేసిన బంగ్లాదేశ్ చొరబాటుదారుడు

గార్డెన్ సిటీ ఆఫ్ ఇండియా, ఐటీ క్యాపిటల్ బెంగుళూరులో ఓ షాకింగ్ సంఘటన చోటు చేసుకుంది. దేశంలో అక్రమంగా నివసిస్తున్న ఓ బంగ్లా జాతీయుడు.. హిందూ దేవాలయంపై దాడికి పాల్పడ్డాడు. ప్రస్తుతం ఇందుకు సంబంధించిన వీడియో ఒకటి సోషల్ మీడియాలో వైరల్‌గా మారింది. నిందితుడు ప్రస్తుతం పోలీసుల అదుపులో ఉన్నట్టు చెబుతున్నారు. అసలేం జరిగిందంటే.. బెంగళూరు నగరం మారతహళ్లి సమీపంలో ఉన్న దేవరబీసనహళ్లి గ్రామంలో ప్రధాన రహదారి పక్కన శ్రీవేణుగోపాల స్వామి ఆలయం ఉంది. అయితే, సోమవారం రోజు మధ్యాహ్నం సమయంలో ఓ వ్యక్తి తప్పతాగి ఆలయం వద్దరకు వచ్చాడు. అనంతరం రాయితో గుడి ధ్వజ స్తంభంపై దాడి చేశాడు. ఆ వెంటనే చెప్పులు వేసుకుని గుడిలోకి ప్రవేశించాడు. దేవుడి విగ్రహంపై కూడా దాడికి దిగాడు. అక్కడే ఉన్న భక్తులు ఈ చర్యతో ఒక్కసారిగా షాక్ అయ్యారు. వెంటనే తేరుకుని అతడ్ని పట్టుకున్నారు. దేహశుద్ది చేసి చెట్టుకు కట్టేశారు.

అయితే, అతడిని విచారించగా తాను బంగ్లాదేశ్ నుంచి అక్రమంగా ఇండియాకు వచ్చినట్లు చెప్పాడు. సనాతన అనే ఎక్స్ ఖాతాలో ఇందుకు సంబంధించిన వీడియో ఒకటి పోస్ట్ చేయడంతో ప్రస్తుతం అది సామాజిక మాధ్యమాల్లో కాస్తా వైరల్‌గా మారింది. ఆ వీడియోపై వైట్ ఫీల్డ్ బెంగళూరు డీసీపీ ఆఫీస్ స్పందించింది. ఈ మేరకు ఎక్స్ ఖాతాలో ఓ పోస్టు పెట్టింది. ఈ ఘటనకు సంబంధించి మారతహళ్లి పోలీస్ స్టేషన్‌లో కేసు ఫైల్ అయ్యిందని.. నిందితుడ్ని అరెస్ట్ చేశామని అన్నారు. దర్యాప్తు కొనసాగుతోంది అని చెప్పారు. నిందితుడ్ని బంగ్లా పౌరుడు కబీర్ మండల్‌గా గుర్తించామని తెలిపారు.

ఆ నిందితుడు ప్రస్తుతం పోలీస్ కస్టడీలోనే ఉన్నట్లు తెలుస్తోంది. నిందితుడి పౌరసత్వంపై పోలీసులు విచారణ చేపట్టారు. అసలు బంగ్లాదేశ్ నుంచి అతుడు ఎందుకొచ్చాడు అన్న దానిపై పోలీసులు ఆరా తీస్తున్నారు. ఈ ఘటనపై బెంగుళూరులోని హిందూ సంఘాలు భగ్గుమన్నాయి. ఇలాంటి వారిపై ప్రభుత్వం కఠిన చర్యలు తీసుకోవాలని డిమాండ్ చేస్తున్నారు. దేశంలోకి అక్రమంగా చొరబడటమే కాకుండా భారతీయ సంస్కృతిపై కూడా దాడిచేయడంపై ఆగ్రహం వ్యక్తం చేస్తున్నారు. అక్రమ వలసదారులను దేశం నుంచి వెనక్కి పంపాలని కోరుతున్నారు.