కల్తీసారా తాగితే వీసాలు రద్దు, జీవితకాలం దేశ బహిష్కరణ

మద్యపాన నిషేధం అమలులో ఉన్న కువైట్‌లో ఇటీవల కొంత మంది విదేశీయులు కల్తీసారా తాగిన ఘటన పెను సంచలనం సృష్టిస్తోంది. దీన్ని అత్యంత తీవ్రంగా పరిగణించిన కువైట్ సర్కారు.. నిబంధనలను ఉల్లంఘించినవారిపై కఠిన చర్యలకు ఉపక్రమించింది. ముఖ్యంగా వారందరినీ జీవితకాలం దేశం నుంచి బహిష్కరించడమే కాకుండా వెంటనే ఇళ్లకు పంపించేయాలని నిర్ణయించింది. ఈక్రమంలోనే భారతీయులు సహా ఇతర విదేశీ కార్మికులు నివసిస్తున్న ప్రాంతాల్లో పోలీసులు విస్తృతంగా తనిఖీలు చేస్తున్నారు. ఈ సోదాల్లో వీసా నిబంధనలు, నివాస చిరునామాలో ఏవైనా లోపాలు కనిపించినా.. వారిని వెంటనే అదుపులోకి తీసుకుని జైలుకు తరలిస్తున్నారు. ఈ పరిణామాలతో కువైట్‌లో నివసిస్తున్న ప్రవాసాంధ్రులు ఇతర భారతీయులు తీవ్ర భయాందోళనలకు గురవుతున్నారు.

అసలేం జరిగిందంటే..?

ఇటీవలే కువైట్‌లోని జీబ్ అల్ శూయుఖ్ అనే ప్రాంతంలో ఉన్న విదేశీయులు సారా సేవించారు. మద్యం నిషేధంలో ఉన్న ఈ దేశంలో కల్తీసారా తాగి మొత్తంగా 160 మంది అస్వస్థతకు గురయ్యారు. విషయం గుర్తించిన స్థానికులు, అధికారులు వారిని వెంటనే స్థానిక ఆస్పత్రులకు తరలించారు. ప్రస్తుతం వారందరి పరిస్థితి బాగానే ఉండగా.. ఇంకా చికిత్స పొందుతున్నారు. ఇందులో దాదాపు 40 మంది భారతీయులు కూడా ఉండగా.. ఈ ఘటనపై కఠిన చర్యలకు ఉపక్రమించింది కువైట్ సర్కారు. ముఖ్యంగా వీరంతా ఆసుపత్రుల నుంచి డిశ్చార్జ్ అయిన అనంతరం వారి వీసాలను రద్దు చేసి, దేశ బహిష్కరణ చేయాలని ప్రభుత్వం నిర్ణయించింది.

అంతేకాకుండా భవిష్యత్తులో వారు తిరిగి కువైట్‌లో అడుగు పెట్టకుండా జీవితకాల నిషేధం విధించాలని అధికారులు నిర్ణయించారు. ఇస్లామిక్ చట్టం ప్రకారం.. కువైట్‌లో సారా విక్రయించడం, సేవించడం నేరం. ఈ నిబంధనలను ఉల్లంఘించినందుకే ఈ కఠినమైన చర్యలు తీసుకుంటున్నామని కువైట్‌ అధికారులు స్పష్టం చేశారు. అంతేకాకుండా జీబ్ అల్ శూయుఖ్ ప్రాంతం కల్తీసారా, వ్యభిచారం, ఇతర నేరాలకు నిలయంగా మారగా.. దీన్ని పూర్తిగా నేలమట్టం చేయాలని చూస్తోంది. దాదాపు 88 చదరపు కిలో మీటర్ల విస్తీర్ణంలో ఉన్న ఈ ప్రాంతంలోని నివాసాలాన్నీ ఖాళీ చేయించి, బిల్డింగులు కూల్చేసి.. దీన్ని పునర్నిర్మించే ప్రతిపాదనను కూడా ప్రభుత్వం పరిశీలిస్తోంది.

ఆందోళనలో విదేశీ కార్మికులు..

ఈ ప్రాంతంలో ప్రవాసాంధ్రులు, భారతీయులు, బంగ్లాదేశీయులతో పాటు ఇతర వలస కార్మికులు నివసిస్తున్నారు. కానీ సర్కారు తీసుకోబోతున్న నిర్ణయం గురించి తెలుసుకుని తీవ్ర భయాందోళకు గురవుతున్నారు. ఇకపై తామెక్కడ ఉండాలని ఆలోచిస్తున్నారు. ఇక్కడైతే తక్కువ ధరకే ఇళ్లు దొరికేవని.. తమకొచ్చే అరకొరక సంపాదనతో వేరే ప్రాంతాల్లో ఉంటూ డబ్బులు సంపాదించుకోవడం చాలా కష్టం అని చెబుతున్నారు.