ఆపని చేయగల్గితే నేను స్వర్గానికి వెళ్తా: డొనాల్డ్ ట్రంప్

ప్రపంచ రాజకీయాలపై ఎప్పుడూ తనదైన శైలిలో స్పందిస్తూ.. సంచలనాలకు కేంద్ర బిందువుగా ఉండే అగ్రరాజ్యం అమెరికా అధ్యక్షుడు తాజాగా షాకింగ్ కామెంట్లు చేశారు. ముఖ్యంగా రష్యా-ఉక్రెయిన్ యుద్ధాన్ని ఆపడంపై ఆసక్తికరమైన వ్యాఖ్యలు చేశారు. ఫోక్స్ అండ్ ఫ్రెండ్స్ అనే టీవీ షోలో మాట్లాడుతూ.. రష్యా-ఉక్రెయిన్ దేశాల మధ్య యుద్ధాన్ని ఆపగల్గితే తనకు స్వర్గానికి వెళ్లే అవకాశం లభిస్తుందని వ్యాఖ్యానించారు. ప్రస్తుతం ట్రంప్ చేసిన ఈ కామెంట్లు నెట్టింట తెగ వైరల్ అవుతున్నాయి.

టీవీ షోలో మాట్లాడిన ట్రంప్.. తాను అధికార బాధ్యతలు సరిగ్గా నిర్వహించడం లేదని చాలా మంది అంటున్నారని తెలిపారు. కానీ తాను స్వర్గానికి వెళ్లేందుకు ప్రయత్నించాలనుకుంటున్నట్లు చెప్పారు. నిరంజానే తాను రష్యా-ఉక్రెయిన్ రష్యా మధ్య యుద్ధాన్ని ఆపగల్గితే.. అదే తనకు స్వర్గానికి వెళ్లే అవకాశాన్ని ఇస్తుందన్నారు.అంతేకాకుండా రష్యా-ఉక్రెయిన్ యుద్ధం వల్ల అమెరికా సైనికులు ప్రాణాలు కోల్పోవడం లేదని చెప్పుకొచ్చారు. కానీ రష్యా, ఉక్రెయిన్ సైనికులతో పాటు అమాయక ప్రజలు తమ ప్రాణాలను కోల్పోతున్నారని ట్రంప్ ఆవేదన వ్యక్తం చేశారు. క్షిపణులు సరైన స్థానాల్లో పడకపోవడం వల్ల కీవ్ వంటి నగరాల్లో వేలాది మంది ప్రజలు మరణిస్తున్నారని పేర్కొన్నారు.

రష్యా-ఉక్రెయిన్ దేశాల మధ్య శాంతిని పునరుద్ధరించడానికి ట్రంప్ తన ప్రయత్నాలను మరింతగా పెంచారు. వారం రోజు వ్యవధిలోనే ఇరు దేశాధినేతలతో ఆయన కీలక భేటీలు నిర్వహించారు. ముందుగా అలస్కాలో రష్యా అధ్యక్షుడు వ్లాదిమిర్ పుతిన్‌తో సమావేశం అయ్యారు. అయితే ఈ భేటీలో యుద్ధం ఆపేందుకు ఎలాంటి స్పష్టమైన పరిష్కారం లభించకపోయినప్పటికీ.. ఇరువురి మధ్య చాలానే ఒప్పందాలు కుదిరినట్లు చెప్పారు. అలాగే రెండోసారి ఉక్రెయిన్ అధ్యక్షుడు వోలోడిమిర్ జెలెన్స్కీ, యూరప్ నేతలతో నిర్వహించారు.

ఈ సమావేశంలో ట్రంప్, జెలెన్‌స్కీలు భద్రతా హామీల గురించి చర్చించారు. అయితే రష్యాతో భూభాగాలను మార్చుకునే ఒప్పందానికి జెలెన్‌స్కీ వ్యతిరేకతను గట్టిగా వ్యక్తం చేశారు. అలాగే రష్యాతో శాంతి ఒప్పందానికి తాము సిద్ధమేనని కూడా ప్రకటించారు. ఈక్రమంలోనే ట్రంప్ యూరప్ నేతలతో కలిసి పుతిన్, జెలెన్‌స్కీ మధ్య ద్వైపాక్షిక సమావేశం ఏర్పాటు చేయడానికి ప్రయత్నిస్తున్నారు. దీనిపై జర్మనీ ఛాన్సలర్ కూడా సానుకూలంగా స్పందించారు. రాబోయే రెండు వారాల్లో ఈ సమావేశం జరగొచ్చని.. ఇరు దేశాల యుద్ధం కూడా ఆగిపోవచ్చని అన్నారు. ఇదిలా ఉండగా.. ఇప్పటికే ట్రంప్ తాను మొత్తంగా 6 యుద్ధాలను ఆపినట్లు చెప్పారు. ఆరు నెలల్లోనే ప్రపంచ శాంతి కోసం ఎంతగానో కృషి చేశానని వివరించారు. తాను చేసిన కృషికి గాను నోబెల్ శాంతి బహుమతి రావాలని కూడా ఆశాభావం వ్యక్తం చేశారు.