న్యూడ్ ఫొటోపై వివాదం.. ఆ మీడియాపై ట్రంప్ రూ.86 వేల కోట్ల దావా

అగ్రరాజ్యం అమెరికా అధ్యక్షుడు డొనాల్డ్ ట్రంప్‌నకు.. ప్రముఖ మీడియా సంస్థలకు మధ్య మరో న్యాయ పోరాటం మొదలైంది. ముఖ్యంగా అమెరికా సెక్స్ కుంభకోణంలో నిందితుడు అయిన జెఫ్రీ ఎప్‌స్టీన్‌తో ట్రంప్‌నకు సంబంధాలు ఉన్నాయంటూ ఇటీవలే పెద్ద ఎత్తున ప్రచారం సాగింది. ఈక్రమంలోనే దీనిపై వాల్ స్ట్రీట్ జర్నల్ ఓ కథనాన్ని ప్రచురించింది. అందులో 2003లో జెఫ్రీ ఎప్‌స్టీన్‌ పుట్టిన రోజు సందర్భంగా శృంగారాత్మక చిత్రాన్ని ట్రంప్ పంపించారని ఆరోపించింది. దీనిపై స్పందించిన ట్రంప్ తీవ్ర ఆగ్రహం వ్యక్తం చేశారు. సదరు మీడియా సంస్థపై 10 బిలియన్ డాలర్ల (భారత కరెన్సీలో దాదాపు రూ.86 వేల కోట్లు)కు దావా వేశారు. అలాగే అమెరికా మీడియా టైకూన్ రూపర్ట్ మర్దోక్‌పై కూడా ట్రంప్ దావా వేశారు.

ఈ వివాదం 'వాల్‌స్ట్రీట్ జర్నల్' గురువారం ప్రచురించిన ఒక కథనంతో ప్రారంభం అయింది. 2003లో ఎప్‌స్టీన్‌కు బహుమతిగా ఇచ్చిన ఒక బర్త్ డే ఆల్బమ్‌లో ట్రంప్ పేరుతో.. శృంగారాత్మక చిత్రం ఉందని ఆ కథనం పేర్కొంది. ఈ లేఖలో ఒక నగ్న మహిళ చేతితో గీసిన చిత్రం, అలాగే ట్రంప్ సంతకం లైంగికంగా అభ్యంతరకరమైన రీతిలో ఉన్నాయని WSJ వివరించింది. అయితే ఈ లేఖను తాను రాయలేదని, అది పూర్తిగా తప్పుడు, దురుద్దేశపూరిత, పరువు నష్టం కలిగించే కథనమని ట్రంప్ తీవ్రంగా ఖండించారు.

ఫ్లోరిడాలోని మియామిలోని ఫెడరల్ కోర్టులో దాఖలు చేసిన ఈ దావాలో.. 'వాల్ స్ట్రీట్ జర్నల్' మాతృ సంస్థ న్యూస్ కార్ప్ , రూపర్ట్ మర్డోక్, న్యూస్ కార్ప్ సీఈఓ రాబర్ట్ థామ్సన్, WSJ ప్రచురణకర్త డౌ జోన్స్‌తో పాటు ఇద్దరు రిపోర్టర్లు (ఖదీజా సఫ్దర్, జో పాలాజోలో)లను ట్రంప్ ప్రతివాదులుగా చేర్చారు. ఈ కథనాన్ని తెలిసి మరీ నిర్లక్ష్యంగా ప్రచురించారని.. దీనివల్ల తనకు అపారమైన ఆర్థిక, పరువు నష్టం వాటిల్లిందని ట్రంప్ ఆరోపించారు. ముఖ్యంగా దీని గురించి సోషల్ మీడియా వేదిక ట్రూత్‌లో మాట్లాడుతూ.. నకిలీ వార్తా మీడియా దుర్వినియోగాన్ని ఇకపై సహించని అమెరికన్లు అందరి తరపున తాను పోరాడుతున్నానని పేర్కొన్నారు. గతంలో ABC, CBS వంటి వార్తా సంస్థలపై కూడా దావా వేసి, మిలియన్ల డాలర్ల సెటిల్‌మెంట్‌లను సాధించిన అనుభవం తనకు ఉందని గుర్తు చేశారు.

ఎప్‌స్టీన్‌తో తనకున్న సంబంధంపై కొత్తగా దృష్టి సారించిన ఈ కథనం ప్రచురణకు ముందే తాను మర్డోక్‌తో, WSJ టాప్ ఎడిటర్ ఎమ్మా టక్కర్‌తో మాట్లాడానని వివరించారు. అది పూర్తిగా అవాస్తవం, తప్పని కూడా వారికి చెప్పానని వెల్లడించారు. ఇవి తన మాటలు కావని. తాను మాట్లాడే విధానం కూడా అది కాదని.. పైగా తాను అస్సలే బొమ్మలు గీయనని ట్రంప్ స్పష్టం చేశారు. అయితే WSJ తన కథనానికి కట్టుబడి ఉంది.

ఈ పరిణామం జస్టిస్ డిపార్ట్‌మెంట్‌ను కూడా ప్రభావితం చేసింది. ఎప్‌స్టీన్ లైంగిక అక్రమ రవాణా కేసులోని గ్రాండ్ జ్యూరీ ట్రాన్స్ క్రిప్ట్‌లను సీల్ తీసి బహిరంగ పరచాలని శుక్రవారం ఒక ఫెడరల్ కోర్టును జస్టిస్ డిపార్ట్‌మెంట్ కోరింది. ఎప్‌స్టీన్ కేసులో అదనపు ఫైల్‌లను విడుదల చేయబోమని గతంలో ప్రకటించిన తర్వాత తలెత్తిన వివాదాన్ని నివారించడానికి ఈ చర్య తీసుకున్నారు. ఎప్‌స్టీన్‌తో ట్రంప్‌నకు ఉన్న సంబంధాలపై వచ్చిన వార్తలు.. ఎప్ స్టీన్ మరణం చుట్టూ అలుముకున్న కుట్ర సిద్ధాంతాలు, అలాగే జస్టిస్ డిపార్ట్‌మెంట్ చర్యలు అమెరికా రాజకీయ, మీడియా వర్గాల్లో తీవ్ర చర్చనీయాంశంగా మారాయి.