రూ.6,800 కోట్ల కంపెనీ.. ఆసక్తి చూపని వారసులు

ప్రముఖ లగేజీ కంపెనీ వీఐపీ ఇండస్ట్రీస్ గురించి తెలియని వారు ఉండకపోవచ్చు. ఈ సంస్థ విలువ సుమారు రుూ.6,800 కోట్లుగా ఉంటుందని అంచనా. అయితే, ఇప్పుడు ఈ సంస్థలో యాజమాన్యం మారే అవకాశాలు కనిపిస్తున్నాయి. ఇంత పెద్ద కంపెనీని నడిపిచేందుకు ఈ సంస్థ అధినేత దిలీప్ పిరమల్ వారసలు ఆసక్తి చూపించడం లేదట. స్వయంగా ఆయనే ఈ మాట చెప్పడం గమనార్హం. ప్రమోటర్ల గ్రూప్ ఈ సంస్థలో వాటాను విక్రయించేందుకు సిద్ధమైన క్రమంలో ఈ వ్యాఖ్యలు చేశారు.

వీఐపీ ఇండస్ట్రీస్ అధినేత దిలీప్ పిరమల్ అనూహ్య నిర్ణయం తీసుకున్నారు. తమ కంపెనీలో ప్రమోటర్ల గ్రూప్ 32 శాతం వాటా విక్రయించేందుకు సిద్ధమైనట్లు చెప్పారు. ప్రస్తుతం ఈ సంస్థలో ప్రమోటర్లకు 51.73 శాతం వాటా ఉంది. అందులో 32 శాతం షేర్లను ప్రైవేట్ ఈక్విటీ ఇన్వెస్టర్లు, ఇతరులకు విక్రయించేందుకు సిద్ధమైనట్లు స్టాక్ ఎక్స్చేంజీ ఫైలింగ్‌లో వీఐపీ ఇండస్ట్రీస్ వెల్లడించింది. ఈ ఫైలింగ్ అనంతరం మాట్లాడిన దిలీప్ పిరమల్ కీలక వ్యాఖ్యలు చేశారు.

' మాది కుటుంబ యాజమాన్యంలోని వ్యాపారం. మా తర్వాతి తరం దీనిని నడిపించేందుకు ఆసక్తి చూపించడం లేదు. 5 దశాబ్దాలుగా కొనసాగుతున్న ఈ వ్యాపారంలో వీఐపీ మార్కెట్ లీడర్‌గా ఉంది. కానీ, గత ఐదేళ్లుగా మార్కెట్ వాటా కోల్పోతూ వస్తున్నాం. గత ఏడాది నాలుగు త్రైమాసికాల్లోనూ నష్టాలు వచ్చాయి. నిర్వహణ పరమైన సమస్యల కారణంగా ఇబ్బందులు ఎదుర్కొంటున్నాం. వచ్చే రెండు మూడేళ్లలో బాగా పని చేయాల్సిన అవసరం ఉంది. నా వరకు మా షేర్ హోల్డర్ల ప్రయోజనాలు కాపాడడమే ముఖ్యం ' అని పేర్కొన్నారు.

  కొత్త యాజమాన్యాన్ని తీసుకురావడమే ఇప్పుడు ఈ కంపెనీ ముందు ఉన్న ఏకైక మార్గమని ఆయన అన్నారు. ఈ కంపెనీ బలైన పునాదులతో నిర్మితమైందని, త్వరలోనే పుంజుకుంటుందన్నారు. అప్పటి వరకు పెట్టుబడిదారులు సహనం వహించాలని విజ్ఞప్తి చేశారు. మేనేజ్‌మెంట్ మార్పు అనేది అంత సులభమైన విషయం కాదని సూచించారు. తమ కుటుంబ సభ్యుల్లో ఒకరు బోర్డులో సభ్యులుగా ఉంటారని వెల్లడించారు.

వీఐపీ ఇండస్ట్రీస్ గ్రూప్‌లో దిలీప్ పిరమల్, కెంప్ అండ్ కంపెనీ లిమిటెడ్, కిడ్డీ ప్లాస్ట్ లిమిటెడ్, డీజీపీ సెక్యూరిటీస్, పిరమల్ వైభుతి ఇన్వెస్ట్‌మెంట్స్, అల్కన్ ఫైనాన్స్ అండ్ ఇన్వెస్ట్‌మెంట్లకు వాటాలు ఉన్నాయి. ఇప్పుడు ఈ ప్రమోటర్లు తమ వాటాను విక్రయిస్తున్నారు. 32 శాతం వాటాను విక్రయించిన తర్వాత వారి చేతిలో 19.73 శాతం వాటా మాత్రమే మిగిలి ఉంటుంది.