పబ్లిక్ ప్లేసులో దమ్ముకొడుతున్నారా.. చిక్కులు తప్పవు

ధూమపానం ఆరోగ్యానికి హానికరం.. చెల్లించక తప్పదు భారీ మూల్యం.. సినిమా హాల్‌లో ప్రకటనల దగ్గర నుంచి సినీ స్టార్ల వరకూ.. జంక్షన్‌లో గవర్నమెంట్ యాడ్ నుంచి వైద్యుల వరకూ ప్రతి ఒక్కరూ చెప్పే మాట. కానీ వింటేగా.. ఎంత చెప్పినా సిగరెట్, బీడీ తాగేవారిలో మార్పు రావటం లేదు. హానికరమని తెలిసినా ధూమపానం అలవాటును మార్చుకోలేకపోతున్నారు. ఈ వ్యసనంతో ఎంతో మంది యువత తమ నిండు జీవితాన్ని, బంగారు భవిష్యత్తును పాడు చేసుకుంటున్నారు. అయితే మీకు కూడా సిగరెట్ తాగే అలవాటు ఉందా.. మానాలనుకున్నా మానలేకపోతున్నారా.. బహిరంగ ప్రదేశాల్లోనే దమ్ము కొడుతున్నారా.. అయితే జాగ్రత్త. ఇలా చేస్తే ఇకపై మీకు చిక్కులు తప్పవు.

సిగరెట్, బీడీ వంటివి తాగేవారితో పాటుగా వారి పక్కనున్న వారి ఆరోగ్యానికి కూడా హానికరం. ఈ విషయం తెలిసినా చాలా మంది బహిరంగ ప్రదేశాల్లో సిగరెట్ తాగుతుంటారు. ఇలాంటి వారిని నియంత్రించేందుకు కేంద్ర ప్రభుత్వం సిగరెట్స్ అండ్ అదర్ టొబాకో ప్రోడక్ట్స్ యాక్ట్ - 2023 (కోట్పా) తెచ్చింది. దీని ప్రకారం బహిరంగ స్థలాల్లో ధూమపానం. నిబంధనలు ఉల్లంఘించి పొగాకు ఉత్పత్తుల విక్రయించే వారిపై పోలీసులు కేసులు నమోదు చేయవచ్చు. అలాగే జరిమానాలు కూడా విధించవచ్చు. ఇప్పటికే పెందుర్తి పోలీసులు పొగరాయుళ్లపై ఈ యాక్ట్ కింద కేసులు నమోదు చేస్తున్నారు. ఇందుకోసం ప్రత్యేక డ్రైవ్ కూడా నిర్వహిస్తున్నారు.

ఇక కోట్పా యాక్ట్ ప్రకారం ఎవరైనా బహిరంగ ప్రదేశాల్లో సిగరెట్, బీడీ వంటివి తాగితే రూ.200 జరిమానా విధించవచ్చు. అలాగే థియేటర్లు, బార్లు, రెస్టారెంట్లు, బస్టాండులు, దుకాణాలు వంటి బహిరంగ ప్రదేశాల్లో ధూమపానం చేయకూడదు. 18 ఏళ్లలోపు వారికి సిగరెట్ల వంటి పొగాకు ఉత్పత్తులు అమ్మకూడదు.

పాఠశాలలకు 100 గజాల బయటే సిగరెట్ వంటి పొగాకు ఉత్పత్తులు అమ్మేందుకు వీలుంది. వంద గజాల లోపు అమ్మకం, వాడకం పూర్తిగా నిషిద్ధం. ఒకవేళ పదే పదే నిబంధనలు అతిక్రమిస్తుంటే బీఎన్ఎస్ చట్టం ప్రకారం వారిపై కఠిన చర్యలు తీసుకునే అవకాశం ఉంది. ఈ నేపథ్యంలో పొగరాయుళ్లు బహిరంగ ప్రదేశాల్లో దమ్ముకొడితే చిక్కులు తప్పవంటున్నారు పోలీసులు.