ట్రెండింగ్
Epaper    English    தமிழ்

తర్వాతి మ్యాచ్‌లలో నేనేంటో చూపిస్తా.. ప్రసిద్ధ్ కృష్ణ

sports |  Suryaa Desk  | Published : Sat, Jun 28, 2025, 10:46 PM

ఎన్నో అంచనాలతో ఇంగ్లాండ్‌తో తొలి టెస్టు మ్యాచ్‌ బరిలోకి దిగిన భారత పేసర్ ప్రసిద్ధ్ కృష్ణ నిరాశపరిచాడు. మహమ్మద్ షమీ లాంటి పేసర్ స్థానాన్ని భర్తీ చేసేందుకు తుది జట్టులోకి వచ్చిన అతడు.. ధారాళంగా పరుగులు సమర్పించుకున్నాడు. ఆశించిన మేర రాణించక.. జట్టు ఓటమికి తానూ ఓ కారణమయ్యాడు. ఈ నేపథ్యంలో తొలి టెస్టు ప్రదర్శనపై అతడు స్పందించాడు. రెండో టెస్టుకు ముందు మీడియాతో మాట్లాడిన ప్రసిద్ధ్.. తొలి టెస్టులో తాను సరిగ్గా బౌలింగ్ చేయలేదని అంగీకరించాడు. అయితే మెరుగైన ప్రదర్శన ఇచ్చేందుకు ప్రయత్నిస్తానని చెప్పాడు.


ఇంగ్లాండ్‌తో తొలి టెస్టులో ప్రసిద్ధ్ కృష్ణ వికెట్లు పడగొట్టినా భారీగా పరుగులు ఇచ్చాడు. తొలి ఇన్నింగ్స్‌లో 20 ఓవర్లు వేసిన అతడు.. ఏకంగా 128 పరుగులు సమర్పించుకున్నాడు. మూడు వికెట్లు తీశాడు. ఇక రెండో ఇన్నింగ్స్‌లో 15 ఓవర్లు వేసి 92 పరుగులు ఇచ్చాడు. రెండు వికెట్లు తీశాడు. మొత్తంగా ఈ టెస్టులో 35 ఓవర్లలో 6.28 ఎకానమీతో 220 రన్స్‌ ఇచ్చాడు. దీంతో అతడిపై విమర్శలు వచ్చాయి.


తొలి టెస్టులో తన ప్రదర్శనతో ప్రసిద్ధ్ మాట్లాడుతూ


“ఇంగ్లాండ్‌తో తొలి టెస్టు తొలి ఇన్నింగ్స్‌లో నేను అనుకున్నట్లుగా బౌలింగ్ చేయలేదు. రెండో ఇన్నింగ్స్‌లో పిచ్ నెమ్మదించడంతో నా బౌలింగ్ కాస్త మెరుగైంది. నేను అనుకున్న విధంగా సరైన లెంగ్త్‌లో బౌలింగ్ చేయలేదు. పిచ్‌ను అర్థం చేసుకోవడానికి టైమ్ పట్టింది. ఒక ప్రొఫెషనల్‌గా నేను నా లోపాలను అధిగమించగలను. ఈ విషయంలో నేనే పూర్తి బాధ్యత తీసుకుంటాను. వచ్చే మ్యాచ్‌లలో మెరుగ్గా బౌలింగ్ చేయడానికి ప్రయత్నిస్తా. పరుగులు నియంత్రించాలని చూస్తా. బ్యాటర్లపై ఒత్తిడి పెంచేలా బంతులు సంధించాలని చూస్తా” అని ప్రసిద్ధ్ కృష్ణ అన్నాడు.


తొలి టెస్టులో భారత్ 5 వికెట్ల తేడాతో పరాజయం పాలైంది. దీంతో ఐదు మ్యాచ్‌ల సిరీస్‌ 0-1తో వెనకబడిపోయింది. రెండో టెస్టు జులై 2 నుంచి ప్రారంభం కానుంది. తొలి టెస్టులో విఫలమైన ప్రసిద్ధ్ కృష్ణను తుది జట్టు నుంచి తప్పించి.. ఆకాశ్ దీప్‌ను తీసుకునే అవకాశం ఉందని తెలుస్తోంది.






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. Suryaa.com and Epaper Suryaa