మాతో అణు ఒప్పందం కుదరాలంటే ట్రంప్ ఆ పని చేయాల్సిందే..: ఇరాన్

అమెరికా అధ్యక్షుడు డొనాల్డ్ ట్రంప్, ఇరాన్ అత్యున్నత నాయకుడు అయతుల్లా అలీ ఖమేనీ మధ్య మాటల యుద్ధం ఉద్రిక్తంగా కొనసాగుతోంది. ఇరాన్‌తో అణు ఒప్పందం కుదుర్చుకోవాలని ట్రంప్ నిజంగా కోరుకుంటే.. ఖమేనీ పట్ల అసభ్యకరమైన, అగౌరవమైన ధోరణిని మానుకోవాలని ఇరాన్ స్పష్టం చేసింది.

ఖమేనీ హత్యకు గురికాకుండా రక్షించామని, ఆయన కృతజ్ఞత లేనివాడని ఆరోపిస్తూ ట్రంప్ తన ట్రూత్ సోషల్‌లో ఓ పోస్టు పెట్టారు. ఇరాన్‌లో ఖమేనీ ఎక్కడ దాక్కున్నారో తనకు కచ్చితంగా తెలుసునని, ప్రపంచంలోనే అత్యంత శక్తిమంతమైన అమెరికా, ఇజ్రాయెల్ దళాల చేతుల్లో ఖమేనీ జీవితం ముగియకుండా తాను నిలువరించానని వివరించారు. ఖమేనీని ఘోరమైన చావు నుంచి తానే రక్షించానంటూ ట్రంప్ తన పోస్టులో పేర్కొన్నారు. ఇంత చేసినా ఖమేనీ తనకు ధన్యవాదాలు కూడా తెలుపలేదంటూ రాసుకొచ్చారు. అమెరికా మూడు కీలక అణు కేంద్రాలపై బాంబులతో దాడి చేయడంతో ఆ దేశ అణు కార్యక్రమానికి తీవ్ర నష్టం వాటిల్లిందని ఆయన పేర్కొన్నారు. అయితే ఇజ్రాయెల్, అమెరికాతో పోరులో ఇరాన్‌దే విజయమంటూ ఖమేనీ ఒక టీవీ ప్రసంగంలో చేసిన వ్యాఖ్యలకు ప్రతిస్పందగా ట్రంప్ ఈ వ్యాఖ్యలు చేశారు.

ఖమేనీని ఉద్దేశిస్తూ ట్రంప్ చేసిన పోస్టుపై ఇరాన్ విదేశాంగ మంత్రి అరాగ్చీ స్పందించారు. ఖమేనీని ట్రంప్ అగౌరవంగా సంబోధించడాన్ని ఆయన తీవ్రంగా ఖండించారు. ట్రంప్‌కు అణు ఒప్పందం కావాలంటే.. ఆయన ఇరాన్ అత్యున్నత నాయకుడు, సుప్రీం లీడర్ అయతుల్లా ఖమేనీ పట్ల అసహ్యకరమైన, ఆమోదయోగ్యం కాని వైఖరిని విడిచిపెట్టాలని అన్నారు. ఖమేనీని హృదయ పూర్వకంగా ఆరాధించే లక్షలాది మంది అనుచరుల మనసులను గాయపరచడం ఆపాలని సామాజిక మాధ్యమం 'ఎక్స్' వేదికగా పోస్టు పెట్టారు.

ఇరాన్-ఇజ్రాయెల్ సైనిక ఘర్షణ గురించి అరాగ్చీ మాట్లాడుతూ.. "మా క్షిపణులకు భయపడి ఇజ్రాయెల్ పాలన 'తండ్రి' సహాయం కోసం పరుగులు తీసిందని ప్రపంచానికి చూపించింది. గొప్ప శక్తివంతమైన ఇరానియన్ ప్రజలు బెదిరింపులు, అవమానాలను తేలికగా తీసుకోరు. భ్రమలు మరింత పెద్ద తప్పులకు దారితీస్తే, ఇరాన్ తన నిజమైన సామర్థ్యాలను బహిర్గతం చేయడానికి వెనుకాడదు" అని ఆయన హెచ్చరించారు. మరోవైపు ట్రంప్ తన ప్రకటనలలో ఇరాన్‌పై ఆంక్షలను ఎత్తివేసే విషయాన్ని తాను ఇటీవల పరిశీలించానని తెలిపారు. అయినా, తనపై కోపం, ద్వేషంతో కూడిన ప్రకటనలు వస్తూనే ఉన్నాయని, అందుకే ఆంక్షల నుంచి ఉపశమనం కలిగించే విషయాన్ని విరమించుకున్నానని వెల్లడించారు.