చైనా సైన్యానికి సరికొత్త ఆయుధం.. దోమ సైజులో డ్రోన్

పొరుగు దేశాలతో తరచూ కవ్వింపులు పెట్టుకునే చైనా.. తన ఆయుధ, సైనిక శక్తిని ఎప్పటికప్పుడు పెంచుకుంటూనేఉంది. సైన్యానికి అత్యాధునిక ఆయుధాలను ఎప్పటికప్పుడు సమకూర్చుతోంది. ఈ నేపథ్యంలోనే తాజాగా తమ సైన్యం కోసం చైనా సరికొత్త డ్రోన్లను తయారు చేసింది. ఈ డ్రోన్లను కేవలం చిన్నగా దోమల అంత సైజులో ఉండేలా తయారు చేసింది. హునాన్ ప్రావిన్స్‌లోని నేషనల్ యూనివర్శిటీ ఆఫ్ డిఫెన్స్ టెక్నాలజీ ఈ డ్రోన్‌లను రూపొందించింది. ఇవి గూఢచర్యం చేయడానికి, నిఘా వేయడానికి ఉపయోగపడతాయని సంబంధిత వర్గాలు తెలిపాయి.చిన్నగా ఉండటం వల్ల వీటిని ప్రత్యర్థులు గుర్తించడం చాలా కష్టం. భవిష్యత్తులో యుద్ధ వ్యూహాల్లో ఇవి కీలక పాత్ర పోషిస్తాయని నిపుణులు భావిస్తున్నారు.

చైనా సెంట్రల్ టెలివిజన్ సైనిక ఛానెల్‌లో ఈ డ్రోన్‌లను చూపించారు. నేషనల్ యూనివర్శిటీ ఆఫ్ డిఫెన్స్ టెక్నాలజీ స్టూడెంట్లియాంగ్ హెక్సియాంగ్.. ఈ డ్రోన్ గురించి వివరించారు. ఆ డ్రోన్ ఒక దోమ లాంటి రోబోట్ అని.. ఇలాంటి సూక్ష్మ బయోనిక్ రోబోట్‌లు యుద్ధం సమయంలో సమాచార నిఘా, ప్రత్యేక మిషన్లకు చాలా అనుకూలంగా ఉంటాయని ఆ స్టూడెంట్ వెల్లడించారు. అంటే.. ఈ డ్రోన్లు యుద్ధంలో సమాచారాన్ని సేకరించడానికి.. ప్రత్యర్థుల కదలికలపై కన్నేసి ఉంచడానికి సహా ప్రత్యేక పనుల కోసం బాగా ఉపయోగపడతాయని తెలిపారు.

ఈ మైక్రో డ్రోన్‌ల వల్ల చాలా ఉపయోగాలు ఉన్నాయని నిపుణులు వెల్లడిస్తున్నారు. ఈ డ్రోన్లను నిఘా కోసం వాడుకోవచ్చని చెబుతున్నారు. శత్రువులకు తెలియకుండానే వారిపై నిఘా వేసే అవకాశం ఉంటుంది. అంతేకాకుండా ఏదైనా ప్రమాదం జరిగినప్పుడు శిథిలాల కింద చిక్కుకున్న వారిని గుర్తించడానికి కూడా ఈ మినీ డ్రోన్లు ఉపయోగపడతాయి. గాలి, నీటి నాణ్యతను తెలుసుకోవడానికి కూడా ఈ డ్రోన్లను వినియోగించవచ్చు.

అయితే.. ఈ డ్రోన్‌లను వినియోగించడానికి కొన్ని సమస్యలు కూడా ఉన్నాయి. వీటికి బరువు మోసే సామర్థ్యం చాలా తక్కువగా ఉంటుంది. దీనివల్ల ఎక్కువ సెన్సార్లను, పరికరాలను మోయలేవని నిపుణులు పేర్కొంటున్నారు. అంతేకాకుండా ఈ డ్రోన్ల బ్యాటరీ చిన్నదిగా ఉండటం వల్ల తక్కువ సమయం మాత్రమే గాల్లో ఎగరగలవు. బ్యాటరీ సామర్థ్యాన్ని పెంచడం, కొత్త సెన్సార్లను ఉపయోగించడం, ఆర్టిఫిషియల్ ఇంటెలిజెన్స్ వంటి వాటిలో మార్పులు చేయడం ద్వారా ఈ డ్రోన్‌ల సామర్థ్యాన్ని మరింత పెంచవచ్చని నిపుణులు సూచిస్తున్నారు. ఈ డ్రోన్‌లు భవిష్యత్తులో యుద్ధాల్లో చాలా కీలకం కానున్నాయని పేర్కొంటున్నారు.