పోప్ పదవిని కూడా తిరస్కరించి, అజ్ఞాతంలోకి

క్రైస్తవ మతపెద్ద పోప్‌ ఫ్రాన్సిస్‌ తుదిశ్వాస విడిచారు. ఆయన మరణ వార్త ఇప్పుడు ప్రపంచమంతా చర్చనీయాంశం అవ్వడానికి ఆయన పేరు ప్రఖ్యాతలే కాదు.. ఆయన మరణించి రోజు ప్రత్యేకత కూడా ఓ కారణం. ఈస్టర్ మరుసటి రోజే ఆయన దేవున్ని చేరడం వెనుక దైవ కారణముందని క్రైస్తవులు మరింత బలంగా విశ్వసిస్తున్నారు. గత కొంతకాలంగా శ్వాసకోశ వ్యాధితో బాధపడుతున్న 88 ఏళ్ల పోప్‌ ఫ్రాన్సిస్‌.. సోమవారం కన్నుమూశారు. 1936లో లాటిన్‌ అమెరికా దేశం అర్జెంటీనాలో పోప్‌ ఫ్రాన్సిస్‌ జన్మించారు. ఈయన అసలు పేరు జార్జ్ మారియో బెర్గోగ్లియో. 2013లో ఫ్రాన్సిస్‌ పోప్‌గా బాధ్యతలు చేపట్టారు. ఇక పోప్ మరణవార్తతో.. అసలు పోప్ అంటే ఏమిటీ.. ఆ పదం ఎలా ఉద్భవించిందనే దానితో పాటు పోప్‌కు సంబంధించిన విషయాలపై ఆసక్తి మొదలైంది.

పోప్ అనే పేరు లాటిన్ పదం పాపా నుంచి వచ్చింది. తండ్రి అని దీనర్థం.. గ్రీకు పదం పాప్పాస్ నుంచి పుట్టిందని మరో వాదన. మొదట్లో ఈ పదాన్ని బిషప్‌లను సూచించడానికి ఉపయోగించారు. కానన్ లా ప్రకారం, పెళ్లి కాని బాప్టిజం పొందిన కాథలిక్ పురుషుడు, మతాధికారులు పోప్ పదవి స్వీకరించడానికి అర్హులు. మతాధికారి కాకపోయినా కూడా పోప్ కావటానికి అర్హులేనని ఈ చట్టం చెప్తోంది. ఇక మొదటి పోప్ సెయింట్ పీటర్.. ఆయన పేరునే వాటికన్ సిటీలోని సెయింట్ పీటర్స్ బసిలికాకు పెట్టారు. ఇక పోప్ ఎన్నిక ప్రక్రియ.. 155వ పోప్ అయిన పోప్ నికోలస్ IIతో ప్రారంభమైందని తెలుస్తోంది. పోప్ ఫ్రాన్సిస్ 2013లో ఈ పదవిని స్వీకరించారు. 2000 ఏళ్ల కేథలిక్ చర్చ్ చరిత్రలో పోప్ ఫ్రాన్సిస్ 266వ పోప్.

అయితే క్రైస్తవ సమాజంలో ఇంతటి అత్యున్నత పదవిని కూడా కొంతమంది తిరస్కరించారంటే మీరు నమ్ముతారా.. ఇలాంటి ఘటనలు అరుదుగా చోటుచేసుకున్నాయి. అలా చేసిన మొదటి వ్యక్తి సెయింట్ ఫిలిప్ బెనిజి. 1271లో సెయింట్ ఫిలిప్ బెనిజి పోప్ పదవిని తిరస్కరించారు. మరో పోప్‌ను ఎన్నుకునేవరకూ ఆయన అజ్ఞాతంలో ఉన్నట్లు పలు కథనాలు వెల్లడించాయి. ఇక 16వ శతాబ్దం చివరిలో కూడా ఇలాంటి ఘటన జరిగింది. సెయింట్ ఛార్లెస్ బొరోమియో కూడా పోప్ పదవిని స్వీకరించడానికి ఆసక్తి చూపలేదు. ఇక పోప్‌లుగా ఎన్నికైన తర్వాత వారంతా తమ పేర్లు మార్చుకుంటారు. ఇదో సంప్రదాయం. అలాగే పోప్‌గా ఎన్నిక కాగానే.. మిమ్మల్ని ఏ పేరుతో పిలవాలంటూ వారినే అడుగుతారు.

ఇక మొదటి పోప్‌గా పనిచేసిన సెయింట్ పీటర్ సుదీర్ఘ కాలం పోప్ పదవిలో కొనసాగినట్లు చరిత్ర చెబుతోంది. ఆయన 34 ఏళ్లపాటు ఈ పదవిలో కొనసాగారు. అర్బన్ VII అతి తక్కువ కాలం పోప్‌గా పనిచేశారు. 13 రోజుల పాటు ఈ పదవిలో కొనసాగిన ఆయన 1590 సెప్టెంబర్‌లో మలేరియాతో చనిపోయారు. ఇక అతి పిన్న వయసులో పోప్‌గా ఎన్నికైన ఘనత.. జాన్ XIIకు దక్కుంది. 18 ఏళ్ల వయసు ఉన్నప్పుడే ఆయన ఈ పదవిని అలంకరించారు. ఇక పోప్‌లు ధరించే దుస్తులను రోమ్‌లోని గమ్మరెల్లి కుటుంబానికి చెందిన టైలర్లు రూపొందిస్తారు. నూతన పోప్ కోసం స్మాల్, మీడియం, లార్జ్ సైజులలో వీరు దుస్తులు తయారు చేస్తారు. కొత్త పోప్ ఎన్నిక కాగానే వీటిని వారికి అందిస్తారు.