మున్సిపల్‌ ఎన్నికల రిజర్వేషన్ల జాబితా ప్రకటన

తెలంగాణలో మున్సిపల్ ఎన్నికల నగారా మోగడానికి రంగం సిద్ధమైంది. రాష్ట్రంలోని మున్సిపల్ కార్పొరేషన్ల మేయర్లు, మున్సిపాలిటీల చైర్‌పర్సన్ల పదవులకు సంబంధించిన రిజర్వేషన్లను ప్రభుత్వం శనివారం అధికారికంగా ఖరారు చేసింది. మున్సిపల్ పరిపాలన శాఖ డైరెక్టర్ శ్రీదేవి ఈ మేరకు వివరాలను వెల్లడించారు. సామాజిక సమీకరణాలు, జనాభా ప్రాతిపదికన ఎస్టీ, ఎస్సీ రిజర్వేషన్లను ముందుగా నిర్ణయించి.. అనంతరం లాటరీ పద్ధతిలో మహిళలకు.. బీసీలకు స్థానాలను కేటాయించారు.

మహిళలకు సగం పీఠాలు..

రాష్ట్రవ్యాప్తంగా ఉన్న కార్పొరేషన్లు, మున్సిపాలిటీలలో మహిళా సాధికారతకు పెద్దపీట వేస్తూ 50 శాతం పదవులను వారికే కేటాయించారు. మొత్తం 10 కార్పొరేషన్లలో 5 మేయర్ పీఠాలను మహిళలు అధిరోహించనున్నారు. ముఖ్యంగా గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) మేయర్ పదవిని జనరల్ మహిళకు కేటాయించడం విశేషం.

కార్పొరేషన్ల వారీగా మేయర్ రిజర్వేషన్లు..

ప్రభుత్వం విడుదల చేసిన జాబితా ప్రకారం పది కార్పొరేషన్ల రిజర్వేషన్లు ఇలా ఉన్నాయి.

గ్రేటర్ హైదరాబాద్ (జీహెచ్‌ఎంసీ): మహిళా జనరల్

ఖమ్మం: మహిళా జనరల్

నల్గొండ: మహిళా జనరల్

నిజామాబాద్: మహిళా జనరల్

మహబూబ్‌నగర్: బీసీ మహిళ

కొత్తగూడెం: ఎస్టీ జనరల్

రామగుండం: ఎస్సీ జనరల్

మంచిర్యాల: బీసీ జనరల్

కరీంనగర్: బీసీ జనరల్

గ్రేటర్ వరంగల్: జనరల్ (అన్‌రిజర్వుడ్)

మున్సిపాలిటీల కేటాయింపులు..

రాష్ట్రంలోని 121 మున్సిపాలిటీలలో చైర్మన్ పదవులకు కూడా స్పష్టత వచ్చింది. వీటిలో 5 స్థానాలను ఎస్టీలకు, 17 స్థానాలను ఎస్సీలకు కేటాయించారు. వెనుకబడిన తరగతులకు (బీసీ) మొత్తం 38 పీఠాలు దక్కగా అందులో.. 19 స్థానాలను బీసీ మహిళలకు కేటాయించారు. మిగిలిన స్థానాలను జనరల్ కేటగిరీ కింద ఉంచారు.

ఎన్నికల సంఘం ఇప్పటికే ఓటర్ల తుది జాబితాను సిద్ధం చేసింది. రాష్ట్రంలోని పట్టణ స్థానిక సంస్థల్లో మొత్తం 52.43 లక్షల మంది ఓటర్లు ఉండగా.. అందులో పురుషుల కంటే మహిళా ఓటర్లే అధికంగా ఉన్నారు. నిజామాబాద్ కార్పొరేషన్ అత్యధిక ఓటర్లతో మొదటి స్థానంలో ఉండగా.. కొత్తగూడెం తక్కువ ఓటర్లను కలిగి ఉంది. గడువు ముగిసిన 117 మున్సిపాలిటీలు, 6 కార్పొరేషన్లకు త్వరలోనే ఎన్నికల నోటిఫికేషన్ వెలువడే అవకాశం ఉంది. రిజర్వేషన్లు ఖరారు కావడంతో రాజకీయ పార్టీలు అభ్యర్థుల ఎంపికపై కసరత్తు మొదలుపెట్టాయి.