నామినేషన్ రిజెక్ట్ కాకూడదా? అభ్యర్థులు తప్పనిసరిగా పాటించాల్సిన 6 కీలక నియమాలు!

జగిత్యాల జిల్లాలో రానున్న గ్రామ పంచాయతీ ఎన్నికల సందడి మొదలైంది. ఈసారి అధికారులు అభ్యర్థులకు కొత్తగా కొన్ని కఠిన నియమాలు అమలు చేస్తున్నారు. చిన్న తప్పిదం వల్ల కూడా నామినేషన్ రిజెక్ట్ అయ్యే పరిస్థితి ఏర్పడుతుందని రిటర్నింగ్ అధికారులు హెచ్చరిస్తున్నారు. ముఖ్యంగా గత ఎన్నికల్లో అనేక మంది అభ్యర్థులు సాంకేతిక తప్పిదాలతో నామినేషన్లు కోల్పోయిన నేపథ్యంలో ఈసారి అప్రమత్తత పెంచారు.
అభ్యర్థులు తమ ఎన్నికల ఖర్చుల కోసం ప్రత్యేకంగా కొత్త బ్యాంకు ఖాతా తెరవాల్సి ఉంటుంది. ఇది తప్పనిసరి నియమం కాగా, పాత ఖాతాలు లేదా ఇతరుల ఖాతాలు ఉపయోగించరాదు. అలాగే అఫిడవిట్‌లో ఆస్తులు, అప్పులు, క్రిమినల్ కేసులు, విద్యార్హతలు వంటి అన్ని వివరాలు స్పష్టంగా, పూర్తిగా నమోదు చేయాలి. ఒక్క ఖాళీ కాలమ్ ఉన్నా నామినేషన్ తిరస్కరణకు దారి తీస్తుందని అధికారులు హెచ్చరిస్తున్నారు.
నామినేషన్ ఫారాలు కేవలం గ్రామ పంచాయతీ కార్యాలయం నుంచి మాత్రమే ఒరిజినల్‌గా తీసుకోవాలి. జిరాక్స్ కాపీలు, డౌన్‌లోడ్ చేసిన ఫారాలు, ఫోటోషాప్‌లో మార్చినవి ఎట్టి పరిస్థితుల్లో ఆమోదించబడవని స్పష్టం చేశారు. అలాగే వార్డు సభ్యుడిగా పోటీ చేసే అభ్యర్థికి తప్పనిసరిగా ఒక ప్రపోజర్ (సమర్పకుడు) ఉండాలి. ఈ నియమాలను అతిక్రమిస్తే స్క్రూటినీ సమయంలోనే నామినేషన్ రద్దు చేయబడుతుంది.
పోస్టర్లు, బ్యానర్లు, సభలు, లౌడ్‌స్పీకర్ల వినియోగం కోసం ముందుగానే అనుమతి తీసుకోవాల్సి ఉంటుంది. ఈ అనుమతుల కోసం సంబంధిత మండల తహశీల్దార్ కార్యాలయాన్ని సంప్రదించాలి. నామినేషన్ రిజెక్ట్ అయితే అప్పీల్ వేయాలనుకుంటే ఆర్‌డీఓ (రెవెన్యూ డివిజనల్ ఆఫీసర్)ను ఆశ్రయించవచ్చు. అధికారులు అందరూ ఒక్కటే సూచన చేస్తున్నారు – “చిన్న తప్పిదం పెద్ద నష్టం చేయొచ్చు, అప్రమత్తంగా ఉండండి!”