హైదరాబాద్‌లో 9,292 ఎకరాల పరిశ్రామ భూమి మోజు! ఇక రెసిడెన్షియల్-కమర్షియల్‌కు గ్రీన్ సిగ్నల్

తెలంగాణ ప్రభుత్వం హైదరాబాద్‌లోని ఔటర్ రింగ్ రోడ్డు లోపల మరియు సమీపంలో ఉన్న సుమారు 9,292 ఎకరాల పారిశ్రామిక భూమిని బహుళ వినియోగ జోన్‌లుగా (మల్టీ యూజ్ జోన్స్) మార్చేందుకు అధికారికంగా అనుమతి ఇచ్చింది. ఇందులో 4,740 ఎకరాల ప్లాటెడ్ ఏరియా కూడా ఉంది. ఇకపై ఈ భూముల్లో కేవలం ఫ్యాక్టరీలు, వర్క్‌షాపులు మాత్రమే కాకుండా రెసిడెన్షియల్ ఫ్లాట్లు, కమర్షియల్ కాంప్లెక్స్‌లు, షాపింగ్ మాల్స్ వంటివి కూడా నిర్మించుకోవచ్చు. ఈ నిర్ణయం నగరంలోని భూమి వినియోగంలో పెద్ద మలుపు తిరుగుతుందని నిపుణులు అంచనా వేస్తున్నారు.
పరిశ్రమలు, వాణిజ్య శాఖ ప్రత్యేక ప్రధాన కార్యదర్శి సంజయ్ కుమార్ ఈ మేరకు జీవో విడుదల చేశారు. నాచారం ఐడీఏ, మల్లాపూర్, చర్లపల్లి, కూకట్‌పల్లి, జీడిమెట్ల, బాలానగర్, సనత్‌నగర్, పటాన్‌చెరు, కాటేదాన్, హయత్‌నగర్, చందూలాల్ బారాదరి తదితర ప్రముఖ పారిశ్రామిక ఏరియాలు ఈ కొత్త జోన్ పరిధిలోకి వస్తున్నాయి. గతంలో ఈ భూములు కేవలం పరిశ్రామిక అవసరాలకే పరిమితమై ఉంటే, ఇప్పుడు డెవలపర్లకు భారీ అవకాశం లభించనుంది.
ఈ మార్పు కోసం వన్ టైమ్ డెవలప్‌మెంట్ ఇంపాక్ట్ ఫీజు (డీఐఎఫ్) చెల్లించాల్సి ఉంటుంది. ప్లాట్ 80 అడుగుల కంటే తక్కువ రోడ్డును ఎదుర్కొంటే ప్రస్తుత మార్కెట్ వాల్యూ ఆధారంగా 30 శాతం, 80 అడుగులు లేదా అంతకంటే ఎక్కువ రోడ్డును ఎదుర్కొంటే 50 శాతం వరకు ఫీజు వసూలు చేస్తారు. దరఖాస్తు సమయంలో 20 శాతం ముందస్తుగా, మిగిలిన 80 శాతం 45 రోజుల్లో రెండు వాయిదాల్లో చెల్లించాలి. ఆలస్యమైతే నెలకు 1 శాతం జరిమానా, గడువు దాటితే దరఖాస్తు రద్దు చేస్తారు.
దరఖాస్తులను టీజీ-ఐపాస్ ద్వారా ఆన్‌లైన్‌లో సమర్పించాలి. తెలంగాణ పారిశ్రామిక మౌళిక సదుపాయాల కార్పొరేషన్ (టీజీఐఐసీ) నోడల్ ఏజెన్సీగా పనిచేస్తుంది. వారం రోజుల్లో ప్రాథమిక పరిశీలన, మరో ఏడు రోజుల్లో తుది ఆమోదం లభిస్తుంది. ఈ పథకం కింద దరఖాస్తులకు కేవలం ఆరు నెలలే గడువు (సన్‌సెట్ క్లాజ్). ఈ అవకాశాన్ని సద్వినియోగం చేసుకుంటే హైదరాబాద్‌లో రియల్ ఎస్టేట్, వాణిజ్య రంగాలు కొత్త ఊపిరి పీల్చుకునే అవకాశం ఉంది.