“TG రైజింగ్-2047”: ఫ్యూచర్ సిటీలో గ్లోబల్ దిగ్గజాల సమ్మిట్… తెలంగాణ కలల బ్లూప్రింట్ ఆవిష్కరణ!

డిసెంబర్ 8, 9 తేదీల్లో హైదరాబాద్ ఫ్యూచర్ సిటీలో తెలంగాణ ప్రభుత్వం నిర్వహించబోతున్న గ్లోబల్ ఇన్వెస్టర్ సమ్మిట్‌కు ప్రపంచవ్యాప్తంగా 2 వేల మంది ప్రముఖ వ్యాపారవేత్తలు, పారిశ్రామికవేత్తలు హాజరుకానున్నారు. ఈ మహా సమావేశం రాష్ట్రానికి కొత్త ఒరవడిని తెచ్చిపెట్టే అతిపెద్ద వేదికగా మారనుంది. ఈ సందర్భంగా తెలంగాణ భవిష్యత్తు లక్ష్యాలను, 2047 నాటికి రాష్ట్రం ఎలాంటి ఆర్థిక శిఖరాన్ని అధిరోహించాలనే దీర్ఘకాలిక దృష్టిని వివరించే ప్రతిష్ఠాత్మక డాక్యుమెంట్ “TG రైజింగ్-2047”ను ప్రభుత్వం అధికారికంగా ఆవిష్కరించనుంది.
ఈ డాక్యుమెంట్ రాష్ట్ర బ్రాండ్ ఇమేజ్‌ను ప్రపంచస్థాయిలో ఎగరేసి, భారీ ఎత్తున పెట్టుబడులను ఆకర్షించే మాస్టర్ ప్లాన్‌గా రూపొందుతోంది. ఇందులో ఇన్ఫ్రాస్ట్రక్చర్, టెక్నాలజీ, గ్రీన్ ఎనర్జీ, స్టార్టప్ ఎకోసిస్టమ్, స్కిల్ డెవలప్‌మెంట్ వంటి అన్ని రంగాలకు సంబంధించిన స్పష్టమైన రోడ్‌మ్యాప్ ఉంటుందని తెలుస్తోంది. ఈ దస్తావేజు కేవలం ప్రకటన మాత్రమే కాదు… తెలంగాణను భారత్‌లోనే అత్యంత వేగంగా అభివృద్ధి చెందే రాష్ట్రంగా మార్చే బ్లూప్రింట్ అవుతుందన్నది ప్రభుత్వ వర్గాల ధీమా.
డాక్యుమెంట్‌కు తుది మెరుగులు దిద్దే ప్రక్రియ ఈ నెల 25వ తేదీ నుంచి మొదలుకానుంది. ముఖ్యమంత్రి రేవంత్ రెడ్డి స్వయంగా అన్ని శాఖలతో విస్తృత సమీక్షలు నిర్వహించి, ప్రతి లక్ష్యం ఆచరణీయంగా, కొలిచే విధంగా ఉండేలా చూడనున్నారు. గతంలో ఎన్నడూ లేని విధంగా ప్రతి జిల్లా, ప్రతి రంగంలోనూ సమతుల్య అభివృద్ధిని ఈ దస్తావేజు లక్ష్యంగా పెట్టుకున్నట్లు సమాచారం.
ఈ గ్లోబల్ సమ్మిట్ ద్వారా తెలంగాణ “ఇన్వెస్టర్స్ ఫేవరెట్ డెస్టినేషన్”గా మారనుందని ప్రభుత్వం ఆత్మవిశ్వాసంగా చెబుతోంది. “TG రైజింగ్-2047” డాక్యుమెంట్ ఆవిష్కరణతో రాష్ట్రం కొత్త యుగంలో అడుగుపెట్టబోతోందని, ఇది తెలంగాణ చరిత్రలో మైలురాయిగా నిలవబోతుందని అధికార వర్గాలు ధీమా వ్యక్తం చేస్తున్నాయి.