నకిలీ కానిస్టేబుల్ అవతారం ఎత్తిన డిగ్రీ విద్యార్థిని

తెలంగాణ రాజధాని హైదరాబాద్‌లో అత్యంత ఆశ్చర్యకరమైన సంఘటన వెలుగులోకి వచ్చింది. అసలు పోలీస్ ఉద్యోగమే దక్కకపోయినా.. ఒక యువతి కొన్ని నెలల పాటు నకిలీ లేడీ కానిస్టేబుల్‌గా చక్కా తిరిగింది. అంతేకాక... అత్యంత కీలకమైన సచివాలయం సమావేశాలకు, వీఐపీ కార్యక్రమాలకు కూడా హాజరై విధులు నిర్వహించినట్లు నమ్మించింది. ఈ నకిలీ ఖాకీ వ్యవహారం నవంబర్ 21వ తేదీన బట్టబయలైంది.

పోలీసులు అందించిన వివరాల ప్రకారం.. మేడ్చల్ జిల్లా, జీడిమెట్ల పోలీస్ స్టేషన్ పరిధిలోని ఉమాభారతి (21) అనే యువతి ఈ నేరానికి పాల్పడింది. షాపూర్ నగర్‌కు చెందిన ఈ యువతి డిగ్రీ ద్వితీయ సంవత్సరం చదువుతున్నట్లు గుర్తించారు. కానిస్టేబుల్ ఉద్యోగం సాధించాలనే కోరిక (ప్యాషన్) కారణంగా ఆమె పరీక్షలలో ఉత్తీర్ణత సాధించలేకపోయింది. దీంతో అసలు ఉద్యోగమే లేకున్నా.. ఖాకీ యూనిఫాం కొనుగోలు చేసి, తానూ విధుల్లో ఉన్నట్లుగా నమ్మించింది.

ఉమాభారతి కేవలం డ్రెస్ వేసుకోవడం వరకే పరిమితం కాలేదు. హైదరాబాద్ నగరంలో జరిగిన పలు కీలకమైన, సున్నితమైన కార్యక్రమాలలో ఆమె బందోబస్తు విధులు నిర్వహించినట్లు పోలీసులు విచారణలో గుర్తించారు. ఉదాహరణకు.. ఇటీవల సచివాలయంలో జరిగిన తెలంగాణ తల్లి విగ్రహ ఆవిష్కరణ కార్యక్రమం, ఖైరతాబాద్ గణేష్ ఉత్సవాల ఊరేగింపు వంటి ప్రధాన ఈవెంట్లలో ఆమె పోలీసు సిబ్బందితో కలిసి పనిచేసింది. అంతేకాకుండా.. సైబరాబాద్ పోలీస్ హెడ్‌క్వార్టర్స్‌కు సైతం ధైర్యంగా వెళ్లి, అక్కడి క్యాంటీన్‌లో గడిపి వచ్చిందనే విషయం పోలీసులను ఆశ్చర్యానికి గురిచేసింది.

మరికొన్ని సందర్భాల్లో.. ఉమాభారతి కొన్ని కళాశాలల్లోకి వెళ్లి విద్యార్థులకు ‘సైబర్ నేరాలపై అవగాహన’ పేరుతో లెక్చర్లు కూడా ఇచ్చింది. ఏ అధికారికి లేదా సిబ్బందికి అనుమానం రాకుండా.. ఇన్ని చోట్ల వీఐపీ డ్యూటీలను ఎలా నిర్వహించిందన్న దానిపై పోలీసులు లోతుగా దర్యాప్తు చేస్తున్నారు.

నవంబర్ 21న, ఉమాభారతి సైబరాబాద్ సీపీ ఆఫీస్ క్యాంటీన్‌లో అల్పాహారం చేస్తుండగా.. ఉన్నతాధికారులకు ఆమె ప్రవర్తన, యూనిఫాంపై అనుమానం వచ్చింది. వారు ఆమెను ప్రశ్నించగా, ఆమె పొంతన లేని సమాధానాలు చెప్పింది. దీంతో అసలు విషయం బయటపడింది. వెంటనే యువతిని అదుపులోకి తీసుకున్న మాదాపూర్ పోలీసులు విచారణ నిమిత్తం కేసును జీడిమెట్ల పోలీసులకు అప్పగించారు.

పోలీసులపై ఉన్న మోజుతో చేసిన ఈ సాహసం, చివరికి ఉమాభారతిని కటకటాల పాలు చేసింది. ప్రభుత్వానికి సంబంధించిన అత్యంత సున్నితమైన ప్రాంతాలలో నకిలీ అధికారిణి తిరగడం అనేది భద్రతా లోపాలను కూడా ఎత్తి చూపుతోంది. పోలీసులు ఆమెపై కేసు నమోదు చేసి, ఆమెకు ఎవరైనా సహకరించారా..? లేదా ఏమైనా దురుద్దేశాలు ఉన్నాయా అనే కోణంలో దర్యాప్తు కొనసాగిస్తున్నారు.