రేషన్ షాపుల్లో బియ్యంతో పాటు ఉచిత ‘మల్టీపర్పస్ బ్యాగ్’..!

తెలంగాణ రాష్ట్ర ప్రభుత్వం రేషన్ కార్డుదారులకు బంపర్ ఆఫర్ ప్రకటించింది. డిసెంబర్ నెల నుంచి ప్రతి రేషన్ షాపులో సన్న బియ్యం సరఫరాతో పాటు మల్టీపర్పస్ బ్యాగులను కూడా పూర్తిగా ఉచితంగా అందజేయనుంది. ఈ నిర్ణయం లక్షలాది కుటుంబాలకు ఒకేసారి ఆర్థిక భారం తగ్గడమే కాకుండా, పర్యావరణ పరిరక్షణలో కూడా మైలురాయిగా నిలుస్తుందని అధికారులు తెలిపారు.
ప్లాస్టిక్ కవర్ల వినియోగాన్ని దాదాపు పూర్తిగా తగ్గించే లక్ష్యంతోనే ఈ కొత్త పథకాన్ని రూపొందించినట్లు పౌర సరఫరాల శాఖ వెల్లడించింది. ఈ బ్యాగులు దీర్ఘకాలం మన్నే నాణ్యతతో తయారు చేయగా, ఒకేసారి బియ్యం తీసుకెళ్లడమే కాకుండా ఇంటి ఇతర అవసరాలకు కూడా వినియోగించుకోవచ్చని ప్రభుత్వం పేర్కొంది. ఇకపై ప్లాస్టిక్ కవర్ల కోసం డబ్బు ఖర్చు చేయాల్సిన అవసరం లేకుండా పోతుంది.
ముఖ్యంగా హైదరాబాద్ మహానగరం మరియు జీహెచ్ఎంసీ పరిధిలోని రేషన్ దుకాణాల్లో ఈ మల్టీపర్పస్ బ్యాగుల్లోనే సన్న బియ్యం ప్యాక్ చేసి లబ్ధిదారులకు అందించనున్నారు. రాష్ట్రవ్యాప్తంగా కూడా దశలవారీగా ఈ విధానాన్ని అమలు చేయనున్నట్లు సమాచారం. ఈ చర్య ద్వారా ప్లాస్టిక్ వ్యర్థాలను గణనీయంగా తగ్గించే అవకాశం ఉందని పర్యావరణ నిపుణులు అభిప్రాయపడుతున్నారు.
ఈ నిర్ణయంతో రేషన్ లబ్ధిదారులు సంతోషం వ్యక్తం చేస్తున్నారు. “బియ్యం ఉచితంగా వస్తుంది, ఇక సంచి కోసం కూడా డబ్బులు ఖర్చు పెట్టనవసరం లేదు” అంటూ మహిళలు ఆనందం వ్యక్తం చేస్తున్నారు. మొత్తంమ్మీద ప్లాస్టిక్ నిషేధం వైపు గట్టి అడుగుతో పాటు ప్రజలకు ఆర్థిక ఉపశమనం కల్పిస్తూ తెలంగాణ ప్రభుత్వం మరో సూపర్ హిట్ పథకాన్ని అందిస్తోంది.