ఈ నెల 10వ తేదీ నుంచి ‘అగ్నివీర్’ రిక్రూట్‌మెంట్ ర్యాలీ

తెలంగాణ రాష్ట్రంలోని నిరుద్యోగ యువతకు ఇండియన్ ఆర్మీ అద్భుతమైన అవకాశం కల్పించింది. దేశ సేవలో భాగం కావాలనుకునే అభ్యర్థుల కోసం అగ్నివీర్ రిక్రూట్‌మెంట్ ర్యాలీని నిర్వహించబోతున్నట్లు ఆర్మీ రిక్రూట్‌మెంట్ బోర్డు ప్రకటించింది. ఈ ర్యాలీకి తెలంగాణలో 33 జిల్లాల అభ్యర్థులు పాల్గొనేందుకు అవకాశం కల్పించారు. తెలంగాణ ప్రభుత్వ సహకారం, చెన్నై జోన్ రిక్రూటింగ్ ఆఫీస్ ఆధ్వర్యంలో ఈ భారీ ర్యాలీనిని ర్వహించనున్నారు. హన్మకొండలోని జవహర్‌లాల్ నెహ్రూ స్టేడియం దీనికి వేదికగా ఉండనుంది. ఈ నెల 10వ తేదీ నుంచి 22వ తేదీ వరకు ఈ నియామక ప్రక్రియ కొనసాగుతుంది.

సికింద్రాబాద్ ఆర్మీ రిక్రూట్‌మెంట్ ఆఫీస్ ఈ ర్యాలీని సమన్వయం చేస్తుంది. ఈ ర్యాలీలో అగ్నివీర్ జనరల్ డ్యూటీ , టెక్నికల్, క్లర్క్/స్టోర్ కీపర్ టెక్నికల్, ట్రేడ్స్‌మెన్ వంటి వివిధ కేటగిరీల కింద అభ్యర్థులను ఎంపిక చేయనున్నారు. వీటిలో కొన్నింటికి పదో తరగతి అర్హత ఉండాలని సూచించారు. అగ్నివీర్ల నియామక ప్రక్రియ అనేది భారత ప్రభుత్వం సాయుధ బలగాలలో విప్లవాత్మక మార్పుల కోసం ప్రవేశపెట్టారు.

ఈ పథకం యువతకు నాలుగు సంవత్సరాల పాటు దేశ సేవ చేసే అవకాశాన్ని ఇస్తుంది. ఎంపికైన అభ్యర్థులు ఆరు నెలల పాటు కఠిన శిక్షణ పొంది.. తదుపరి 3.5 సంవత్సరాలు సైన్యంలో విధులు నిర్వహిస్తారు. వీరికి ఆకర్షణీయమైన జీతంతో పాటు, నాలుగేళ్ల సేవ అనంతరం సుమారు రూ. 11.7 లక్షల విలువ చేసే 'సేవా నిధి' ప్యాకేజీ లభిస్తుంది. నాలుగు సంవత్సరాల తర్వాత.. 25% మంది అగ్నివీరులకు వారి ప్రతిభ ఆధారంగా సాయుధ బలగాలలో శాశ్వత నియామకం పొందే అవకాశం ఉంటుంది. మిగిలిన వారికి ఇతర ప్రభుత్వ ఉద్యోగాలలో ప్రాధాన్యత ఉంటుంది.

ఈ నియామక ప్రక్రియకు సంబంధించిన నోటిఫికేషన్ ఇప్పటికే www.joinindianarmy.nic.in వెబ్‌సైట్‌లో అందుబాటులో ఉంది. నియామక ప్రక్రియ పూర్తి పారదర్శకంగా జరుగుతుందని ఆర్మీ అధికారులు హామీ ఇచ్చారు. అభ్యర్థులు తమకు జారీ చేసిన అడ్మిట్ కార్డుతో పాటు, అవసరమైన అన్ని ధృవీకరణ పత్రాలను తప్పనిసరిగా వెంట తీసుకురావాలి. ఏదైనా సందేహాలు లేదా వివరాల కోసం అభ్యర్థులు సికింద్రాబాద్ ఆర్మీ రిక్రూట్‌మెంట్ కార్యాలయాన్ని 040-27740059, 27740205 నంబర్లలో సంప్రదించవచ్చు.