హాలివుడ్‌ను హైదరాబాద్‌కు తీసుకువస్తా: సీఎం రేవంత్ రెడ్డి

తెలుగు చిత్ర పరిశ్రమ భవిష్యత్తుపై, సినీ కార్మికుల సంక్షేమంపై ముఖ్యమంత్రి రేవంత్ రెడ్డి కీలక ప్రకటనలు చేశారు. మంగళవారం సాయంత్రం హైదరాబాద్‌లోని యూసుఫ్‌గూడ పోలీస్ గ్రౌండ్స్‌లో జరిగిన ఒక కార్యక్రమంలో సినీ కార్మికులు ముఖ్యమంత్రిని ఘనంగా సన్మానించారు. ఈ సందర్భంగా ముఖ్యమంత్రి మాట్లాడుతూ.. తెలుగు సినిమాను ప్రపంచ సినిమాకు కేరాఫ్ అడ్రస్‌గా మారుస్తామని భరోసా ఇచ్చారు.

ముఖ్యమంత్రి రేవంత్ రెడ్డి తెలుగు చిత్ర పరిశ్రమ చరిత్రను గుర్తు చేస్తూ.. పరిశ్రమ అభివృద్ధికి గత నాయకులు చేసిన కృషిని కొనియాడారు. ఒకప్పుడు తెలుగు చిత్ర పరిశ్రమను ‘మదరాసి’ అని పిలిచేవారని.. ఆనాటి ముఖ్యమంత్రి మర్రి చెన్నారెడ్డి ఈ పరిశ్రమను హైదరాబాద్‌కు తరలించడానికి ఎంతో కృషి చేశారని గుర్తుచేశారు. నందమూరి తారక రామారావు, అక్కినేని నాగేశ్వరరావు వంటి దిగ్గజ నటుల సహకారంతోనే పరిశ్రమ హైదరాబాద్‌లో స్థిరపడిందని తెలిపారు.

కళాకారులను ప్రోత్సహించాలనే ఉద్దేశంతోనే తక్కువ ధరకే భూములు ఇచ్చారని.. అలాగే నంది అవార్డుల కార్యక్రమాన్ని 1964లో ప్రారంభించారని గుర్తు చేస్తూ.. చిత్రపురి కాలనీ అభివృద్ధిలో నాటి నాయకుల కృషిని మర్చిపోకూడదని చెప్పారు.

సినీ కార్మికుల సంక్షేమం..

తెలుగు సినిమా నేడు ప్రపంచవ్యాప్తంగా గుర్తింపు పొందుతూ.. ఆస్కార్ స్థాయికి ఎదుగుతోందంటే దాని వెనుక సినీ కార్మికుల కృషి ఎంతో ఉందని సీఎం ప్రశంసించారు. తనకు సినీ కార్మికుల కష్టాలు తెలుసని.. వారిని పట్టించుకోనంత స్థాయికి తాను ఇంకా వెళ్లలేదని ముఖ్యమంత్రి భరోసా ఇచ్చారు. నటుడు ప్రభాకర్ రెడ్డి కార్మికుల కోసం తన సొంత 10 ఎకరాల భూమిని ఇచ్చారని గుర్తు చేసుకున్నారు.

తమ ప్రభుత్వ లక్ష్యం 'ప్రపంచ సినిమాకు హైదరాబాద్ కేరాఫ్ కావాలి' అని స్పష్టం చేశారు. సినీ కార్మికులు అండగా ఉంటే.. హాలీవుడ్‌ను కూడా హైదరాబాద్‌కు తీసుకొస్తామని ఆయన ధైర్యం చెప్పారు. సినీ పరిశ్రమ కోసం ఫ్యూచర్ సిటీలో స్థలాల కేటాయింపు, కార్మికుల పిల్లల కోసం ప్రత్యేక పాఠశాలల నిర్మాణం వంటి కీలక పథకాలు అమలు చేస్తామని హామీ ఇచ్చారు. అలాగే, ప్రజా ప్రభుత్వం అధికారంలోకి వచ్చాక గద్దర్ అవార్డులను ప్రారంభించామని తెలిపారు.