నవంబర్ 3 నుంచి కాలేజీలు బంద్: విద్యార్థులకు అలర్ట్

తెలంగాణ రాష్ట్రంలోని ప్రైవేట్ ఇంజినీరింగ్ మరియు వృత్తి విద్యా కళాశాలల్లో మరోసారి ఆందోళనల వాతావరణం నెలకొన్నది. ఫీజు రీయింబర్స్‌మెంట్ బకాయిల చెల్లింపులో ప్రభుత్వం నిర్లక్ష్యం ప్రదర్శిస్తున్నట్లుగా ప్రైవేట్ కళాశాలల సమాఖ్య ఆరోపిస్తూ, నవంబర్ 3 నుండి రాష్ట్రవ్యాప్తంగా విద్యా సంస్థలను మూసివేయాలని నిర్ణయించింది.
*హామీ ఇచ్చి మాయం అయిన ప్రభుత్వం : కొన్ని వారాల క్రితం, సెప్టెంబర్ 15న జరిగిన బంద్‌కు పిలుపునిచ్చినప్పుడు, ప్రభుత్వం యాజమాన్యాలను చర్చలకు ఆహ్వానించింది. ఆ సమయంలో, రెండు విడతల్లో రూ. 600 కోట్లు చెల్లిస్తామని, మొదటి విడతను తక్షణమే, మిగిలిన మొత్తాన్ని దీపావళి నాటికి విడుదల చేస్తామని హామీ ఇచ్చింది. ఈ హామీ వల్ల తాత్కాలికంగా ఆందోళన తగ్గినప్పటికీ, ఇంకా బకాయిలు చెల్లించకపోవడంతో యాజమాన్యాల్లో తీవ్ర అసంతృప్తి కొనసాగుతోంది.
*ఆర్థిక ఒత్తిడిలో కళాశాలలు : ప్రభుత్వ చెల్లింపుల్లో ఆలస్యం వల్ల, ప్రైవేట్ కళాశాలలు ఆర్థిక ఒత్తిడిని ఎదుర్కొంటున్నాయి. సిబ్బందికి జీతాలు చెల్లించడం, విద్యార్థులకు కనీస సౌకర్యాలు అందించడం ఇబ్బందిగా మారింది అని యాజమాన్యాలు ఆవేదన వ్యక్తం చేస్తున్నారు.
*బంద్‌కు సిద్ధమవుతున్న యాజమాన్యాలు : గతంలో ఇంజినీరింగ్ కళాశాలలు మాత్రమే ఆందోళనలలో పాల్గొన్నారు, కానీ ఈసారి ఇతర వృత్తి విద్యా కళాశాలలు కూడా బంద్‌లో చేరాలని నిర్ణయించాయి. నవంబర్ 1న వివిధ రాజకీయ పార్టీ నాయకులతో సమావేశం కానున్న యాజమాన్యాలు, నవంబర్ 3న బకాయిలు చెల్లించకపోతే రాష్ట్రవ్యాప్తంగా నిరవధిక బంద్ ప్రారంభిస్తామని హెచ్చరించారు.వీరి ప్రకారం, ఫీజు రీయింబర్స్‌మెంట్ పథకంపై ప్రభుత్వం చూపిస్తున్న నిర్లక్ష్యం కొనసాగితే విద్యార్థుల విద్యాభ్యాసం దెబ్బతింటుందని, కళాశాలల మనుగడ ప్రమాదంలో పడతుందని చెప్పుతున్నారు. విద్యార్థుల భవిష్యత్తును దృష్టిలో ఉంచి, ప్రభుత్వం తక్షణమే హామీ ప్రకారం బకాయిలను విడుదల చేయాలని వారు డిమాండ్ చేస్తున్నారు.