'మొంథా' తుఫాను.. పంటల కొనుగోళ్లపై ప్రత్యేక దృష్టి పెట్టండి.. అధికారులకు సీఎం రేవంత్ రెడ్డి ఆదేశం

'మొంథా' తుఫాను ప్రభావంతో రాష్ట్రంలో రేపు, ఎల్లుండి భారీ వర్షాలు కురిసే అవకాశం ఉన్న నేపథ్యంలో తెలంగాణ ముఖ్యమంత్రి రేవంత్ రెడ్డి అధికారులను అప్రమత్తం చేశారు. ప్రజలకు, ముఖ్యంగా రైతులకు ఎటువంటి నష్టం జరగకుండా తక్షణ చర్యలు తీసుకోవాలని ఆయన స్పష్టమైన ఆదేశాలు జారీ చేశారు. ముఖ్యంగా లోతట్టు ప్రాంతాలు, వరద ప్రభావిత ప్రాంతాలపై నిరంతరం పర్యవేక్షణ ఉండాలని, అవసరమైన సహాయక బృందాలను సిద్ధంగా ఉంచాలని సూచించారు.
రైతులకు నష్టం కలగకుండా కొనుగోళ్లు చేపట్టాలి
భారీ వర్షాల అంచనాల దృష్ట్యా, పంటల కొనుగోళ్ల ప్రక్రియపై అధికారులు అత్యంత అప్రమత్తంగా వ్యవహరించాలని ముఖ్యమంత్రి ఆదేశించారు. సీజన్ కావడంతో వరి ధాన్యం, పత్తి, మొక్కజొన్న వంటి పంటల కొనుగోళ్లు వేగంగా జరుగుతున్నాయని, ఈ సమయంలో వర్షం కారణంగా రైతులకు నష్టం కలగకుండా పకడ్బందీ ఏర్పాట్లు చేయాలని సూచించారు. ధాన్యం నిల్వ, రవాణా విషయంలో ప్రత్యేక జాగ్రత్తలు పాటించాలన్నారు.
అధికారులందరూ సమన్వయంతో పనిచేయాలి
వాతావరణ శాఖ సూచనల మేరకు, తుఫాను ప్రభావం ఉన్న ప్రాంతాల్లోని అన్ని ప్రభుత్వ విభాగాలు సమన్వయంతో పనిచేయాలని సీఎం రేవంత్ రెడ్డి ఆదేశించారు. వ్యవసాయ, పౌర సరఫరాలు, రెవెన్యూ, విద్యుత్ శాఖల అధికారులు నిరంతరం సమావేశమై పరిస్థితిని సమీక్షించుకోవాలని చెప్పారు. ప్రతి మండలంలో, జిల్లా కేంద్రంలో సహాయక బృందాలు, కంట్రోల్ రూమ్‌లు అందుబాటులో ఉంచి, రైతులు, ప్రజల నుంచి వచ్చే ఫిర్యాదులపై తక్షణమే స్పందించాలని సూచించారు.
రైతుల సంక్షేమమే ప్రభుత్వ ప్రధాన లక్ష్యమని మరోసారి నొక్కిచెప్పిన ముఖ్యమంత్రి, ఒక్క గింజ కూడా తడవకుండా, రైతులకు ఎలాంటి ఇబ్బంది లేకుండా కొనుగోలు ప్రక్రియను విజయవంతంగా పూర్తి చేయాలని అధికారులకు దిశానిర్దేశం చేశారు. ఈ విషయంలో ఏమాత్రం నిర్లక్ష్యం వహించినా కఠిన చర్యలు తప్పవని హెచ్చరించారు.