తెలంగాణ రాష్ట్రంలో.. రేపే 2,620 మద్యం షాపులకు లక్కీ డ్రా

తెలంగాణ రాష్ట్రంలో మద్యం దుకాణాల నియామక ప్రక్రియ తుది దశకు చేరుకుంది. తెలంగాణ ఎక్సైజ్ శాఖ ఆధ్వర్యంలో రాష్ట్రవ్యాప్తంగా ఉన్న 2,620 మద్యం దుకాణాలకు లక్కీ డ్రా నిర్వహించడానికి అన్ని ఏర్పాట్లు పూర్తయ్యాయి. రేపు ఉదయం 11 గంటలకు జిల్లా కలెక్టర్ల చేతుల మీదుగా ఈ డ్రా ప్రక్రియ జరగనుంది. మద్యం షాపుల డ్రాకు తెలంగాణ హైకోర్టు కూడా అనుమతి ఇవ్వడంతో.. ఈ ప్రక్రియకు ఉన్న అడ్డంకులు తొలగిపోయాయి.

రాష్ట్రవ్యాప్తంగా అంచనాలను మించిన స్పందన..

ఈసారి మద్యం దుకాణాల టెండర్లకు రికార్డు స్థాయిలో దరఖాస్తులు వచ్చాయి. ఇది రాష్ట్ర ప్రభుత్వానికి భారీ ఆదాయాన్ని అందించింది. తెలంగాణ వ్యాప్తంగా ఉన్న 2,620 దుకాణాలకు గాను ఏకంగా 95,137 దరఖాస్తులు వచ్చాయి. ఒక్కో దరఖాస్తుకు ప్రభుత్వం రూ. 3 లక్షల నాన్-రిఫండబుల్ ఫీజును వసూలు చేసింది. ఈ రికార్డు స్థాయి దరఖాస్తుల ద్వారా ప్రభుత్వానికి దాదాపు రూ.2854.11 కోట్లు ఆదాయం వచ్చింది. 2023 సంవత్సరంలో దరఖాస్తు ఫీజు రూ.2 లక్షలు ఉండగా.. లక్షా 32 వేలకుపైగా దరఖాస్తులు వచ్చి రూ.2,640 కోట్లు ఆదాయం వచ్చింది. ఈ సారి దరఖాస్తుల సంఖ్య తగ్గినా ఫీజు ఎక్కువగా ఉండటంతో.. గతం కంటే కూడా ఈసారి అదాయం ఎక్కువగానే సమకూరింది.

జీహెచ్‌ఎంసీ పరిధిలో పోటీ...

హైదరాబాద్ , గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) పరిధిలో పోటీ తీవ్రంగా ఉంది. ఎక్కువ జనాభా, విస్తృత మార్కెట్ కారణంగా ఇక్కడ డిమాండ్ ఎక్కువగా ఉంది. జీహెచ్‌ఎంసీ పరిధిలోని 639 షాపులకు గాను ఏకంగా 34,958 దరఖాస్తులు వచ్చాయి. ఈ దరఖాస్తుల ద్వారా ప్రభుత్వానికి సుమారు రూ. 1,048.74 కోట్ల ఆదాయం లభించింది. హైదరాబాద్ లో 80 లిక్కర్ షాపులకు 3,201 దరఖాస్తులు వచ్చాయి.

సికింద్రాబాద్ ప్రాంతంలోని 99 షాపులకు 3,022 మంది దరఖాస్తు చేసుకున్నారు. కేవలం జంట నగరాల నుంచే రూ. 186.69 కోట్ల ఆదాయం ప్రభుత్వ ఖజానాకు చేరింది. ఎక్కువగా రంగారెడ్డి జిల్లా పరిధిలో మొత్తం 29,420 దరఖాస్తులు రాగా.. అతి తక్కువగా ఆదిలాబాద్ డివిజన్ పరిధిలో వచ్చాయి. ఎక్సైజ్ శాఖ అధికారులు అన్ని జిల్లాల కలెక్టర్ల పర్యవేక్షణలో పారదర్శకతతో లక్కీ డ్రా నిర్వహించి, కొత్త మద్యం దుకాణాల యజమానులను ప్రకటించనున్నారు.