కాలుష్య రహితంగా హైదరాబాద్‌,,,,అండర్ గ్రౌండ్ డ్రైనేజీపై ప్రత్యేక దృష్టి

హైదరాబాద్ మహా నగరంపై ముఖ్యమంత్రి రేవంత్ రెడ్డి ప్రత్యేక దృష్టి సారించారు. కాలుష్య రహిత నగరంగా హైదరాబాద్‌ను తీర్చిదిద్దేందుకు అవసరమైన సంస్కరణలు చేపట్టాలని అధికారులను ఆదేశించారు. హైదరాబాద్ కోర్ సిటీ ఏరియాలో ఉన్న కాలుష్య కారక పరిశ్రమలను ఓఆర్ఆర్ బయటకు తరలించాలని ముఖ్యమంత్రి సూచించారు.

పురపాలక, పట్టణాభివృద్ధి శాఖపై కమాండ్ కంట్రోల్ సెంటర్‌లో మంగళవారం ఉన్నత స్థాయి సమావేశం నిర్వహించారు. కాలుష్య రహిత నగరంగా మార్చే ప్రణాళికలతో పాటు పాతబస్తీ మెట్రో విస్తరణ పనులు, మూసీ రివర్ ఫ్రంట్, మిరాలం ట్యాంక్ ప్రాంతాన్ని పర్యాటకంగా అభివృద్ధి చేయడం వంటి అంశాలపై సీఎం సమీక్షించారు.

ఢిల్లీ, ముంబయి, చెన్నై వంటి నగరాల్లో ప్రజలు కాలుష్యంతో పలు ఇబ్బందులు ఎదుర్కొంటున్నారని.. హైదరాబాద్ నగరంలో అలాంటి పరిస్థితి తలెత్తకూడదన్నారు. నగరాన్ని కాలుష్య రహితంగా మార్చడంతో పాటు 25 ఏళ్ల అవసరాలకు అనుగుణంగా ప్రణాళికలు సిద్ధం చేయాలని సూచించారు. నగరంలో అండర్ గ్రౌండ్ డ్రైనేజీ, అండర్ గ్రౌండ్ కేబులింగ్‌పై ప్రత్యేక దృష్టి సారించాలని ఆయా శాఖల అధికారులను ఆదేశించారు.

సింగిల్ యూజ్ ప్లాస్టిక్‌ను నిషేధించాలని, నిర్మాణ రంగ వ్యర్థాలను సిటీలో ఎక్కడపడితే అక్కడ డంప్ చేయకుండా నిఘా పెట్టాలని అధికారులను ఆదేశించారు. ఎవరైనా ఉద్దేశపూర్వకంగా అలా చేస్తే వారిపై కఠిన చర్యలు తీసుకోవాలన్నారు. హైదరాబాద్ నగరంలో మంచినీటి సరఫరా, మురుగునీటి పారుదల వ్యవస్థను పూర్తిగా సంస్కరించాలని ఆదేశించారు.

ఓఆర్ఆర్ పరిధిలోని వారసత్వ కట్టడాల సంరక్షణ, వాటిని పర్యాటక ప్రదేశాలుగా తీర్చిదిద్దేలా కులీకుతుబ్ షాహీ అర్బన్ డెవలప్‌మెంట్ అథారిటీ మార్గదర్శకాలను సవరించి బలోపేతం చేయాలని రేవంత్ రెడ్డి సూచించారు. పాతబస్తీలో మెట్రో పనులు వేగవంతం చేయాలని, ప్యారడైజ్ జంక్షన్ నుంచి శామీర్ పేట ఓఆర్ఆర్ వరకు ఎలివేటెడ్ కారిడార్ పనులు వేగవంతం చేయాలన్నారు.

మూసీ రివర్ ఫ్రంట్‌కు సంబంధించి హిమాయత్ సాగర్ నుంచి గాంధీ సరోవర్ వరకు పనులు వేగవంతం చేయాలని.. కొత్వాల్‌గూడ జంక్షన్‌లో మూసీ రివ‌ర్ ఫ్రంట్‌కు ప్రతీకగా ఇండియా గేట్‌, గేట్ వే ఆఫ్ ఇండియా, చార్మినార్ లాంటి ప్రత్యేకత కలిగిన ఒక ల్యాండ్ మార్క్‌ను నిర్మించాల‌ని సూచించారు. నెహ్రూ జూ పార్క్, మీరాలం ట్యాంక్ అభివృద్ధి పనుల్లో పురోగతిపైనా సమీక్ష నిర్వహించారు.