కేసు పెడ్తారా అంటూ పెట్రోల్‌తో నిప్పంటించుకున్న మందుబాబు

తప్పతాగి డ్రైవింగ్ చేయడమే కాకుండా.. నా పైనే కేసు పెడ్తారా అంటూ ఓ మందుబాబు పెట్రోల్ పోసుకుని నిప్పంటించుకుని అరాచకం సృష్టించాడు. పోలీస్ స్టేషన్ ఎదుటే ఈ ఘటన జరగడంతో ఒక్కసారి విస్తుపోయిన పోలీసులు హుటాహుటిన మంటలు ఆపే యత్నం చేశారు. అతన్ని కాపాడే ప్రయత్నం చేసే క్రమంలో ఓం హోంగార్డ్ కూడా గాయపడ్డాడు. ఈ ఘటన నల్గొండ జిల్లాలో చోటుచేసుకుంది.

నల్గొండలో యువత విచ్చలవిడిగా తయారవుతున్నారని ప్రజల నుంచి వస్తున్న ఫిర్యాదుల నేపథ్యంలో పోలీసులు అర్ధరాత్రి గస్తీ పెంచారు. ఈ క్రమంలోనే సోమవారం రాత్రి స్థానిక డీవీకే రోడ్డులో వన్ టౌన్ పోలీసులు డ్రంక్ అండ్ డ్రైవ్ టెస్టులు చేశారు. ఈ టెస్టుల్లో రావిళ్ల నర్సింహ అనే వ్యక్తి ఫూటుగా మద్యం తాగేసి దొరికాడు. దాంతో పోలీసులు బ్రీత్ ఎనలైజర్‌తో డ్రంక్ అండ్ డ్రైవ్ టెస్టు నిర్వహించారు. ఆ టెస్టులో 155 ఎంజీ/100 ఎంఎల్ ఆల్కహాల్ అని రీడింగ్ చూయించింది.

అతిగా మద్యం సేవించి డ్రైవింగ్ చేస్తున్నాడనే కారణంతో వన్ టౌన్ ఎస్సై సైదులు నర్సింహపై కేసు నమోదు చేశారు. అనంతరం డీవీకే రోడ్డు నుంచి స్థానిక పోలీస్ స్టేషన్‌కు నర్సింహను తరలించారు. పోలీస్ స్టేషన్ వద్ద తాగిన మైకంలో నర్సింహ తనపై కేసు ఎలా చేస్తారంటూ నానా రచ్చ చేశాడు. పోలీసులు అతన్ని సముదాయించే ప్రయత్నం చేసినప్పటికీ వినలేదు.

వన్ టౌన్ పోలీస్ స్టేషన్ లోపలికి వెళ్లిన నర్సింహ.. పార్కింగ్ ప్లేస్‌లో ఉన్న హోంగార్డ్ ప్రవీణ్ అడ్డుకునే ప్రయత్నం చేసినప్పటికీ ఆగలేదు. హోం గార్డ్ దగ్గరికి వస్తుండటంతో పెట్రోల్ పోసుకుని లైటర్‌తో నిప్పు అంటించుకున్నాడు. ఒక్కసారిగా మంటలు రావడంతో డ్యూటీలో ఉన్న కానిస్టేబుల్స్ అలర్ట్ అయ్యారు. వెంటనే బెడ్ షీట్ కప్పి అంజత్ అనే కానిస్టేబుల్ మంటలు ఆర్పేశాడు.

పోలీసులు హుటాహుటిన నర్సింహను స్థానిక ప్రభుత్వ ఆస్పత్రికి తరలించారు. ఆత్మహత్యా యత్నం చేసిన నర్సింహ పరిస్థితి సీరియస్‌గా ఉందని వైద్యులు తెలిపారు. అతన్ని కాపాడే ప్రయత్నం చేసిన హోంగార్డ్ ప్రవీణ్ చేతులకు కూడా గాయాలయ్యాయి. పోలీసుల విధులను అడ్డగించి నానా రచ్చ చేసిన నర్సింహపై డ్రంక్ అండ్ డ్రైవ్ కేసుతో పాటు మరో కేసు కూడా నమోదు చేశారు.