ఎవ్వరికీ భయపడేదే లేదు,,,,బండి సంజయ్‌కు ఈటెల స్ట్రాంగ్ కౌంటర్

తెలంగాణ బీజేపీలో బండి సంజయ్ వర్సెస్ ఈటెల వ్యవహారం రోజురోజుకు ముదురుతోంది. ఒకరి మీద మరొకరు బాహాబాహీగా విమర్శలు చేసుకుంటున్నారు. వైఎస్సార్, కేసీఆర్ లాంటోళ్లతోనే కొట్లాడానని.. తానెవ్వరికీ భయపడేదే లేదు అంటూ ఈటెల రాజేందర్ అన్నారు. హుజురాబాద్‌లో కేంద్ర మంత్రి బండి సంజయ్ చేసిన వ్యాఖ్యలపై ఈటెల ఇవాళ కౌంటర్ ఇచ్చారు.

మల్కాజ్‌గిరి ఎంపీ ఈటెల రాజేందర్ ఈరోజు తన నివాసంలో కార్యకర్తలతో మాట్లాడారు. హుజూరాబాద్ నియోజకవర్గంలో తనకు వ్యతిరేకంగా చాలా మంది పనిచేశారని, కేవలం ఇక్కడ మాత్రమే ఓట్లు తగ్గాయని బండి సంజయ్ ఇటీవల వ్యాఖ్యలు చేశారు. ఈ నేపథ్యంలో శామీర్‌పేటలోని ఈటెల ఇంటికి కార్యకర్తలు భారీగా చేరుకున్నారు. వారిని ఉద్దేశించి ఈటెల మాట్లాడుతూ ఇక నుంచి స్ట్రయిట్ ఫైటే ఉంటుందని.. స్ట్రీట్ ఫైట్ మాత్రం ఉందన్నారు.

రాజకీయాల్లో అవమానాలు, అవహేళనలు దాటి తాను ఈ స్థాయికి ఎదిగానని ఈటెల రాజేందర్ అన్నారు. కేసీఆర్ ఆ రోజు కూడా తన విషయంలో అవమానించారని.. కానీ హుజూరాబాద్ బిడ్డలు తనను కాపాడుకున్నారన్నారు. తన పక్షాన నిలిచిన కార్యకర్తలను కూడా తాను కాపాడుకుంటానని ఈ సందర్భంగా ఆయన మాటిచ్చారు. హుజూరాబాద్ తెలంగాణ ప్రతీకకు అడ్డా అని, దక్షిణ భారతదేశంలో తన నియోజకవర్గానికి వచ్చి దేశ ప్రధాని నరేంద్రమోదీ సమావేశం పెట్టారని ఈటెల గుర్తు చేశారు.

శత్రువుతో అయినా కొట్లాడొచ్చు కానీ కడుపులో కత్తులు పెట్టుకునే వారితో పోరాడలేమంటూ బండిని ఉద్దేశిస్తూ విమర్శలు చేశారు. బీజేపీ అన్ని రకాల అంశాలను పరిగణనలోకి తీసుకుంటారని తాను ఈ పార్టీలోకి వచ్చానని చెప్పారు. తెలంగాణలో తాను తొక్కని ఇంటి గడప లేదని, తనకు తెలియని వారే లేరన్నారు. వీరుడు ఎక్కడా భయపడడని.. రాజకీయాల్లో కొంతమంది ఉంటారని, ఇతరులను ఎదగనివ్వకుండా చేయడమే వాళ్ల పని అంటూ విమర్శించారు. హుజూరాబాద్ గడ్డ మీద తన అనుచరులు ఉంటారని.. సర్పంచులు, ఎంపీటీసీలు, వార్డ్ మెంబర్లు కూడా ఉంటారని చెప్పారు. ప్రధాని మోదీ వ్యక్తుల కోసం కాకుండా వ్యవస్థ నిర్మాణం కోసం పని చేస్తారని.. మనమంతా దేశం కోసం, ధర్మం కోసం కట్టుబడి పని చేయాలని కార్యకర్తలకు పిలుపునిచ్చారు.