కొత్తగా 1200 మంది సిబ్బందితో పాటు..పోలీస్‌స్టేషన్ల పేర్లు మారాయ్..

హైదరాబాద్ నగర పోలీస్ వ్యవస్థలో సమూల మార్పులు చోటుచేసుకుంటున్నాయి. నగరంలోని కొన్ని ముఖ్యమైన ప్రాంతాల ప్రాముఖ్యతను పరిగణనలోకి తీసుకుని.. కొన్ని పోలీస్ స్టేషన్లు, డివిజన్ల పేర్లను మారుస్తున్నట్లు హైదరాబాద్ నగర పోలీస్ కమిషనర్ సీవీ ఆనంద్ వెల్లడించారు. నూతనంగా 72వ లా అండ్‌ ఆర్డర్‌ పీఎస్‌గా టోలిచౌకి ఏర్పాటు చేసినట్లు తెలిపారు. అలాగే.. సెక్రటేరియట్ పోలీస్ స్టేషన్‌ను లేక్ పోలీస్ స్టేషన్‌గా, హుమాయున్‌నగర్ పోలీస్ స్టేషన్‌ను మెహదీపట్నం పోలీస్ స్టేషన్‌గా, షాహినాయత్‌గంజ్ పోలీస్ స్టేషన్‌ను గోషామహల్ పోలీస్ స్టేషన్‌గా పేరు మార్చినట్లు ఆయన ప్రకటించారు.

ఈ సందర్భంగా సీపీ సీవీ ఆనంద్ మాట్లాడుతూ.. హైదరాబాద్ పోలీస్ కమిషనరేట్‌లో దాదాపు 35 సంవత్సరాల తర్వాత పోలీస్ స్టేషన్ల పునర్వ్యవస్థీకరణ జరిగిందని తెలిపారు. ప్రస్తుతం నగరంలో 71 లా అండ్ ఆర్డర్ మరియు 31 ట్రాఫిక్ పోలీస్ స్టేషన్లు ఉన్నాయని ఆయన పేర్కొన్నారు. గత కొంతకాలంగా పోలీస్ స్టేషన్ల సరిహద్దుల విషయంలో కొన్ని సమస్యలు ఎదురవుతున్నాయని.. ట్రాఫిక్ మరియు లా అండ్ ఆర్డర్ పోలీస్ స్టేషన్ల పరిధిపై గందరగోళం నెలకొందని ఆయన వివరించారు. ఈ సమస్యలపై ప్రభుత్వం దృష్టికి నివేదిక పంపించగా.. మార్పులకు ఆమోదం లభించిందని ఆయన తెలిపారు. నూతనంగా మార్చిన పోలీస్ స్టేషన్ల వివరాలను హైదరాబాద్ సిటీ పోలీస్ వెబ్‌సైట్‌లో అందుబాటులో ఉంచుతామని ఆయన స్పష్టం చేశారు.

  మరోవైపు.. హైదరాబాద్ పోలీస్ కమిషనరేట్ పరిధిలో భారీ స్థాయిలో పోలీస్ అధికారుల బదిలీలు జరిగాయి. ఏకంగా 146 మంది సర్కిల్ ఇన్‌స్పెక్టర్లను (సీఐలు) బదిలీ చేస్తూ సీపీ సీవీ ఆనంద్ ఉత్తర్వులు జారీ చేశారు. ఈ బదిలీలు పోలీస్ శాఖలో పెద్ద ఎత్తున ప్రక్షాళనగా పరిగణించబడుతున్నాయి.

అంతేకాకుండా.. హైదరాబాద్ పోలీస్ కమిషనరేట్‌కు 1200 మంది సిబ్బందిని ప్రభుత్వం కేటాయించింది. మహిళా భద్రతకు ప్రాధాన్యతనిస్తూ ఏడు ప్రత్యేక మహిళా పోలీస్ స్టేషన్లను కూడా మంజూరు చేశారు. నగరంలో శాంతిభద్రతల పరిరక్షణను మరింత మెరుగుపరిచేందుకు రెండు కొత్త జోన్లను ఏర్పాటు చేయాలని నిర్ణయించారు. ప్రతి జోన్‌కు ఒక ప్రత్యేక సైబర్ క్రైమ్ పోలీస్ స్టేషన్‌ను కూడా ఏర్పాటు చేయనున్నారు.

ఈ మార్పుల అనంతరం నగరంలో మొత్తం 72 లా అండ్ ఆర్డర్ పోలీస్ స్టేషన్లు మరియు 31 ట్రాఫిక్ పోలీస్ స్టేషన్లు అందుబాటులోకి రానున్నాయి. ఆయా పోలీస్ స్టేషన్లకు కొత్త ఇన్‌స్పెక్టర్లను కేటాయించడంతో పాటు.. ఉన్న ఇన్‌స్పెక్టర్లను కూడా బదిలీ చేశారు. ఈ చర్యలన్నీ నగరంలో పోలీస్ వ్యవస్థను మరింత బలోపేతం చేయడానికి.. ప్రజలకు మెరుగైన సేవలు అందించడానికి ఉద్దేశించినవిగా తెలుస్తోంది.