చర్లపల్లి రైల్వే టెర్మినల్ కనిపించడం లేదా..?,,, బీజేపీ

మేడ్చల్ జిల్లాలోని చర్లపల్లి రైల్వే టెర్మినల్ వద్ద మౌలిక సదుపాయాల కొరత తీవ్రంగా ఉండటంతో.. భారతీయ జనతా పార్టీ (బీజేపీ) ఆధ్వర్యంలో ఆందోళన కార్యక్రమం నిర్వహించారు. చర్లపల్లి రైల్వే టెర్మినల్ ముందు బైఠాయించి ధర్నా నిర్వహించిన బీజేపీ కార్యకర్తలు.. టెర్మినల్ వద్ద ట్రాఫిక్ సమస్యలను పరిష్కరించాలని.. రోడ్లను విస్తరించాలని.. ప్రయాణికులకు అవసరమైన ఇతర వసతులు కల్పించాలని డిమాండ్ చేశారు.

ఈ ధర్నాలో పాల్గొన్న ఉప్పల్ మాజీ ఎమ్మెల్యే ఎన్.వి.ఎస్.ఎస్. ప్రభాకర్ తెలంగాణ రాష్ట్ర ప్రభుత్వంపై తీవ్ర విమర్శలు గుప్పించారు. తెలంగాణా రాష్ట్ర ప్రభుత్వం మొద్దు నిద్రలో ఉందని ఘాటు వ్యాఖ్యలు చేశారు. భారత ప్రభుత్వం 450 కోట్ల రూపాయల వ్యయంతో చర్లపల్లి టెర్మినల్‌ను నిర్మించి.. నాలుగు నెలల క్రితమే ప్రధాని నరేంద్ర మోదీ చేతుల మీదుగా వర్చువల్ విధానంలో ప్రారంభించినప్పటికీ.. రాష్ట్ర ప్రభుత్వం ప్రయాణికులకు కనీస సౌకర్యాలు కూడా కల్పించకపోవడం సిగ్గుచేటని ఆయన అన్నారు. రోడ్లు, వీధి దీపాలు, బస్సు సౌకర్యాలు వంటి కనీస వసతులు లేక ప్రజలు తీవ్ర ఇబ్బందులు పడుతున్నారని ఆయన ఆవేదన వ్యక్తం చేశారు.

ముఖ్యంగా.. మల్లాపూర్ నుండి రైల్వే స్టేషన్ వరకు ఇరువైపులా రహదారిని విస్తరించాలని, అలాగే హెచ్‌సీఎల్ కూడలి నుండి స్టేషన్ వరకు వీధి దీపాలను ఏర్పాటు చేయాలని వారు ప్రభుత్వాన్ని కోరారు. చర్లపల్లి రైల్వే టెర్మినల్ నుండి రోజుకు 25 రైళ్లు ప్రారంభమవుతున్నాయని.. అయితే రాష్ట్ర ప్రభుత్వం సహకరించకపోవడం వల్ల రోడ్లు , బస్సు సౌకర్యాలు లేక ప్రయాణికులు తీవ్ర ఇబ్బందులు పడుతున్నారని ఆందోళనకారులు ఆవేదన వ్యక్తం చేశారు. వివిధ డిపోల నుండి బస్సు సౌకర్యాలు కల్పించాలని వారు డిమాండ్ చేశారు. ప్రభుత్వం స్పందించి రాబోయే 15 రోజుల్లో ప్రయాణికులకు అవసరమైన వసతులను కల్పించకపోతే.. రాష్ట్ర ప్రభుత్వాన్ని అష్టదిగ్బంధనం చేస్తామని ఎన్.వి.ఎస్.ఎస్. ప్రభాకర్ హెచ్చరించారు. చర్లపల్లి రైల్వే టెర్మినల్ చుట్టుపక్కల ప్రాంతాల అభివృద్ధి విషయంలో రాష్ట్ర ప్రభుత్వం నిర్లక్ష్యంగా వ్యవహరిస్తోందని బీజేపీ నాయకులు ఆరోపించారు.

ఈ ధర్నా కార్యక్రమం చర్లపల్లి రైల్వే టెర్మినల్ వద్ద ఉద్రిక్త వాతావరణానికి దారితీసింది. బీజేపీ కార్యకర్తలు ప్రభుత్వానికి వ్యతిరేకంగా నినాదాలు చేస్తూ, తమ డిమాండ్లను వెంటనే పరిష్కరించాలని పట్టుబట్టారు. ఈ ఆందోళన కారణంగా టెర్మినల్ వద్ద కొంతసేపు రాకపోకలు నిలిచిపోయాయి. ఈ ఘటనపై రాష్ట్ర ప్రభుత్వం ఇంకా స్పందించలేదు. అయితే.. బీజేపీ నాయకులు మాత్రం తమ డిమాండ్లను నెరవేర్చే వరకు ఆందోళన కొనసాగిస్తామని స్పష్టం చేశారు. చర్లపల్లి రైల్వే టెర్మినల్ వద్ద మౌలిక సదుపాయాల కొరత.. ట్రాఫిక్ సమస్యలపై ప్రభుత్వం తక్షణమే చర్యలు తీసుకోవాలని వారు డిమాండ్ చేస్తున్నారు.