"మేము నియోజకవర్గ కాంగ్రెస్ కార్యకర్తలం.." అంటూ,,,రేవంత్ రెడ్డికి బెదిరింపు లేఖ

తెలంగాణలో త్వరలోనే మంత్రి వర్గ విస్తరణ జరుగనుందన్న చర్చ నడుస్తున్న నేపథ్యంలో.. మహబూబ్‌నగర్ లోక్‌సభ నియోజకవర్గ పరిధిలోని నారాయణ్‌పేట జిల్లా మక్తల్‌లో సంచలన లేఖలు వెలుగులోకి వచ్చాయి. ముఖ్యమంత్రి రేవంత్‌ రెడ్డితో పాటు రాష్ట్ర మంత్రులు ఉత్తమ్‌ కుమార్‌ రెడ్డి, కోమటిరెడ్డి వెంకట్‌ రెడ్డిలను హెచ్చరిస్తూ గుర్తు తెలియని వ్యక్తులు రాసిన లేఖలు స్థానికంగా తీవ్ర కలకలం సృష్టించాయి.

"మేము నియోజకవర్గ కాంగ్రెస్ కార్యకర్తలం.." అంటూ మొదలైన ఆ లేఖలో సీఎం రేవంత్‌ రెడ్డిని తీవ్రస్థాయిలో హెచ్చరించారు. "ఖబడ్దార్... మీ పలుకుబడి ఉపయోగించి మా ఎమ్మెల్యే (మక్తల్ ఎమ్మెల్యే వాకిటి శ్రీహరి)కి మంత్రి పదవి రాకుండా చేశావో అప్పుడు నీ భరతం పట్టడం ఖాయం. రాష్ట్రంలో పార్టీ అడ్రస్ గల్లంతవుతుంది. మిమ్మల్ని సీఎం పదవి నుంచి దించేస్తాం.." అంటూ ఆ లేఖలో గుర్తుతెలియని వ్యక్తులు స్పష్టంగా పేర్కొన్నారు. ఈ హెచ్చరికలు రాష్ట్ర రాజకీయ వర్గాల్లో సర్వత్రా చర్చనీయాంశంగా మారాయి.

అయితే.. ముదిరాజు సామాజిక వర్గం పేరుతోనే ఈ లేఖలు వెలుగులోకి రావడం మరింత సంచలనంగా మారాయి. ఈ నేపథ్యంలో పోలీసులు వెంటనే అప్రమత్తమయ్యారు. సంచలనం సృష్టిస్తున్న ఈ లేఖలు ఎవరు రాశారు..? వాటి వెనుక ఉన్న కారణాలేమిటి..? అనే కోణంలో పోలీసులు లోతుగా దర్యాప్తు చేస్తున్నారు.

మరోవైపు.. ఈ లేఖల విషయం తెలియగానే రాష్ట్రంలోని ముదిరాజు సంఘం నేతలు స్పందించారు. ఈ లేఖలకు తమ సామాజిక వర్గానికి ఎలాంటి సంబంధం లేదని వారు స్పష్టం చేశారు. అంతేకాకుండా.. ఈ విషయంపై వారు పోలీసులకు అధికారికంగా ఫిర్యాదు కూడా చేశారు. తమ పేరును దుర్వినియోగం చేశారని ఆ ఫిర్యాదులో ముదిరాజ్ సంఘం నేతలు పేర్కొనటం గమనార్హం.

కాగా.. ఈ లేఖల అంశంపై పోలీసులు కేసు నమోదు చేసుకుని దర్యాప్తును వేగవంతం చేశారు. ఈ హెచ్చరిక లేఖలు ఎక్కడి నుంచి వచ్చాయి..? ఎవరు వీటిని తయారు చేశారు? అనే విషయాలపై పోలీసులు దృష్టి సారించారు. ఈ ఘటన స్థానిక రాజకీయాలతో పాటు కాంగ్రెస్ పార్టీలోనూ తీవ్ర ప్రకంపనలు సృష్టిస్తోంది. రానున్న రోజుల్లో ఈ కేసు ఎలాంటి మలుపులు తిరుగుతుందో వేచి చూడాలి.