హైదరాబాద్‌కు రూ.562 కోట్లతో ప్రముఖ తయారీ కంపెనీ

ముఖ్యమంత్రి రేవంత్ రెడ్డి నేతృత్వంలోని తెలంగాణ రైజింగ్ బృందం జపాన్ పర్యటనలో బిజీ బిజీగా ఉంది. పర్యటనలో భాగంగా తొలి రోజు భారీ పెట్టుబడులకు ఒప్పందాలు కుదిరాయి. జపాన్‌కు చెందిన ప్రముఖ వ్యాపార సంస్థ మరుబెనీ సంస్థ దాదాపు రూ. 1,000 కోట్ల పెట్టుబడితో హైదరాబాద్‌లో నిర్మించనున్న ఫ్యూచర్ సిటీలో 600 ఎకరాల్లో ఇండస్ట్రియల్ పార్క్‌ను అభివృద్ధి చేసేందుకు ఒప్పందం కుదుర్చుకుంది. ఈ క్రమంలోనే.. రెండో రోజు కూడా పెట్టుబడులు వెల్లువ కొనసాగింది. ఇందులో భాగంగా.. విద్యుత్ సరఫరా, పంపిణీ రంగంలో తెలంగాణ ప్రభుత్వంతో కలిసి పనిచేయడానికి తోషిబా కార్పొరేషన్ యొక్క అనుబంధ సంస్థ ట్రాన్స్‌మిషన్ డిస్ట్రిబ్యూషన్ సిస్టమ్స్ ఇండియా (టీటీడీఐ) ముందుకు వచ్చింది. ఈ మేరకు తెలంగాణ ప్రభుత్వంతో ఒక అవగాహన ఒప్పందం (ఎంవోయూ) కుదుర్చుకుంది. ఈ ఒప్పందం రాష్ట్రంలో విద్యుత్ రంగంలో పెట్టుబడులను, ఆవిష్కరణలను ప్రోత్సహించనుంది.

ఈ ఒప్పందంలో భాగంగా, టీటీడీఐ హైదరాబాద్ సమీపంలోని రుద్రారం వద్ద అత్యాధునిక సర్జ్ అరెస్టర్స్ తయారీ ఫ్యాక్టరీని ఏర్పాటు చేయనుంది. అంతేకాకుండా, ఇప్పటికే రుద్రారంలో ఉన్న తమ ఫ్యాక్టరీలను అప్‌గ్రేడ్ చేసి, పవర్ ట్రాన్స్‌ఫార్మర్స్, డిస్ట్రిబ్యూషన్ ట్రాన్స్‌ఫార్మర్స్ మరియు గ్యాస్ ఇన్సులేటెడ్ స్విచ్‌గేర్ (జీఐఎస్) తయారీ సామర్థ్యాన్ని మరింత విస్తరించనుంది.

టీటీడీఐ ఈ ప్రాజెక్ట్ కోసం భారీగా రూ. 562 కోట్ల పెట్టుబడి పెట్టనుంది. అత్యాధునిక సాంకేతిక పరిజ్ఞానాన్ని ఉపయోగించనున్న ఈ కొత్త ఫ్యాక్టరీ, రాష్ట్రంలో పెరుగుతున్న విద్యుత్ డిమాండ్‌ను తీర్చడంలో కీలక పాత్ర పోషిస్తుంది. దీనితో పాటు, స్థానికంగా పెద్ద సంఖ్యలో ఉద్యోగ అవకాశాలు కూడా లభించనున్నాయి.

రుద్రారంలో ఇప్పటికే రెండు విజయవంతమైన ఫ్యాక్టరీలను నిర్వహిస్తున్న టీటీడీఐ, ఈ కొత్త పెట్టుబడితో అక్కడ మూడవ తయారీ యూనిట్‌ను నెలకొల్పనుంది. అంతేకాకుండా, ప్రస్తుతం ఉన్న ఫ్యాక్టరీల ఉత్పత్తి సామర్థ్యాన్ని కూడా పెంచనుంది.

ఈ ముఖ్యమైన ఒప్పందం టోక్యోలో జరిగింది. ముఖ్యమంత్రి రేవంత్ రెడ్డి సమక్షంలో తోషిబా కార్పొరేషన్ ఎనర్జీ బిజినెస్ డైరెక్టర్ హిరోషి కనెటాతో పాటు తెలంగాణ రాష్ట్ర ప్రభుత్వానికి చెందిన ఉన్నతాధికారులు ఈ ఒప్పందంపై సంతకాలు చేశారు. ఈ పెట్టుబడి తెలంగాణ రాష్ట్ర విద్యుత్ రంగానికి ఒక ముఖ్యమైన మైలురాయిగా నిలువనుంది.