by Suryaa Desk | Sat, Mar 14, 2026, 08:03 PM

కన్నపేగును, తోడబుట్టిన బంధాన్ని కలిచివేసే అత్యంత కిరాతక ఘటన ఉత్తర ప్రదేశ్‌లోని మొరాదాబాద్‌లో చోటు చేసుకుంది. ముఖ్యంగా ఏ పనీ చేయకుండా, జులాయిగా తిరుగుతుండడంతో.. కవల సోదరి అతడి తీరు మార్చుకోవాలని చెప్పింది. అది ఏమాత్రం నచ్చని అతడు.. సొంత సోదరినే కత్తితో పొడిచి చంపేశాడు. ఆపై కన్నతల్లి పని చేస్తున్న చోటుకు వెళ్లి.. అమ్మా నీకో సర్‌ప్రైజ్ అంటూ ఇంటికి తీసుకు వచ్చాడు. ఆపై సోదరి మృతదేహాన్ని చూపించాడు. అక్కడితో ఆగకుండా తల్లిపై కూడా ఇష్టం వచ్చినట్లుగా దాడి చేశాడు. దీంతో ఆమెకు తీవ్ర గాయాలు అయి ప్రస్తుతం ఆస్పత్రిలో చికిత్స పొందుతోంది.

మొరాదాబాద్‌కు చెందిన హార్దిక్, హిమశిఖలు కవల పిల్లలు. ప్రస్తుతం వీరిద్దరికీ 25 ఏళ్ల కాగా.. వీరిద్దరూ ఇంజనీర్లుగా గుర్గావ్‌లో పని చేసేవారు. అయితే హార్దిక్ ఏడాదిన్నర క్రితం ఉద్యోగం వదిలేసి.. ఇంటి వద్దే ఉంటూ సోషల్ మీడియాకు బానిస అయ్యాడు. ఈ క్రమంలోనే పూణేకు చెందిన ఒక మహిళతో ఆన్‌లైన్‌లో పరిచయం ఏర్పడింది. అది కాస్తా ప్రేమగా మారి.. ఆమెను పెళ్లి చేసుకోవాలని హార్దిక్ నిర్ణయించుకున్నాడు. అయితే హిమశిఖ మాత్రం కెరీర్ మీద దృష్టి పెట్టాలని, జీవితంలో స్థిరపడాలని తమ్ముడికి తరచూ నచ్చజెప్పేది. మార్చి 6వ తేదీ సాయంత్రం కూడా ఇలాంటి చర్చే వారి మధ్య మొదలైంది. కెరీర్, ప్రేమ విషయంపై జరిగిన వాగ్వాదం చిలికి చిలికి గాలివానలా మారి.. హార్దిక్‌లో ఉన్మాదాన్ని నింపింది.

84 సార్లు పొడిచి.. తల్లిపై కూడా దాడి!

ముఖ్యంగా కోపంతో ఊగిపోయిన హార్దిక్.. ఇంట్లో ఉన్న కూరగాయలు కోసే కత్తితో తన సోదరిపై దాడికి దిగాడు. ఎంతలా అంటే.. ఆమె మరణించినా కత్తితో పొడుస్తూనే ఉన్నాడు. మొత్తంగా 84 సార్లు కత్తితో పొడిచి తన కసినంతా తీర్చుకున్నాడు. ఆపై హార్దిక్ తన తల్లి నీలిమ పని చేస్తున్న ఇన్సూరెన్స్ కంపెనీకి వెళ్లాడు. "అమ్మా.. ఇంటికి వెళ్దాం.. నీకోసం ఒక సర్ ప్రైజ్ ఉంది" అని నమ్మించి ఇంటికి తీసుకువచ్చాడు. నీలిమ ఇంట్లోకి వెళ్లగానే రక్తపు మడుగులో ఉన్న కూతురిని చూసి షాక్ అయి కేకలు వేసింది. వెంటనే హార్దిక్ తన తల్లిపై కూడా దాడి చేశాడు. అదే సమయంలో ఆమె కేకలు వేయగా.. స్థానికులంతా వచ్చి అతడిని ఆపారు. అలాగే పోలీసులకు ఫిర్యాదు చేసి నీలిమను ఆస్పత్రిలో చేర్పించారు.

ప్రస్తుతం ఆమె ఆసుపత్రిలో చికిత్స పొందుతూ ప్రాణాపాయం నుంచి బయట పడ్డప్పటికీ.. కన్నకొడుకే, సొంత సోదరిని చంపడం చూసి గుండెలవిసేలా రోదిస్తోంది. మరోవైపు స్థానికులు తల్లిని కొట్టొద్దంటూ ఆపగానే హార్దిక్ పారిపోయాడు. అయితే ఘటన జరిగిన 24 గంటల్లోనే పోలీసులు హార్దిక్‌ను అరెస్ట్ చేశారు. విచారణలో నిందితుడు తన నేరాన్ని అంగీకరించాడు. తన కెరీర్ గురించి, ప్రేమ గురించి ఇంట్లో వారు పదే పదే సలహాలు ఇస్తుండటంతో తనలో అసహనం పెరిగిపోయిందని.. అందుకే ఈ పని చేశానని పోలీసులకు వెల్లడించాడు.