by Suryaa Desk | Mon, Mar 02, 2026, 09:03 PM

Muscat తీరానికి సమీపంలో చోటుచేసుకున్న ఘోర ఘటనలో ఓ భారతీయ సిబ్బంది ప్రాణాలు కోల్పోయాడు. సోమవారం మస్కట్‌కు సుమారు 52 నాటికల్ మైళ్ల దూరంలో ప్రయాణిస్తున్న ‘MKD VYOM’ అనే చమురు ట్యాంకర్‌ను పేలుడు పదార్థాలతో నిండిన రిమోట్ కంట్రోల్ (అన్‌మ్యాన్డ్) పడవ ఢీకొట్టినట్లు సమాచారం.ఈ ఢీకొట్టిన ఘటనతో ట్యాంకర్ ఇంజిన్ రూమ్‌లో భారీ పేలుడు సంభవించి మంటలు చెలరేగాయి. ప్రమాదం తీవ్రతతో ఒక భారతీయ సిబ్బంది అక్కడికక్కడే మృతి చెందగా, మిగిలిన 21 మందిని సురక్షితంగా బయటకు తరలించారు. వారిలో 16 మంది భారతీయులు, నలుగురు బంగ్లాదేశ్ పౌరులు, ఒక ఉక్రెయిన్ దేశస్థుడు ఉన్నారు.ఇదిలా ఉండగా, అంతకుముందు రోజు Strait of Hormuzలో ‘MV Skylight’ అనే మరో ట్యాంకర్‌పై కూడా దాడి జరిగినట్లు నివేదికలు తెలిపాయి. వరుస ఘటనల నేపథ్యంలో ఒమన్‌లోని భారత రాయబార కార్యాలయం స్థానిక అధికారులతో నిరంతర సంప్రదింపులు కొనసాగిస్తోంది. బాధితులకు అవసరమైన అన్ని విధాల సహాయం అందిస్తున్నట్లు భారత ఎంబసీ ప్రకటించింది.