by Suryaa Desk | Thu, Feb 05, 2026, 10:03 PM

ప్రభుత్వ రంగ జీవిత బీమా సంస్థ అయిన లైఫ్ ఇన్సూరెన్స్ కార్పొరేషన్ (ఎల్ఐసీ) అదరగొట్టింది. త్రైమాసిక ఫలితాలను గురువారం మార్కెట్లు ముగిసిన తర్వాత ప్రకటించింది. 2025, డిసెంబర్ నెలతో ముగిసిన మూడో ఆర్థిక సంవత్సరంలో కంపెనీ నికర లాభం రూ. 12,958 కోట్లుగా నమోదు చేసినట్లు తెలిపింది. గతేడాది ఇదే త్రైమాసికం (అక్టోబర్-డిసెంబర్ 2024)లో వచ్చిన రూ. 11,057 కోట్ల నెట్ ప్రాఫిట్‌తో పోలిస్తే ఈసారి కంపెనీ లాభం 17 శాతం మేర పెరిగినట్లు తెలిపింది. అలాగే సమీక్షా త్రైమాసికంలో ప్రీమియంల ద్వారా వచ్చిన ఆదాయం రూ. 1,25,613 కోట్లుగా ఉన్నట్లు వెల్లడించింది. ఇది గతేడాది మూడో త్రైమాసికంలో రూ. 1,06,891 కోట్లుగా ఉన్నట్లు ఎల్ఐసీ తమ స్టాక్ ఎక్స్ఛేంజీ ఫైలింగ్‌లో వెల్లడించింది.

క్యూ3లో ఎల్ఐసీ కంపెనీ మొత్తం ఆదాయం సైతం రూ. 2,01,994 కోట్ల నుంచి రూ. 2,33,984 కోట్లకు పెరిగినట్లు తెలిపింది. ఒక్క మూడో త్రైమాసికంలోనే కమీషన్ కింద తమ ఏజెంట్లకు రూ. 6011 కోట్లు చెల్లించినట్లు తెలిపింది. అంతకు ముందు ఏడాది ఇదే త్రైమాసికంలో తమ ఏజెంట్లకు కమీషన్ కింద రూ. 6966 కోట్లు చెల్లించింది. అక్టోబర్- డిసెంబర్ త్రైమాసికంలో మొట్ట మొదటి సారి చెల్లించే ప్రీమియం వసూళ్లు రూ. 10,605 కోట్లు వచ్చినట్లు కంపెనీ వెల్లడించింది. అంతకు ముందు ఏడాది క్యూ3 లో ఈ మొత్తం రూ. 7,285 కోట్లుగా ఉంది.

  ఇక మూడో త్రైమాసిక ఫలితాల ప్రకటన సందర్భంగా ఎల్ఐసీ షేర్లు లాభాల్లో ముగిశాయి. ఎన్ఎస్ఈలో ఎల్ఐసీ షేరు విలువ 0.56 శాతం పెరిగి రూ. 840 వద్ద స్థిరపడింది. ఫిబ్రవరి 5వ తేదీన ఈ స్టాక్ రూ. 835.50 వద్ద స్వల్ప లాభాల్లో ట్రేడింగ్ మొదలు పెట్టింది. ఒక దశలో 1 శాతం వరకు పెరిగి రూ. 842 వద్ద ఇంట్రాడే గరిష్ఠ స్థాయిని తాకింది. ఆ తర్వాత కాస్త వెనక్కి తగ్గింది. అలాగే ఒక దశలో రూ. 831.45 వద్ద ఇంట్రాడే కనిష్ఠ స్థాయిని తాకింది. చివరకు మార్కెట్లు ముగిసే నాటికి రూ. 840 వద్ద ముగిసింది. ఈ స్టాక్ 52 వారాల గరిష్ఠ ధర రూ. 980 వద్ద ఉండగా కనిష్ఠ ధర రూ. 715.30 వద్ద ఉంది. ప్రస్తుతం ఎల్ఐసీ మార్కెట్ విలువ రూ. 5,32,000 లక్షల కోట్లుగా ఉంది. ఫలితాలు అంచనాలకు తగ్గట్లుగా ఉంటాయని భావించిన ఇన్వెస్టర్లు కొనుగోళ్లకు మద్దతు చూపినట్లు అర్థమవుతోంది.