by Suryaa Desk | Tue, Feb 03, 2026, 06:45 PM

తిరుమల తిరుపతి దేవస్థానం (TTD) నెయ్యి కొనుగోలు వ్యవహారంలో గత ప్రభుత్వం ఉద్దేశపూర్వకంగానే నిబంధనలను నీరుగార్చిందని రాష్ట్ర ఆర్థిక శాఖ మంత్రి పయ్యావుల కేశవ్ తీవ్రస్థాయిలో ధ్వజమెత్తారు. గత బోర్డు తీసుకున్న అనాలోచిత నిర్ణయాల వల్లే నాణ్యత లేని నెయ్యి సరఫరా చేసే సంస్థలకు మార్గం సుగమమైందని ఆయన ఆరోపించారు. పవిత్రమైన లడ్డూ ప్రసాదం తయారీలో వాడే నెయ్యి విషయంలో ఇంతటి నిర్లక్ష్యం ప్రదర్శించడం భక్తుల మనోభావాలను దెబ్బతీయడమేనని ఆయన అభిప్రాయపడ్డారు.
టీడీపీ హయాంలో ఉన్న కఠినమైన నిబంధనలను వైసిపి ప్రభుత్వం అధికారంలోకి వచ్చాక పూర్తిగా మార్చివేసిందని మంత్రి వివరించారు. గతంలో నెయ్యి సరఫరా చేసే డెయిరీలకు కనీసం మూడు ఏళ్ల అనుభవంతో పాటు, ఏడాదికి 4 లక్షల లీటర్ల పాల సేకరణ సామర్థ్యం ఉండాలనే నిబంధన ఉండేదని గుర్తు చేశారు. అంతేకాకుండా సదరు సంస్థలకు రూ. 250 కోట్ల వార్షిక టర్నోవర్ ఉండాలని తాము నిబంధన పెడితే, గత ప్రభుత్వం ఆ టర్నోవర్‌ను రూ. 150 కోట్లకు తగ్గించి, అసలు పాల సేకరణతో సంబంధం లేకుండానే టెండర్లు దక్కించుకునేలా మార్పులు చేసిందని విమర్శించారు.
నెయ్యి కల్తీకి సంబంధించి గత ప్రభుత్వానికి ముందే హెచ్చరికలు అందినప్పటికీ వారు పట్టించుకోలేదని పయ్యావుల కేశవ్ ఆరోపించారు. నెయ్యిలో ఫిష్ ఆయిల్, బీఫ్ టాలో (జంతువుల కొవ్వు) కలిసినట్లు 2022 ఆగస్టులోనే సిఎఫ్టిఆర్ఐ (CFTRI) నివేదిక ఇచ్చిందని ఆయన వెల్లడించారు. ఇంతటి ఘోరమైన విషయం బయటపడినప్పటికీ, అప్పటి పాలక మండలి తగిన చర్యలు తీసుకోకుండా మౌనం వహించడం వెనుక ఉన్న ఆంతర్యమేంటని ఆయన ప్రశ్నించారు. ఇది కేవలం సాంకేతిక లోపం కాదని, వ్యవస్థీకృతమైన నిర్లక్ష్యమని దుయ్యబట్టారు.
ప్రస్తుత ప్రభుత్వం ఈ అక్రమాలపై పూర్తిస్థాయి విచారణ జరుపుతోందని, బాధ్యులెవరైనా సరే విడిచిపెట్టే ప్రసక్తే లేదని మంత్రి స్పష్టం చేశారు. తిరుమల పవిత్రతను కాపాడటం తమ ప్రథమ ప్రాధాన్యతని, ఇకపై ఇలాంటి ఘటనలు పునరావృతం కాకుండా కఠినమైన నాణ్యతా ప్రమాణాలను అమలు చేస్తున్నామని తెలిపారు. సరఫరాదారుల ఎంపికలో పారదర్శకత పాటిస్తూ, కేవలం అత్యుత్తమ ప్రమాణాలు కలిగిన సంస్థల నుండే నెయ్యి సేకరించేలా చర్యలు తీసుకుంటున్నామని ఆయన వివరించారు.