by Suryaa Desk | Mon, Feb 02, 2026, 08:18 PM

TVS Raider 125… నేటితరం యువత మనసు దోచుకున్న స్టైలిష్ బైక్ అనగానే ముందుగా గుర్తుకొచ్చే పేరు ఇదే. మెరుపు వేగం, ఆకట్టుకునే స్పోర్టీ లుక్‌తో రోడ్లపై రారాజులా దూసుకెళ్లే ఈ బైక్ ఇప్పుడు మరోసారి వార్తల్లో నిలిచింది.అయితే ఈసారి కొనుగోలుదారులకు కాస్త భారంగా మారనుంది. మధ్యతరగతి వినియోగదారులకు షాక్ ఇస్తూ టీవీఎస్ మోటార్స్ తన ఫ్లాగ్‌షిప్ 125సీసీ మోటార్ సైకిల్ అయిన రైడర్ సిరీస్ ధరలను పెంచుతున్నట్లు ప్రకటించింది. ఇప్పటికే మార్కెట్లో భారీ క్రేజ్ సంపాదించుకున్న ఈ బైక్ ధరల పెంపు ఇప్పుడు ఆటోమొబైల్ రంగంలో చర్చనీయాంశంగా మారింది.ఈ ధరల పెరుగుదల వెంటనే అమల్లోకి వస్తుందని కంపెనీ స్పష్టం చేసింది. పెరిగిన ముడి సరుకు ధరలు, తయారీ వ్యయం వంటి కారణాలతోనే ఈ నిర్ణయం తీసుకున్నట్లు సమాచారం. నివేదికల ప్రకారం వేరియంట్‌ను బట్టి ధరల పెంపు భిన్నంగా ఉండగా, గరిష్టంగా రూ.1,250 వరకు పెరిగినట్లు తెలుస్తోంది. మొత్తంగా ఇది చిన్న మొత్తమే అనిపించినా, బడ్జెట్ బైక్ కోసం ఎదురుచూస్తున్న వినియోగదారులపై మాత్రం ప్రభావం చూపనుందని నిపుణులు చెబుతున్నారు.వేరియంట్ల వారీగా పరిశీలిస్తే, డ్రమ్ వేరియంట్‌పై అత్యధికంగా రూ.1,250 అదనపు భారం పడింది. సింగిల్ సీట్ మోడల్ ధర రూ.950 పెరగగా, స్ప్లిట్ సీట్ మరియు ఐగో వేరియంట్లపై రూ.900 వరకు పెంపు జరిగింది. యువతను ఎక్కువగా ఆకర్షించే సూపర్ స్క్వాడ్ ఎడిషన్ ధర కూడా రూ.900 మేర పెరిగింది. ఇక ఎస్ఎక్స్ సీ డీడీ, టీఎఫ్‌టీ డీడీ వంటి హైఎండ్ వేరియంట్లపై వరుసగా రూ.925, రూ.950 వరకు ధరలు పెరిగాయి.ధరల పెంపు తర్వాత TVS Raider 125 బేస్ మోడల్ ఎక్స్-షోరూమ్ ధర సుమారు రూ.82,000 నుంచి ప్రారంభమవుతుండగా, టాప్ ఎండ్ వేరియంట్ ధర రూ.97,050 వరకు చేరుకుంది. ఆన్-రోడ్ ధర అయితే ఇంకా పెరిగే అవకాశం ఉంది. అయినప్పటికీ ఫీచర్లు, టెక్నాలజీ, మైలేజీ పరంగా ఈ సెగ్మెంట్లో రైడర్ తన ఆధిపత్యాన్ని కొనసాగిస్తుందని కంపెనీ ధీమా వ్యక్తం చేస్తోంది.ప్రస్తుతం 125సీసీ సెగ్మెంట్లో తీవ్ర పోటీ ఉన్నా, TVS Raider తనదైన స్టైల్‌తో దూసుకుపోతోంది. డిజిటల్ ఇన్‌స్ట్రుమెంట్ క్లస్టర్, బ్లూటూత్ కనెక్టివిటీ వంటి ఆధునిక ఫీచర్లు ఈ బైక్‌ను మరింత ప్రత్యేకంగా నిలబెడుతున్నాయి. ధరలు పెరిగిన నేపథ్యంలో కొనుగోలుదారులు తమ బడ్జెట్‌ను మరోసారి పునఃపరిశీలించుకోవాల్సిన పరిస్థితి ఏర్పడింది. ఈ ధరల పెంపు అమ్మకాలపై ఎంతవరకు ప్రభావం చూపుతుందో చూడాలి.