by Suryaa Desk | Wed, Jan 28, 2026, 09:27 PM

ప్రపంచంలోనే అత్యంత పొడవైన రైల్వే వంతెనగా గుర్తింపు పొందిన చైనాలోని దన్యాంగ్-కున్షన్ గ్రాండ్ బ్రిడ్జ్ ఆధునిక ఇంజనీరింగ్‌కు ఒక నిలువుటెత్తు నిదర్శనంగా నిలుస్తోంది. సుమారు 102 మైళ్లు అంటే దాదాపు 165 కిలోమీటర్ల పొడవు ఉన్న ఈ వంతెన.. బీజింగ్-షాంఘై హైస్పీడ్ రైల్వే మార్గంలో అత్యంత కీలకమైన భాగంగా నిలిచింది. ఈ బ్రిడ్జిని 2011లో ప్రారంభించగా.. అప్పటి నుంచి ఇప్పటి వరకు ప్రపంచంలోనే అత్యంత పొడవైన వంతెనగా ఇది గిన్నిస్ వరల్డ్ రికార్డును పదిలంగా ఉంచుకుంది.

ఈ భారీ వంతెన నిర్మాణం 2006లో ప్రారంభించగా.. మొత్తం నాలుగు సంవత్సరాల పాటు సాగింది. సుమారు 10 వేల మంది కార్మికుల నిరంతర శ్రమతో పూర్తి చేసిన ఈ ప్రాజెక్టు కోసం చైనా ప్రభుత్వం సుమారు 8.5 బిలియన్ డాలర్లు (అంటే భారత కరెన్సీలో సుమారు రూ.78 వేల కోట్లు) ఖర్చు చేసింది. చివరికి 2011 జూన్ 31వ తేదీన ప్రారంభించారు. చైనా హైవేలు, సొరంగాలు, ప్రధాన రవాణా లింక్‌లకు బాధ్యత వహించే ఆ దేశ ప్రభుత్వ యాజమాన్యంలోని ఇంజనీరింగ్ సంస్థ చైనా రోడ్ అండ్ బ్రిడ్జ్ కార్పొరేషన్ ఈ ప్రాజెక్టును నిర్మించింది.

 యాంగ్జీ నది డెల్టా ప్రాంతంలోని షాంఘై, నాన్జింగ్ మధ్య విస్తరించి ఉన్న ఈ వంతెన.. వరి పొలాలు, కాలువలు, సరస్సులు, దన్యాంగ్, కున్షన్ వంటి ప్రధాన నగరాల మీదుగా సాగుతుంది. ముఖ్యంగా యాంగ్‌చెంగ్ సరస్సుపై సుమారు 9 కిలోమీటర్ల మేర ఈ వంతెన.. నీటిపైనే నిర్మించడం ఈ ప్రాజెక్టులో మరో విశేషం. చిత్తడి నేలలు, వరద ముప్పు, భూకంపాల వంటి భౌగోళిక సవాళ్లను తట్టుకునేలా అత్యంత పటిష్టమైన రీన్‌ఫోర్స్‌డ్ కాంక్రీటుతో ఈ దన్యాంగ్-కున్షన్ గ్రాండ్ బ్రిడ్జ్‌ని నిర్మించారు. మొత్తం నిర్మాణంలో సగటున 30 మీటర్ల ఎత్తులో ఈ రీన్‌ఫోర్స్‌డ్ కాంక్రీటును ఉపయోగించారు.

ఈ వంతెన అందుబాటులోకి రాకముందు కొన్ని ప్రాంతాల మధ్య ప్రయాణానికి 4.5 గంటల సమయం పట్టేది.. ఇప్పుడు అది కేవలం 2 గంటలకే పరిమితం కావడంతో అక్కడి వారికి భారీ ఉపశమనం కలిగినట్లయింది. బీజింగ్, షాంఘై వంటి మెట్రో నగరాల మధ్య 1000 కిలోమీటర్ల ప్రయాణాన్ని కేవలం 4 గంటల 48 నిమిషాల్లోనే పూర్తి చేసేలా ఈ వంతెన.. ఆ మార్గాన్ని మరింత సుగమం చేసింది.