by Suryaa Desk | Mon, Dec 15, 2025, 08:58 PM

పదేళ్ల పాటు అమెరికాలో పనిచేసి రూ.100 కోట్లకు పైగా ఆస్తితో భారత్‌కు తిరిగి వచ్చిన ఓ ఎన్ఆర్ఐ తన అనుభవాలను సోషల్ మీడియాలో పంచుకున్నారు. రెడ్డిట్‌లో ఆయన పెట్టిన ఈ పోస్ట్ తెగ వైరల్ అవుతోంది. ఆర్థిక స్వాతంత్ర్యం, భారత్‌లో తన ప్రస్తుత జీవితంపై ఆయన ఆసక్తికర వ్యాఖ్యలు చేశారు. సాధారణ మధ్యతరగతి కుటుంబం నుంచి వచ్చిన ఆయన.. టెక్ రంగంలో ఎదిగి, అమెరికాలో పెట్టుబడులు పెట్టి, భారీ మొత్తంలో ఆర్జించారు. ప్రస్తుతం కుటుంబానికి సమయం వెచ్చిస్తూ, ఆరోగ్యంపై దృష్టి పెడుతూ గడుపుతున్నారు.

‘‘సాధారణ మధ్యతరగతి కుటుంబం నుంచి వచ్చాను. మొదట సర్వీస్ కంపెనీలో తర్వాత కోర్ టెక్‌లో, ఆపై అమెరికాకు వెళ్లి, పోర్ట్‌ఫోలియోలను పెంచుకుని, ఇటీవల భారత్‌కు తిరిగి వచ్చాను. గత కొన్నేళ్లుగా మా స్టాక్ అద్భుతంగా ఉన్నాయి.. ఇప్పుడు మా సంపద 12 మిలియన్ డాలర్లకుపైగా (రూ.100 కోట్లకుపైగా) ఉంది..- నేను ఎప్పుడూ చూడాలనుకోని సంఖ్య ఇది’ అని ఆయన రాసుకొచ్చారు.

భారత్‌కు తిరిగి వచ్చి స్వేచ్ఛగా ఉన్నా, కొన్నిసార్లు జీవితం సవాలుగా అనిపిస్తోందని పేర్కొన్నారు. క్రీడలు, వ్యాయామానికి కనీసం మూడు గంటలు, పుస్తకాలు చదవడం, కుటుంబంతో రోజు గడుస్తోందని చెప్పారు. బయట ప్రపంచంలోకి వెళ్లకుండా మంచి గేటెడ్ కమ్యూనిటీలో ఉంటూ అన్ని సేవలను సులభంగా పొందుతున్నానని వివరించారు. అయితే, ఈ సౌకర్యవంతమైన జీవితంలో కొన్నిసార్లు తను ఖాళీగా అనిపిస్తోందని ఆయన అంగీకరించారు. మళ్లీ ఉద్యోగం చేయాలనే ఆలోచన తనకు నచ్చడం లేదని పేర్కొన్నారు.

‘‘నాకు కొన్నిసార్లు విసుగు వస్తుంది.. కానీ అప్పుడు టెక్ కంపెనీలో పడిన కష్టాలను ఊహించుకోలేను.. నేను ఇంకా నా జీవితంలో ఏం చేయాలో కనుక్కోవాలి. కానీ ఇది ముఖ్యమా? అని నేను ఆశ్చర్యపోతున్నాను.. నా కుటుంబంతో నేను గడిపే సమయం వల్ల పొందే ఆనందం కంటే ఏదైనా ఎక్కువేం కాదు.. ప్రమోషన్లు, హోదాల కోసం రాజీపడటానికి నేను సిద్ధంగా ఉన్నాను’’ అని ఆయన పేర్కొన్నారు. ఇటీవల అమెరికాలో నెలకున్న పరిస్థితులతో అక్కడ ఉండలేక పలువురు ఎన్‌ఆర్ఐలు స్వదేశానికి చేరుకుంటున్న సంగతి తెలిసిందే.

ఎన్ఆర్‌ఐ పెట్టిన ఈ పోస్ట్‌పై నెటిజన్లు స్పందిస్తూ ఆయన నిర్ణయాన్ని సమర్ధిస్తూ పోస్ట్‌లు పెడుతున్నారు. ‘త్వరగానే విసుగు వస్తుంది... కొన్నిసార్లు మనం మిగతావన్నీ సాధించినప్పుడు పని అనేది పెద్దల కోసం ఏర్పాటుచేసిన డేకేర్ లాంటిదని అనిపిస్తుంది’ అని రాయగా.. ‘లక్ష్యానికి చేరుకుని పదవీ విరమణ చేసినందుకు అభినందనలు. ప్రపంచాన్ని మార్చడం లేదా ప్రభావం చూపడం గురించి మీరు ఆలోచించకండి.. ఏదైనా కొత్తవాటిపై దృష్టి పెట్టండి, నేర్చుకోవాలనుకుంటే సహజంగానే మీ వైపు R ఆకర్షితులవుతారు’ అని ఇంకొకరు సలహా ఇచ్చారు.