by Suryaa Desk | Sun, Dec 14, 2025, 07:33 PM

సాధారణంగా ఏదైనా ప్రాజెక్టుల నిర్మాణం చేపడితే, ప్రభుత్వం దాని వల్ల భూమి, ఇళ్లు కోల్పోయిన నిర్వాసితులకు నష్టపరిహారంతో పాటు ఉద్యోగం కూడా ఇస్తుంది. ఇప్పుడు మనం చెప్పుకోబోయే వ్యక్తి కూడా ఇలా ఒక ప్రాజెక్టు భూ నిర్వాసితుడి కోటాలో ఉద్యోగం పొందినవాడే. 14 ఏళ్ల క్రితం (2011లో) ఆయన ఉద్యోగంలో చేరారు. ఇప్పుడు సీనియర్ అసిస్టెంట్‌గా విధులు నిర్వహిస్తున్నారు. అయితే 14 ఏళ్ల క్రితం ఆయన దాచిన ఓ రహస్యం తాజాగా బట్టబయలు అయ్యింది. దీంతో ఆ ఉద్యోగిని శాశ్వతంగా ఉద్యోగం నుంచి తొలగించారు. ఈ సంఘటన చిత్తూరు జిల్లా పరిధిలో వెలుగు చూసింది.

తాజాగా ప్రభుత్వం తెలుగుగంగ ప్రాజెక్ట్‌లో సీనియర్ అసిస్టెంట్‌గా పనిచేస్తోన్న అనిల్ కుమార్ రెడ్డి అనే వ్యక్తిని ఉద్యోగం నుంచి శాశ్వతంగా తొలగిస్తూ ఉత్తర్వులు జారీ చేసింది. కారణం, సదరు ఉద్యోగి నకిలీ సర్టిఫికెట్‌లతో ఉద్యోగం పొందారని తేలడమే. తెలుగుగంగ నీటి ప్రాజెక్టు కింద భూమి కోల్పోయిన నిర్వాసితుల కుటుంబ సభ్యులకు 2011లో ప్రభుత్వం ఉద్యోగాలను ఇచ్చింది. వీరిలో అనిల్ కుమార్ రెడ్డి కూడా ఉన్నారు. అతడి స్వస్థలం కడప జిల్లా, బద్వేలు మండలం, చౌటపల్లి.

అనిల్ కుమార్ రెడ్డి.. తన భూమి మునిగిపోయినట్లుగా ఫోర్జరీ సంతకాలతో అవార్డు సర్టిఫికెట్‌ను సృష్టించారు. అలా పొందిన నకిలీ సర్టిఫికెట్‌తో అతడు 14 ఏళ్ల క్రితం అంటే, 2011 జనవరి 29న తెలుగుగంగ ప్రాజెక్ట్‌లో టైపిస్టుగా ఉద్యోగం పొందారు. ఆ తర్వాత.. తిరుపతిలో జూనియర్ అసిస్టెంట్‌గా విధులు నిర్వహించారు. ఆరు నెలల క్రితం సీనియర్ అసిస్టెంట్‌గా పదోన్నతి పొంది, బదిలీపై ఇటీవలే శ్రీకాళహస్తికి వచ్చారు.

అయితే తెలుగుగంగ ప్రాజెక్టులో భాగంగా 2011లో ఉద్యోగం పొందిన వారిలో కొందరు.. నకిలీ సర్టిఫికెట్‌లతో ఉద్యోగం పొందినట్లుగా కొన్ని నెలల క్రితం రాష్ట్ర ప్రభుత్వానికి ఫిర్యాదులు అందాయి. దీనిపై దర్యాప్తు ప్రారంభించిన అధికారులు రాష్ట్రవ్యాప్తంగా పలుచోట్ల తెలుగుగంగ కార్యాలయాల్లో పనిచేస్తున్న వారిలో కొందరు నకిలీ సర్టిఫికెట్‌లతో ఉద్యోగాలు పొందినట్లు గుర్తించారు. ఈక్రమంలో డిసెంబర్ 10వ తేదీన వారిని శాశ్వతంగా విధుల నుంచి తొలిగిస్తూ ఉత్తర్వులు జారీ చేశారు. ఇలా ఉద్యోగం కోల్పోయిన వారిలో సీనియర్ అసిస్టెంట్ అనిల్‌కుమార్ రెడ్డి కూడా ఉన్నారు. వీరితో పాటు తెలుగుగంగ మాజీ ఉద్యోగిపై చీటింగ్ (మోసం) కేసును కూడా నమోదు