by Suryaa Desk | Sat, Dec 13, 2025, 10:45 PM

 బ్యాంకుల్లో ఫిక్స్‌డ్ డిపాజిట్ వడ్డీ రేట్లు క్రమంగా తగ్గుతున్నాయి. ఈ ఏడాదిలో ఆర్బీఐ వరుసగా రెపో రేట్లను తగ్గిస్తుండగా.. బ్యాంకులు దానికి తగ్గట్లుగా లోన్ వడ్డీ రేట్లను తగ్గించాల్సి వస్తుంది. దీంతో కొత్తగా లోన్ తీసుకునే వారికి తక్కువ వడ్డీకే లోన్లు వస్తున్నాయి. ఇప్పటికే ఫ్లోటింగ్ రేటుపై లోన్లు తీసుకున్న వారికి.. టెన్యూర్ తగ్గించుకోవచ్చు లేదా ఈఎంఐ తగ్గుతుంది. అయితే ఇదే సమయంలో వెంటనే బ్యాంకులు ఈ లోన్ వడ్డీ రేట్ల తగ్గింపు భారాన్ని కస్టమర్లపై మోపుతాయి. ఫిక్స్‌డ్ డిపాజిట్లపై వడ్డీ రేట్లను తగ్గిస్తాయి. ఈ ఏడాది ఇప్పటికే ఆర్బీఐ 4 సార్లు రెపో రేటు తగ్గించింది. మొత్తంగా 125 బేసిస్ పాయింట్లు లేదా 1.25 శాతం రెపో రేటును తగ్గించింది.

ఈ క్రమంలో చాలా బ్యాంకులు ఫిక్స్‌డ్ డిపాజిట్లపై వడ్డీ రేట్లు తగ్గించాల్సి వచ్చింది. ఇవి చారిత్రక కనిష్ఠానికి పడిపోతున్నాయి. ఎస్బీఐ, హెచ్‌డీఎఫ్‌సీ వంటి దిగ్గజ బ్యాంకుల్లో కూడా సాధారణ ప్రజలకు వడ్డీ రేట్లు 7 శాతం దిగువకు చేరాయి. ఇప్పుడు ఆర్బీఐ వడ్డీ రేట్లను తగ్గించగా.. ఎస్బీఐ మరోసారి కొన్ని టెన్యూర్లపై వడ్డీ రేట్లను తగ్గించింది.

>> ప్రధానంగా 2 సంవత్సరాల నుంచి 3 సంవత్సరాల వరకు వ్యవధి ఫిక్స్‌డ్ డిపాజిట్లపై వడ్డీ రేటును ఎస్బీఐ 6.45 శాతం నుంచి 6.40 శాతానికి తగ్గించింది. ఇక్కడ ఇప్పుడు రూ. 2 లక్షలు జమ చేసినట్లయితే మూడేళ్ల వ్యవధికి రూ. 41,966 వడ్డీ వస్తుంది. ఇదే రెండేళ్లకు చూస్తే రూ. 27,080 వడ్డీ వస్తుంది.

సీనియర్ సిటిజెన్లకు వడ్డీ రేటు కాస్త ఎక్కువగా ఉంటుంది. అంతకుముందు 6.95 శాతంగా ఉండగా.. ఇప్పుడు దీనిని 6.90 శాతానికి తగ్గించింది. ఇక్కడ రూ. 2 లక్షలు ఒకేసారి డిపాజిట్ చేస్తే మెచ్యూరిటీకి అంటే రెండేళ్లకు చూస్తే రూ. 29,325 వడ్డీ వస్తుంది. ఇదే సమయంలో 3 సంవత్సరాలకు అయితే అదే రూ. 2 లక్షలపై రూ. 45,563 వడ్డీ అందుతుంది.

ఇంకా ఎస్బీఐ 444 రోజుల కాల వ్యవధితో ఉన్నటువంటి స్పెషల్ ఫిక్స్‌డ్ డిపాజిట్ స్కీమ్ అమృత్ వృష్టి వడ్డీ రేట్లను 6.60 శాతం నుంచి 6.45 శాతానికి తగ్గించింది. ఈ బ్యాంకులో ఇప్పుడు కనీసం వారం నుంచి గరిష్ఠంగా పదేళ్ల వ్యవధి ఫిక్స్‌డ్ డిపాజిట్లపై సాధారణ ప్రజలకు కనీసం 3.05 శాతం నుంచి గరిష్ఠంగా 6.45 శాతం వడ్డీ ఆఫర్ చేస్తుండగా.. సీనియర్ సిటిజెన్లకు కనీసం 3.55 శాతం నుంచి గరిష్ఠంగా 6.95 శాతం వడ్డీ వస్తుంది. సూపర్ సీనియర్ సిటిజెన్లకు 7.05 శాతం వడ్డీ రేటు ఉంది.