by Suryaa Desk | Fri, Dec 12, 2025, 08:41 PM

రష్యా-ఉక్రెయిన్ మధ్య చాలా కాలంగా యుద్ధం కొనసాగుతున్న విషయం అందరికీ తెలిసిందే. అయితే దీన్ని ఆపేందుకు అగ్రరాజ్యం అమెరికా అధ్యక్షుడు డొనాల్డ్ ట్రంప్ సైతం తీవ్రంగా కృషి చేస్తున్నారు. అయితే ఎన్ని ప్రయత్నాలు చేసినా వీరు యుద్ధం ఆపకపోవడంతో.. ట్రంప్ కీలక వ్యాఖ్యలు చేశారు. ఈ పోరు మూడో ప్రపంచ యుద్ధానికి దారితీసే అవకాశం ఉందని ఆయన తీవ్రంగా హెచ్చరించారు. వైట్‌హౌస్‌లో విలేకరులతో మాట్లాడుతూ.. "రక్తపాతం ఆగిపోవాలని నేను కోరుకుంటున్నాను. గత నెలలోనే ఈ యుద్ధంలో దాదాపు 25 వేల మంది ప్రాణాలు కోల్పోయారు. వీరిలో ఎక్కువ మంది సైనికులే. బాంబుల వల్ల మరికొందరు మరణించారు. ఇది వెంటనే ఆగిపోవాలి" అని అన్నారు.

ఇలాంటి పోరు చాలా ప్రమాదకరం అని ట్రంప్ చెప్పుకొచ్చారు. ఇది మూడో ప్రపంచ యుద్ధానికి దారి తీస్తుందని హెచ్చరించారు. అందరూ ఆటలు ఆడుతున్నారని తాను అంతకు ముందే చెప్పానన్నారు. అలా జరగాలని తాను ఏమాత్రం కోరుకోవడం లేదని ట్రంప్ స్పష్టం చేశారు. ఈ సందర్భంగా ఇరు దేశాల మధ్య ఉద్రిక్తతలు తగ్గించడానికి తమ ప్రభుత్వం చురుకుగా పని చేస్తుందని వివరించారు.

నాలుగేళ్లుగా కొనసాగుతున్న ఈ యుద్ధాన్ని ముగించడానికి జరుగుతున్న చర్చల్లో పురోగతి లేకపోవడంపై ట్రంప్ తీవ్ర అసహనంతో ఉన్నారని వైట్‌హౌస్ ప్రెస్ సెక్రటరీ కరోలిన్ లీవిట్ తెలిపారు. అధ్యక్షుడు ఆయా దేశాల అధికారుల నుంచి మాటలు కాకుండా.. ఫలితాలు కోరుకుంటున్నారన్నారు. చర్చలతో విసిగిపోయిన అధ్యక్షుడు చర్యలకు సిద్ధమైనట్లుగా తెలిపారు. శాంతి ప్రణాళికను ముందుకు తీసుకెళ్లడంలో ట్రంప్ పరిపాలనా సిబ్బంది చురుకుగా ఉన్నారని, యూరోపియన్‌ నేతలతో చర్చించేందుకు కూడా అధ్యక్షుడు సిద్ధమైనట్లు వెల్లడించారు. పశ్చిమాసియా రాయబారి స్టీవ్ విట్కాఫ్‌ బృందం రష్యా-ఉక్రెయిన్‌లతో చర్చలు కొనసాగిస్తున్నారన్నారు.

ఉక్రెయిన్‌లో యుద్ధాన్ని ముగించేందుకు ట్రంప్ మొదట 28 సూత్రాలతో కూడిన శాంతి ప్రణాళికను ప్రతిపాదించిన సంగతి తెలిసిందే. ఈ ప్రతిపాదనపై ఉక్రెయిన్ అధ్యక్షుడు జెలెన్‌స్కీ అసంతృప్తిగా ఉన్నారు. రష్యాకు డాన్‌బాస్ ప్రాంతాన్ని అప్పగించడానికి తమ దేశం సిద్ధంగా లేదని ఆయన స్పష్టం చేశారు. అసలు ప్రతిపాదనలకు భిన్నంగా.. జెలెన్‌స్కీ 20 పాయింట్లతో కూడిన కొత్త ప్రణాళికను ప్రతిపాదించారు. దీన్ని అమెరికాకు ఇప్పటికే అందించినట్లు తెలిపారు. ఉక్రెయిన్ పునర్నిర్మాణం, ఆర్థికాభివృద్ధికి సంబంధించిన విస్తృత ప్రణాళికపై అమెరికాతో చర్చిస్తామని కూడా ఆయన చెప్పారు. కానీ దీనిపై స్పందించకుండా ట్రంప్.. మూడో ప్రపంచ యుద్ధం హెచ్చరిక చేయడం అంతర్జాతీయ వ్యాప్తంగా సంచలనం సృష్టిస్తోంది.