by Suryaa Desk | Fri, Dec 12, 2025, 08:37 PM

సాధారణంగా ఉద్యోగులు సమయానికి ఆఫీసుకు రావాలి అని రూల్ ఉంటుంది. ప్రభుత్వ ఉద్యోగుల సంగతి కాస్త పక్కన పెడితే.. ప్రైవేటు ఉద్యోగులు మాత్రం ఠంచనుగా ఆఫీసుకు రాకపోతే.. జీతాల్లో కోత విధిస్తారు. అయితే సమయం కంటే ముందే ఆఫీసుకు వచ్చిన ఓ ఉద్యోగినికి.. ఆ కంపెనీ ఊహించని షాక్ ఇచ్చింది. రోజూ ఆఫీస్ టైమ్ కంటే ముందే వస్తున్న ఆ యువతిని.. సరైన సమయానికి రావాలని పలుమార్లు పై అధికారులు హెచ్చరించారు. అయినప్పటికీ ఆ యువతి.. టైం కంటే ముందే వస్తుండటంతో చివరికి ఉద్యోగం నుంచి తీసేశారు. దీంతో ఆ మహిళ కంపెనీ తీసుకున్న నిర్ణయాన్ని సవాల్ చేస్తూ కోర్టుకెక్కింది. అయితే అక్కడ కూడా ఆమెకు ఎదురుదెబ్బే తగిలింది. ఆమెను ఉద్యోగం నుంచి తొలగిస్తూ కంపెనీ తీసుకున్న నిర్ణయం సరైందేనని కోర్టు సమర్థించింది. స్పెయిన్‌లో జరిగిన ఈ సంఘటన ఇప్పుడు తీవ్ర చర్చనీయాంశంగా మారింది.

స్పెయిన్‌లోని ఒక లాజిస్టిక్స్ కంపెనీలో ఈ ఘటన చోటు చేసుకుంది. ఆ కంపెనీలో పనిచేసే 22 ఏళ్ల మహిళా ఉద్యోగినిని వింత కారణంతో జాబ్ నుంచి తొలగించారు. ఆఫీస్ టైమ్ ఉదయం 7:30 గంటలు కాగా.. ఆమె నిత్యం ఉదయం 6:45 గంటలకే వచ్చేది. 2023 నుంచి.. ఆ కంపెనీ యజమాని ఆ యువతికి నేరుగా, లిఖితపూర్వకంగా పలుమార్లు హెచ్చరికలు జారీ చేశారు. ఆఫీస్ టైమ్‌కే రావాలని తేల్చి చెప్పారు. అయినప్పటికీ.. ఆమె తన ప్రవర్తనను మార్చుకోలేదు. అన్నిసార్లు చెప్పినా.. ఆ యువతి 19 సార్లు సమయం కంటే ముందుగానే ఆఫీస్‌కు రావడంతో.. దీన్ని దుష్ప్రవర్తన కింద ఉద్యోగం నుంచి తీసేశారు.

కంపెనీ నియమాలను పట్టించుకోకుండా.. యజమాని ఇచ్చిన ఆదేశాలను కూడా ధిక్కరించినట్లు పేర్కొంటూ.. ఆ యువతిని ఉద్యోగం నుంచి తొలగించారు. ఇక తనను ఉద్యోగం నుంచి తొలగిస్తూ కంపెనీ ఇచ్చిన ఉత్తర్వులను.. ఆ యువతి అలికాంటే సోషల్ కోర్ట్‌లో సవాల్ చేసింది. దీంతో విచారణ జరిపిన కోర్టు.. ఆ కంపెనీ వాదనలను విన్నది. అయితే ఆమెకు మొదట్లో నేరుగా చెప్పామని.. ఆ తర్వాత లిఖితపూర్వకంగా కూడా హెచ్చరికలు జారీ చేశామని.. అయినప్పటికీ వినకుండా ఆమె అలాగే ఆఫీసుకు ముందుగా వచ్చిందని.. అందుకే ఆమెను ఉద్యోగం నుంచి తొలగించినట్లు కంపెనీ తరఫు లాయర్ వాదించారు.

అంతేకాకుండా కంపెనీ ఇచ్చిన కారు బ్యాటరీని కూడా ఆ యువతి అమ్ముకున్నట్లు ఆరోపణలు ఉన్నాయని.. వీటన్నింటినీ పరిగణలోకి తీసుకుని ఆమెను ఉద్యోగం నుంచి తొలగించినట్లు కంపెనీ వెల్లడించింది. దీంతో కంపెనీ ఇచ్చిన వివరణను సమర్థించిన కోర్టు.. ఆమె తొలగింపు సరైందేనని తుది తీర్పు ఇచ్చింది. ఇది స్పెయిన్ కార్మికుల చట్టంలోని ఆర్టికల్ 54 ప్రకారం తీవ్ర ఉల్లంఘనగా పరిగణించబడుతుందని కోర్టు తెలిపింది.

ఆన్‌లైన్ చర్చ

ఇక ఆఫీసుకు ముందుగా రావడం వల్ల ఉద్యోగం కోల్పోయిన ఈ సంఘటన నెట్టింట తెగ వైరల్ కావడంతో.. ఈ కేసు ఆన్‌లైన్‌లో పెద్ద చర్చకు దారితీసింది. అయితే.. స్పష్టమైన పనివేళలు, నియమాలను అమలు చేసే అధికారం కంపెనీలకు ఉంటుందని నిపుణులు పేర్కొన్నారు. ఇక అలికాంటే సోషల్ కోర్టు ఇచ్చిన తీర్పును.. ఆ ఉద్యోగిని వాలెన్సియా సుప్రీంకోర్టులో అప్పీల్ చేసుకునే అవకాశం ఉంది.