by Suryaa Desk | Sun, Dec 07, 2025, 08:46 PM

రియల్ ఎస్టేట్‌కు డిమాండ్ పెరుగుతూనే ఉంటుందని చెప్పొచ్చు. మధ్యలో కరోనా సమయంలో కాస్త డౌన్ అయినా.. తర్వాత కోలుకునేందుకు పెద్దగా సమయం పట్టలేదు. రెండేళ్లలోనే తిరిగి గాడినపడింది. మధ్యలో హైడ్రా రాకతో ఇక్కడ హైదరాబాద్‌లో మళ్లీ కాస్త బ్రేకులు పడ్డా.. ఇప్పుడు పరిస్థితి ఫర్వాలేదు. మళ్లీ రియల్ ఎస్టేట్ పూర్వవైభవం దిశగా సాగుతోంది. ఈ క్రమంలోనే హైదరాబాద్‌లో సొంతిల్లు కొనుగోలు చేసేందుకు చాలా మంది చూస్తున్నారు. ఒకప్పటితో పోలిస్తే సేల్స్ కూడా విపరీతంగా పెరిగాయి. కొత్త కొత్త ప్రాజెక్టులు వస్తున్నా.. హాట్ కేకుల్లా అమ్ముడైపోతున్నాయి. ఇక ఇదే క్రమంలో సిటీలో ఇల్లు కొనుగోలు చేయాలనుకునే వారి అభిరుచులు మారిపోతున్నాయి. సిటీకి దూరంగా ఉండేందుకు ప్లాన్ చేసుకునే వారి సంఖ్య పెరిగిపోతుంది.

కొంత కాలంగా హైదరాబాద్ నగరం నలువైపులా అభివృద్ధి పరుగులు పెడుతున్న క్రమంలో.. ఎక్కడైనా తీసుకునేందుకు చూస్తున్నారు. ఇదే సమయంలో ఒకప్పుడు హైదరాబాద్‌కు దూరంగా అనిపించిన ఔటర్ రింగ్ రోడ్డు (ORR) ప్రాంతం ఇప్పుడు నగరవాసులకు సరికొత్త నివాస కేంద్రంగా అవతరిస్తోంది. ఇక్కడ ఉండటం వల్ల సమయం కలిసొస్తుందనే భావనతో నగరంలో ఉండే ప్రజలు కూడా ఔటర్‌వైపే మొగ్గుచూపుతున్నారు. పెట్టుబడి గమ్యస్థానంగా మారడంతో.. ఇటువైపు అంటే ఓఆర్ఆర్ చుట్టుపక్కల రియల్ ఎస్టేట్ ప్రాజెక్టులకు డిమాండ్ భారీగా పెరిగిపోయింది.

>> సాధారణంగా ప్రస్తుత రోజుల్లో నగరంలో కనీసం 15 కిలోమీటర్లు ప్రయాణించాలంటే.. రద్దీగా ఉన్న సమయంలో 45- 60 నిమిషాల వరకు సమయం ఈజీగా పడుతుంది. అయితే ఓఆర్ఆర్ ద్వారా 10-15 నిమిషాల్లోనే చేరుకునేందుకు వీలు పడుతుంది. ఇప్పుడు నగరంలో ఎక్కడినుంచి ఎక్కడికైనా వెళ్లాలన్నా ఓఆర్ఆర్‌ను వాడుతున్నారని చెప్పొచ్చు. సిటీ మధ్యలో ఉన్న వారు కూడా దగ్గర్లోని ఓఆర్ఆర్ ఎగ్జిట్‌కు చేరుకొని.. అక్కడినుంచి తమ గమ్యస్థానాలకు/సొంతూళ్లకు వెళ్తున్నారు. దీంతో ఓఆర్ఆర్.. 19 ఎగ్జిట్ కేంద్రాలు చుట్టుపక్కల ప్రాంతాల్ని నివాస కేంద్రాలుగా మారుస్తున్నాయి. దీంతో ఇక్కడ ఇళ్లకు డిమాండ్ క్రమక్రమంగా పెరిగిపోతుందని చెబుతున్నారు.

ఇప్పుడు హైదరాబాద్ నగరంలో ఒక 3BHK ఫ్లాట్ కొనాలంటే ఈజీగా రూ. 1 కోటికిపైనే ఖర్చు చేయాల్సి వస్తుంది. ఇంకా ఇండిపెండెంట్ హౌస్‌లు/వ్యక్తిగత నివాసాలు, విల్లాల ధరలు చూస్తే ఇంకా ఎక్కువే ఉంటాయి. దీంతో మధ్యతరగతి వారు కొనలేకపోతున్నారు. అయితే.. ఓఆర్ఆర్ చుట్టుపక్కల అన్ని వర్గాల వారికి కూడా వారి వారి బడ్జెట్‌కు తగ్గట్లుగా నివాసాలు, ఫ్లాట్లు అందుబాటులో ఉంటున్నాయని రియల్టర్లు చెబుతున్నారు. ఇక్కడ అపార్ట్‌మెంట్ ఫ్లాట్స్ రూ. 50 లక్షల నుంచి కూడా ఉండగా.. వ్యక్తిగత నివాసాలు రూ. 1 కోటి రేంజ్‌లో.. విల్లాలు అయితే రూ. 2- 4 కోట్ల వరకు ధరల్లో అందుబాటులో ఉన్నాయని అంటున్నారు.

ధరల్లో తేడా ఇలా..

అయితే ఓఆర్ఆర్ సమీపంలో కూడా అన్ని చోట్లా ధరలు ఒకేలా ఉండవని గుర్తుంచుకోవాలి. సిటీకి కాస్త దగ్గరగా ఉన్న.. అలాగే ఐటీ కేంద్రం చుట్టుపక్కల ఉన్నటువంటి నార్సింగి, కోకాపేట, గచ్చిబౌలిల్లో ధరలు ఎక్కువ పలుకుతున్నాయి. ఇక్కడ ఐటీ ప్రాంతం కావడంతో ప్రీమియం ప్రాజెక్టులు ఎక్కువగా ఉన్నాయి. శంషాబాద్‌లో ఎయిర్‌పోర్ట్ నేపథ్యంలో గచ్చిబౌలి నుంచి బుద్వేల్, రాజేంద్రనగర్, అప్పా వరకు నివాసాలు వేగంగా విస్తరిస్తున్నాయి. తుక్కుగూడ, రావిల్యాల దగ్గర్లో విల్లాలు ఎక్కువగా వస్తున్నాయి. ఆదిభట్ల, బొంగులూరు దగ్గర్లో.. బడ్జెట్‌లో అపార్ట్‌మెంట్లు అందుబాటులో ఉన్నాయి. పటాన్‌చెరు, ఘట్ ‌కేసర్ వంటి చోట్ల బహుళ అంతస్తుల భవనాలు వస్తున్నాయి. మేడ్చల్, శామీర్‌పేట చుట్టుపక్కల చూస్తే విల్లాలు, బహుళ అంతస్తుల భవనాలు బడ్జెట్ ధరల్లోనే ఉన్నాయని తెలుస్తోంది.