by Suryaa Desk | Fri, Dec 05, 2025, 11:46 PM

ఏపీలో స్క్రబ్ టైఫస్ కేసులు పెరుగుతున్నాయి. దీంతో, ఏపీ ప్రభుత్వం అలర్ట్ అయింది. దీనిపై తగిన చర్యలు తీసుకోవాలని సీఎం చంద్రబాబు అధికారుల్ని ఆదేశించారు. ఒక్క ఏపీలోనే కాదు మిగతా రాష్ట్రాల్లో కూడా ఈ కేసులు పెరిగాయి. ఒడిశా, హిమాచల్ ప్రదేశ్, కేరళ రాష్ట్రాల్లో గతంలో కూడా ఈ కేసులు నమోదయ్యాయి. అయితే ఈ వ్యాధి గురించి చాలా మందికి అవగాహన లేదు. డెంగ్యూ, మలేరియా, వైరల్ ఫీవర్‌లాగే దీని లక్షణాలు ఉంటాయి. ఈ వ్యాధి బ్యాక్టీరియా సోకిన చిన్న పురుగు కాటు ద్వారా వ్యాపిస్తుంది. తరువాత అది స్క్రబ్ టైఫస్ జ్వరంగా మారుతుంది. దీనిని బుష్ టైఫస్ అని కూడా పిలుస్తారు. చాలా మంది దీని గురించి ఆందోళన చెందుతున్నారు. అసలు స్క్రబ్ టైఫస్ అంటే ఏంటి? ఇది ఎలా వస్తుంది? సోకినప్పుడు ఏ లక్షణాలు కనిపిస్తాయి? ఈ వ్యాధి గురించి ఎవరు మరింత అప్రమత్తంగా, జాగ్రత్తగా ఉండాలి? ఇలా పూర్తి వివరాలు ఇప్పుడు తెలుసుకుందాం.

స్క్రబ్ టైఫస్ అంటే ఏంటి?

ఈ వ్యాధి ఓరియంటియా సుట్సుగముషి అనే బాక్టీరియా వల్ల వస్తుంది. ఈ బ్యాక్టీరియా ఎలుకలు, కుందేళ్లు, ఉడతల శరీరంపై కనిపస్తుంది. చిన్న పేనులా కనిపించే కొన్ని కీటకాల కాటు ద్వారా మానవులు ఈ బాక్టీరియా బారిన పడతారు. మిడ్జెస్, లార్వా మైట్స్ వంటి చిన్న కీటకాల కుట్టుడం ద్వారా ఈ వ్యాధి వస్తుంది. వీటికి చాలా శ్రద్ధ అవసరం. అడవులు లేదా గడ్డి వంటి పచ్చదనం ఎక్కువగా ఉన్న ప్రాంతాలలో ఇవి ఎక్కువగా కనిపిస్తాయి. ఈ కీటకాలు మానవ చర్మాన్ని తినడం ద్వారా మనుగడ సాగిస్తాయి. మిడ్జెస్ సాధారణంగా చీలమండలు, దిగువ కాళ్ళు, మోకాలు, నడముపై కుడతాయి. అయితే, ఇది అంటువ్యాధి కాదు.

స్క్రబ్ టైఫస్ లక్షణాలు

కీటకం కుట్టిన తర్వాత 10 రోజుల్లోపు స్క్రబ్ టైఫస్ లక్షణాలు ప్రారంభమవుతాయి. అవి ఏంటంటే..

​జ్వరం

వణుకు పుట్టడం

తలనొప్పి

కండరాల నొప్పి

కీటకాలు కుట్టిన ప్రదేశంలో చర్మం రంగులో మార్పు

గందరగోళం

చర్మంపై దద్దుర్లు

తీవ్రమైన సందర్భాల్లో అవయవ వైఫల్యం కూడా ఉంటుందని నివేదికలు చెబుతున్నాయి.

స్క్రబ్ టైఫస్‌ని ఎలా నిర్థారిస్తారు?

నిపుణుల అభిప్రాయం ప్రకారం.. ఎంజైమ్-లింక్డ్ ఇమ్యునోసోర్బెంట్ (ELISA) పరీక్ష స్క్రబ్ టైఫస్‌ను నిర్ధారించడానికి ఉపయోగిస్తారు. ఈ పరీక్ష IgG, IgM యాంటీబాడీలపై విడిగా సమాచారాన్ని అందిస్తుంది. రోగి నుంచి బ్లడ్ శాంపిల్స్ తీసుకోవడం ద్వారా యాంటీబాడీల్ని గుర్తిస్తారు. ఒక టెస్ట్ కిట్ ధర దాదాపు 18,000 నుంచి 20,000 రూపాయలు. ఒకే కిట్ 70 నుంచి 75 పరీక్షలను చేయగలదు.

స్క్రబ్ టైఫస్‌కి చికిత్స ఏంటి?

బ్లడ్ టెస్ట్‌లు స్క్రబ్ టైఫస్ వ్యాధిని నిర్థారించిన తర్వాత.. దాని తీవ్రతను తగ్గించడానికి వైద్యులు యాంటీబయాటిక్స్ సూచిస్తారు. ఇతర లక్షణాల అనుగుణంగా మందులు సూచిస్తారు. రోగి పరిస్థితి దిగజారకుండా వైద్యులు ప్రయత్నిస్తారు. స్క్రబ్ టైఫస్‌ను నివారించడానికి వ్యాక్సిన్ లేదు. దీనిని ఇంకా అభివృద్ధి చేయలేదు. దీన్ని ఇన్ఫెక్షన్ వస్తే.. ఇంటి చికిత్స కంటే తక్షణ వైద్య సాయం తీసుకోవడం మంచిది. ఈ వ్యాధి అక్టోబర్ నుంచి డిసెంబర్ నెలల్లో ఎక్కువగా కనిపిస్తుంది.

ఎలా నివారించాలి?

ఆరోగ్య నిపుణుల అభిప్రాయం ప్రకారం, స్క్రబ్ టైఫస్ గురించి జాగ్రత్తగా ఉండాలి.

చేతులు, కాళ్ళను బాగా కప్పి ఉంచాలని నిపుణులు చెబుతున్నారు. ఈ వ్యాధి సోకినట్టయితే వెంటనే వైద్యుడిని సంప్రదించండి.

స్క్రబ్ టైఫస్‌ను నివారించడానికి ఇంటి పరిసరాల్ని శుభ్రంగా ఉంచుకోండి. ఇంటి చుట్టూ గడి లేదా పొదలు పెరగనివ్వకండి. ఏవైనా ఉంటే.. వాటిని క్రమం తప్పకుండా శుభ్రం చేయండి.

ఇంటి చుట్టూ నీరు పేరుకుపోకుడా చూసుకోండి. ఇంటి చుట్టూ పురుగుమందుల్ని పిచికారీ చేయడం మంచిది.

గోరువెచ్చని నీరు తాగడం మంచిది. అంతేకాకుండా సమతుల్య ఆహారం తీసుకోండి.