by Suryaa Desk | Fri, Jun 06, 2025, 05:40 PM

 ఆంధ్రప్రదేశ్‌లో కోవిడ్ కేసులు క్రమంగా పెరుగుతున్నాయి. దేశవ్యాప్తంగా రాష్ట్రాలు, కేంద్రపాలిత ప్రాంతాల్లో కోవిడ్ కేసులకు సంబంధించిన డేటాను కేంద్ర ఆరోగ్య, కుటుంబ సంక్షేమ మంత్రిత్వ శాఖ రోజువారీగా వెల్లడిస్తున్న సంగతి తెలిసిందే.తాజాగా విడుదల చేసిన డేటా ప్రకారం... జూన్ 6తేదీ ఉదయం 8 గంటల వరకు దేశంలో 5,364 కోవిడ్ యాక్టివ్ కేసులు ఉన్నాయి. అయితే ఆంధ్రప్రదేశ్ విషయానికి వస్తే రాష్ట్రంలో 62 కోవిడ్ యాక్టివ్ కేసులు ఉన్నాయి. ఈ ఏడాది జనవరి నుంచి రాష్ట్రంలో నమోదైన కోవిడ్ కేసుల సంఖ్య మొత్తం... 85 కాగా, అందులో 23 మంది కోలుకున్నారు. ఆంధ్రప్రదేశ్‌లో ఇప్పటివరకు కోవిడ్ సంబంధిత మరణాలు నమోదుకాలేదు. మరోవైపు తెలంగాణలో ప్రస్తుతం ఐదు కోవిడ్ యాక్టివ్ కేసులు ఉన్నాయి.ఆంధ్రప్రదేశ్‌లో కోవిడ్ పరిస్థితి అదుపులోనే ఉందని రాష్ట్ర వైద్యారోగ్య, కుటుంబ సంక్షేమ శాఖ ప్రత్యేక ప్రధాన కార్యదర్శి ఎంటీ కృష్ణబాబు తెలిపారు. ఇటీవల ఆయన మాట్లాడుతూ... రాష్ట్రంలో కోవిడ్ కొత్త వేరియంట్ కనుగొనబడలేదని ధ్రువీకరించారు. అయితే చాలా మంది కోవిడ్ సోకిన వ్యక్తులు హోమ్ ఐసోలేషన్‌లో ఉండాలని వైద్యులు సూచిస్తున్నారని తెలిపారు. కేసుల సంఖ్య పెరిగితే పరిస్థితులను ఎదుర్కొనేందుకు అన్ని ఆసుపత్రులు తగినంతగా సిద్ధంగా ఉన్నాయని ప్రభుత్వం నిర్ధారించిందని ఆయన అన్నారు.''ఇప్పటివరకు కొత్త వేరియంట్ గుర్తించబడలేదు. ప్రస్తుతం నమోదవుతున్న కేసుల్లో ఇప్పటివరకు ఉన్న వేరియంట్‌లే కనుగొనబడుతున్నాయి. కోవిడ్ పాజిటివ్‌గా తేలినప్పటికీ... దీర్ఘకాలిక, ఇతర ఆరోగ్య సమస్యలు ఉన్నవారే ఆసుపత్రిలో చేరడం జరుగుతుంది. అయితే మిగిలిన చాలా మంది విశ్రాంతి తీసుకోవడం, ఇంట్లో ఒంటరిగా ఉంటే ఐదు నుంచి ఏడు రోజుల్లో కోవిడ్ నుంచి కోలుకుంటున్నారు. మేము ప్రతి కేసును నిశితంగా పరిశీలిస్తున్నామ. ఏదైనా కొత్త వేరియంట్‌ను గుర్తిస్తే.. వెంటనే తగిన చర్యలు తీసుకుంటాము'' అని కృష్ణబాబు తెలిపారు.