by Suryaa Desk | Mon, May 26, 2025, 03:50 PM

కడప నగరంలోని అంబేడ్కర్ సర్కిల్ వద్ద ఏర్పాటు చేసిన టీడీపీ జెండాలు, బ్యానర్లను తొలగించాలని మాల మహానాడు నాయకులు సోమవారం తీవ్రంగా నిరసన వ్యక్తం చేశారు.
మహానాడు పేరుతో అంబేడ్కర్ విగ్రహ సమీపంలో పార్టీకి సంబంధించిన ప్రచార సామాగ్రి ఏర్పాటు చేయడాన్ని వారు తీవ్రంగా తప్పుపట్టారు. ఇది రాజ్యాంగ నిర్మాత డా. బి.ఆర్. అంబేడ్కర్ గారికి అవమానం చేస్తున్న చర్యగా పేర్కొన్నారు. ఈ సందర్భంగా వారు మాట్లాడుతూ, “అంబేడ్కర్ సర్కిల్ ప్రాంతం ప్రజలందరికీ ప్రాధాన్యత గల స్థలం. ఇక్కడ రాజకీయ పార్టీలు తమ పార్టీ కార్యక్రమాలకు సంబంధించిన జెండాలు, పోస్టర్లు పెట్టడం అనుచితం,” అని తెలిపారు.
అధికారులు ఇలాంటి చర్యలపై స్పందించకపోవడాన్ని వారు తీవ్రంగా తప్పుబట్టారు. "అంబేడ్కర్‌ను అవమానించే ప్రయత్నాలను మేము సహించం. వెంటనే టీడీపీ జెండాలు, బ్యానర్లు తొలగించాలి. లేని పక్షంలో మా ఆందోళనలు మరింత తీవ్రంగా కొనసాగిస్తాం," అని హెచ్చరించారు. టీడీపీ నాయకులపై నినాదాలు చేస్తూ మాల మహానాడు కార్యకర్తలు ఆందోళన నిర్వహించారు. ఈ ఘటన స్థానికంగా చర్చనీయాంశంగా మారింది.